Mithiran News

Unlock inspiration in every views

தமிழ்த் தாய் வாழ்த்து கடந்து வந்த கடினமானப் பாதை!

Posted on October 21, 2024 by mithiran

சென்னை: தமிழ் நாடு ஆளுநர் ஆர்.என்.ரவி டிடி தமிழ் தொலைக்காட்சி விழாவில் பாடப்பட்ட தமிழ்த் தாய் வாழ்த்து பாடலில் “தெக்கணமும் அதற்சிறந்த திராவிட நல் திருநாடும்” என்ற வரிகள் விடுபட்டு போனது மிகப் பெரிய சர்ச்சையையும், தமிழ் ஆர்வலர்களிடையே கொந்தளிப்பையும் ஏற்படுத்திருக்கிறது.
இந்த நிலையில் தமிழ்த் தாய் வாழ்த்து தமிழ் நாடு அரசின் அதிகாரப்பூர்வ பாடலாக மலர்ந்தது எப்படி? அது யாரால், எப்போது எழுதப்பட்டது? அந்த பாடலில் இடம்பெற்ற வரிகளில் சில வரிகள் ஏன் நீக்கப்பட்டன?

இந்த வரிகளை நீக்கியது யார்? போன்ற விஷயங்களை அறிந்துகொள்வது நல்லது. அது பற்றித்தான் விரிவாக இக்கட்டுரையில் இடம்பெற்றிருக்கிறது.

உள்ளடக்கம்

இப்போதைய சம்பவம்

சென்னையில் தூர்தர்ஷன் டிடி தமிழ் தொலைக்காட்சியில் தமிழ்நாடு ஆளுநர் ஆர்.என். ரவி பங்கேற்ற இந்தி மாத நிறைவு விழா நிகழ்ச்சி கடந்த வெள்ளிக்கிழமை (18.10.24) நடைபெற்றது.

அப்போது வாய்ப்பாட்டாக பாடப்பட்டபோது “தெக்கணமும் அதிற்சிறந்த திராவிடநல் திருநாடும்” என்ற வரி விடுபட்டது.
இது தற்செயலாக விடுபட்டதாக தோன்றினாலும், அந்த விழாவில் தமிழ்நாடு ஆளுநர் பேசிய உரையால் இந்த தமிழ்த் தாய் வாழ்த்து வரிகள் வேண்டுமென்றே தவிர்க்கப்பட்டதோ என்ற சந்தேகத்தை எழுப்பியது.
இதனால் தமிழ் நாடு முதல்வர் மு.க.ஸ்டாலின், இந்த விஷயம் குறித்து எக்ஸ் தளத்தில் ஒரு பதிவு செய்தார். அதில், “திராவிடம் என்ற சொல்லை நீக்கி, தமிழ்த்தாய் வாழ்த்தை பாடுவது தமிழ்நாட்டின் சட்டத்தை மீறுவதாகும்.
இந்தியைக் கொண்டாடும் போர்வையில், நாட்டின் ஒருமைப்பாட்டையும் இந்த மண்ணில் வாழும் பல்வேறு இன மக்களையும் ஆளுநர் இழிவுபடுத்துகிறார்.
தமிழ்நாட்டையும் தமிழ்நாட்டு மக்களின் உணர்வுகளையும் வேண்டுமென்றே தொடர்ந்து அவமதித்து வரும் ஆளுநரை ஒன்றிய அரசு உடனடியாகத் திரும்பப் பெற வேண்டும் என்று தன்னுடைய கருத்தை தெரிவித்திருந்தார்.
திமுக ஆதரவு கட்சிகளும், எதிர்க்கட்சியான அதிமுக மற்றும் அதன் கூட்டணி கட்சிகளும் கூட இந்த விவகாரம் தொடர்பாக தங்களுடைய கண்டனங்களை பதிவு செய்தார்கள்.

மன்னிப்பு கோரிய தூர்தர்ஷன்

இந்த நிலையில், தூர்தர்ஷன் மன்னிப்பு கேட்டு ஒரு அறிக்கையை வெளியிட்டது. அதில் தமிழ்த் தாய் வாழ்த்து பாடலின்போது, கவனச்சிதறல் காரணமாக பாடியவர் ஒரு வரியை தவறவிட்டு விட்டார்.

தமிழையோ தமிழ் தாய் வாழ்த்தையோ அவமதிக்கும் எண்ணம் இல்லை,
இதனால் ஆளுநருக்கு ஏற்பட்ட சிரமத்துக்கு மன்னிப்பு கோருவதாக எக்ஸ் தளப் பக்கத்தில் அந்த அறிக்கை இடம்பெற்றது.
இந்த அறிக்கை யாருடைய கையெழுத்தும் இல்லாததோடு, தேதியும் குறிப்பிடப்படாமல் இருந்தது.

கடந்த காலத்தில்

2018-இல் தமிழ்த்தாய் வாழ்த்து பாடும்போது காஞ்சிமடத்தின் சங்கராச்சாரியார் விஜயேந்திரர் எழுந்து நிற்காமல் போனதும்கூட தமிழகத்தில் மிகப் பெரிய பேசுபொருளானது.
2018 ஜனவரி 24-ஆம் தேதி தமிழ் சமஸ்கிருத அகராதி வெளியீட்டு விழாவின்போது தமிழ்த் தாய் வாழ்த்து பாடல் இசைக்கப்பட்டது.

அப்போது இந்நிகழ்ச்சியில் கலந்துகொண்ட காஞ்சிமடத்தின் சங்கராச்சாரியார் விஜயேந்திரர் எழுந்து நிற்கவில்லை.
இதனால் தமிழகத்தில் பல்வேறு தரப்பினரும் கண்டன குரல்களை எழுப்பினார்கள். காஞ்சி மட சங்கராச்சாரியாரை கண்டித்து நடத்தப்பட்ட எதிர்ப்பு போராட்டத்தில் சிலர் மீது வழக்கும் பதிவு செய்யப்பட்டது.
இது தொடர்பான ஒரு வழக்கு கடந்த 2021 டிசம்பர் 10-ஆம் தேதி உயர்நீதிமன்ற விசாரணைக்கு வந்தது.
அப்போது நீதிபதி ஜி.ஆர். சுவாமிநாதன் தனது உத்தரவில், “தமிழ்த்தாய் வாழ்த்து இறை வணக்க பாடல். தேசிய கீதம் அல்ல. தமிழ்ld தாய் வாழ்த்து பாடும்போது அனைவரும் எழுந்து நிற்க வேண்டும் என்று எந்தவித சட்டப்படியான நிர்வாக ரீதியான உத்தரவும் இல்லை” என்று குறிப்பிட்டிருந்தார்.

நெறிமுறைகள் அடங்கிய அரசாணை வெளியீடு

இந்நிலையில் தமிழ் நாடு முதல்வர் மு.க. ஸ்டாலின் தலைமையிலான அரசு ஒரு அதிரடி அரசாணையை வெளியிட்டது.
அந்த அரசாணைப்படி, தமிழ்நாட்டில் அமைந்திருக்கும் அனைத்து கல்வி நிறுவனங்கள், பல்கலைக் கழகங்கள், அரசு அலுவலங்கள், பொதுத் துறை நிறுவனங்கள் உள்ளிட்ட அனைத்து பொது அமைப்புகளின் நிகழ்ச்சிகளிலும், நிகழ்ச்சி தொடங்குவதற்கு முன்பு தமிழ்த்தாய் வாழ்த்து கட்டாயம் பாடப்பட வேண்டும்.
தமிழ்த் தாய் வாழ்த்து பாடப்படும்போது அனைவரும் தவறாமல் எழுந்து நிற்க வேண்டும் என்பதுதான் இந்த அரசாணை. மாற்றுத் திறனாளிகள் எழுந்து நிற்பதற்கு விதிவிலக்கும் அளிக்கப்பட்டது.
அத்துடன், பொது நிகழ்ச்சிகளில் தமிழ்த் தாய் வாழ்த்து இசைத் தட்டுகளை இசைப்பதை தவிர்த்து பயிற்சி பெற்றவர்களால் பாட வேண்டும் என்றும் தமிழக அரசு அறிவுறுத்தியது.
இந்த பாடல் மோகன ராகத்தில் மூன்றன் நடையில் 55 வினாடிகளில் பாடப்படவும் அறிவுரை வழங்கப்பட்டது.
இந்த அரசாணையால், அனைத்து அரசு தொடர்பான நிகழ்வுகளிலும், பள்ளி, கல்லூரிகளிலும் தமிழ்த் தாய் வாழ்த்து பாடப்பட வேண்டிய கட்டாயம் ஏற்பட்டது.

மனோன்மணியம் பெ. சுந்தரம் பிள்ளை

சிறப்புமிக்க தமிழ்த் தாய் வாழ்த்துப் பாடலை எழுதியவர் மனோன்மணியம் பெ.சுந்தரம் பிள்ளை.
திருவிதாங்கூர் சமஸ்தானத்தில் இருந்த அவர், 1891-ஆம் ஆண்டில் மனோன்மணியம் என்ற நூலை எழுதி வெளியிட்டார்.

அந்த நூலில் தமிழ் தெய்வ வணக்கம் என்ற தலைப்பில் 12 வரிப் பாடலாக இடம்பெற்றிருந்த பாடலின் ஒரு பகுதிதான் இன்றைய தமிழ்த் தாய் வாழ்த்தாக இருக்கிறது.

அண்ணா, கருணாநிதி காலத்தில்

1913-ஆம் ஆண்டு நடைபெற்ற கரந்தை தமிழ்ச் சங்கத்தில் தமிழ்த் தாய் வாழ்த்து பாட வேண்டும் என்று முடிவு செய்யப்பட்டது.

அதையடுத்து அடுத்த ஆண்டே அந்த தமிழ் சங்கக் கூட்டத்தில் மனோன்மணியம் சுந்தரனாரின் தமிழ் தெய்வ வணக்கம் தலைப்பில் இடம்பெற்ற 12 வரிகளைக் கொண்ட பாடல் பாடப்பட்டது. அந்த பாடல் இதுதான்

நீராரும் கடலுடுத்த நிலமடந்தைக் கெழிலொழுகும்
சீராரும் வதனமெனத் திகழ்பரதக் கண்டமிதில்
தெக்கணமும் அதிற்சிறந்த திராவிடநல் திருநாடும்
தக்கசிறு பிறைநுதலும் தரித்தநறும் திலகமுமே!
அத்திலக வாசனைபோல் அனைத்துலகும் இன்பமுற
எத்திசையும் புகழ்மணக்க இருந்தபெருந் தமிழணங்கே!

பல்லுயிரும் பலவுலகும் படைத்தளித்துத் துடைக்கினுமோர்
எல்லையறு பரம்பொருள்முன் இருந்தபடி இருப்பதுபோல்
கன்னடமுங் களிதெலுங்கும் கவின்மலையாளமும் துளுவும்
உன்னுதரத் தேயுதித்தே ஒன்றுபல வாகிடினும்
ஆரியம்போல் உலகவழக்கழிந் தொழிந்து சிதையாவுன்
சீரிளமைத் திறம்வியந்து செயல்மறந்து வாழ்த்துதுமே!

1967-ஆம் ஆண்டு வரை இந்த பாடல் எந்த மாற்றமும் இன்றி தமிழ்ச் சங்க கூட்டங்களில் பாடப்பட்டு வந்தது.
இந்த பாடலை தமிழக அரசின் பாடலாக அங்கீகரிக்கப்பட வேண்டும் என்று தமிழ் சங்கங்கள் தொடர்ந்து கோரிக்கை வைத்து வந்தன.
இந்த நிலையில், 1967-இல் ஆட்சி பொறுப்பேற்ற சி.என். அண்ணாதுரை, தமிழ்ச் சங்கக் கூட்டங்களில் பாடப்படும் இப்பாடலை பள்ளி, கல்லூரி விழாக்களில் பாடுவதற்கு அதிகாரப்பூர்வமாக அறிவித்தார்.
அவரது மறைவுக்கு பிறகு ஆட்சி பொறுப்பேற்ற மு.கருணாநிதி, அப்பாடலில் ஆட்சேபத்துக்குரிய வார்த்தைகளாக கருதப்பட்ட ஆரியம்போல் உலகவழக்கழிந் தொழிந்து சிதையா என்ற வார்த்தைகளை நீக்கினார்.
அத்துடன், தமிழ்த் தாய் வாழ்த்து, தமிழின் பெருமையை மட்டுமே தாங்கி நிற்க வேண்டும் என்ற நோக்கத்தில், சில திருத்தங்கள் மேற்கொள்ளப்பட்டு இப்பாடல் அதிகாரப்பூர்வ தமிழ்த் தாய் வாழ்த்து பாடலாக அரசு நிகழ்ச்சிகளில் இனி பாடப்படும் என்று 1970 மார்ச் 11-ஆம் தேதி அன்றைய முதல்வர் மு.கருணாநிதி அறிவிப்பு வெளியிட்டார்.

நீக்கப்பட்ட வரிகள் எவை, ஏன்?

கவிஞர் மணோன்மணியம் சுந்தரனார் பாடல் வரிகளில் முதல் 6 வரிகளும், கடைசி வரியும் மட்டும் எடுத்துக்கொள்ளப்பட்டன. அந்தப் பாடல்தான் இன்றளவும் அனைத்து அரசு விழாக்களிலும், பள்ளி, கல்லூரிகளிலும் பாடப்படுகிறது.

என்ற வரிகள்தான் கவிஞரின் பாடல் வரிகளில் இருந்து நீக்கப்பட்டவை.

தமிழ்த் தாயை வாழ்த்தும் நேரத்தில், மற்றொரு மொழியான ஆரியம் அழிந்ததை சொல்வது பொருத்தமாக இருக்காது என்ற நல்லெண்ணத்தின் அடிப்படையில் நீக்கப்பட்டு இறுதி வடிவம் கொடுக்கப்பட்டதுதான் இப்போதைய தமிழ்த் தாய் வாழ்த்து.

நீராருங் கடலுடுத்த நிலமடந்தைக் கெழிலொழுகும்
சீராரும் வதனமெனத் திகழ்பரதக் கண்டமிதில்
தெக்கணமும் அதிற்சிறந்த திராவிடநல் திருநாடும்
தக்கசிறு பிறைநுதலும் தரித்தநறுந் திலகமுமே!
அத்திலக வாசனைபோல் அனைத்துலகும் இன்பமுற
எத்திசையும் புகழ்மணக்க இருந்தபெருந் தமிழணங்கே!
தமிழணங்கே!
உன் சீரிளமைத் திறம்வியந்து செயல்மறந்து வாழ்த்துதுமே!
வாழ்த்துதுமே! வாழ்த்துதுமே!

தங்க மழை பொழிய வைக்கும் துர்கா தேவி கோயில் மகிமை

திருப்பதி லட்டை பக்தர்கள் நம்பிக்கையுடன் சாப்பிடலாமா?

சென்னையில் மழை: போக்குவரத்து சீர்குலைவு

Posted on October 15, 2024 by RR

சென்னை: தமிழகத்தில் வடகிழக்கு பருவமழை தொடங்கிய நிலையில், சென்னையில் மழை தொடர்ந்து பெய்து வருகிறது. அத்துடன், வங்கக் கடலில் உருவாகியுள்ள காற்றழுத்தத் தாழ்வு மண்டலம் 17-ஆம் தேதி கரையை கடக்கும் என எதிர்பார்க்கப்படுகிறது.
தமிழகத்தில் வடகிழக்கு பருவமழை தொடங்கியதை அடுத்து தற்போது சென்னை உள்ளிட்ட 4 மாவட்டங்களில் அதி கனமழை பெய்யும் என வானிலை ஆய்வு மையம் எச்சரிக்கை விடுத்திருக்கிறது.
இதையடுத்து தமிழக அரசு சார்பில் முன்னெச்சரிக்கை நடவடிக்கைகள் தீவிரப்படுத்தப்பட்டிருக்கிறது.

உள்ளடக்கம்

காற்றழுத்தத் தாழ்வு நிலை

வங்கக் கடலில் நகரும் காற்றழுத்தத் தாழ்வு பகுதி மேலும் வலுவடைந்து அடுத்த 12 மணி நேரத்தில் காற்றழுத்த தாழ்வு மண்டலமாக மாறும் என எதிர்பார்க்கப்படுகிறது.
அதைத் தொடர்ந்து 17-ஆம் தேதி காலை நேரத்தில் காற்றத்தழுத்த தாழ்வு மண்டலமாக கரையை கடக்கும் என்றும் தெரிவிக்கப்பட்டிருக்கிறது.
இந்த காற்றழுத்தத் தாழ்வு மண்டலம் சென்னைக்கு வடக்கே கரையை கடக்கும் என்றும் வானிலை ஆய்வு மையம் உறுதி செய்திருக்கிறது.

சென்னையில் மழை

ஞாயிற்றுக்கிழமை இரவு தொடங்கி சென்னையில் மழை தொடர்ந்து பெய்து வருகிறது.

இந்த நிலையில், அடுத்த 24 மணி நேரத்துக்கு சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் கனமழை முதல் அதி கனமழை வரை பெய்ய வாய்ப்புள்ளதாக எச்சரிக்கை விடுக்கப்பட்டுள்ளது.
சென்னை, புறநகர் பகுதிகளில் தொடர்ந்து இரு நாள்களுக்கு கனமழை பெய்யக் கூடும் என்ற தகவலை வானிலை ஆய்வு மையம் தெரிவித்துள்ளது.
கனமழை காரணமாக சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் பள்ளி, கல்லூரிகளுக்கு செவ்வாய்க்கிழமை விடுமுறை அறிவிக்கப்பட்டிருக்கிறது.
இந்த 4 மாவட்டங்களிலும் அரசு மற்றும் பொதுத் துறை நிறுவனங்களுக்கும் விடுமுறை அறிவிக்கப்பட்டிருக்கிறது. சென்னையில் மழை தொடர்ந்து பெய்வதால் பொதுமக்கள் பாதிப்பை சந்திக்கத் தொடங்கியிருக்கிறார்கள்.

சென்னையில் மழை தொடர்ந்து பெய்து வருவதால் ஆங்காங்கே சாலைகளில் தண்ணீர் தேங்கி வருகிறது.

வாகனப் போக்குவரத்து சீர்குலைவு

சென்னையில் மழை தொடர்ந்து பெய்து வருவதையடுத்து பல இடங்களில் மழைநீர் தேங்கியிருக்கிறது. முக்கிய சாலைகள், தெருக்கள் மற்றும் சுரங்கப் பாதைகளில் குளம்போல் தண்ணீர் தேங்கியதால் வாகனப் போக்குவரத்து சீர்குலைந்திருக்கிறது.
பள்ளிக்கரணை, மேடவாக்கம் உள்ளிட்ட பகுதிகளில் உள்ள தெருக்கள் ஏற்கெனவே குண்டும், குழியுமாக இருக்கும் சூழலில், மழை நீர் தேங்கி எங்கு பள்ளம் இருக்கிறது என்பதை அறிய முடியாமல் வாகன ஓட்டிகள் விபத்துக்குள்ளாவதாக பொதுமக்கள் தெரிவிக்கிறார்கள்.

வானிலை ஆய்வு மையம் தகவல்

சென்னையில் செய்தியாளர்களை சந்தித்த தென்மண்டல வானிலை ஆய்வு மைய இயக்குநர் பாலச்சந்திரன், காற்றழுத்த தாழ்வுப் பகுதி மேற்கு வடதிசை நோக்கி நகர்கிறது. இதனால் அடுத்த 24 மணி நேரத்திற்கு சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் கனமழை முதல் அதி கனமழை வரை வாய்ப்பு இருக்கிறது எனத் தெரிவித்தார்.
சென்னைக்கு ரெட் அலர்ட் கொடுக்கப்பட்டிருக்கிறது. அடுத்த 4 தினங்களுக்கு தமிழகம், புதுச்சேரி, காரைக்கால் பகுதிகளில் பரவலாக மழை பெய்யும் என்றும் வானிலை ஆய்வு மையம் தெரிவித்திருக்கிறது.

விரைவு ரயில்கள் ரத்து

கனமழையை அடுத்து சப்தகிரி, ஏற்காடு, திருப்பதி, காவிரி விரைவு ரயில்களின் சேவைகள் முழுமையாக ரத்து செய்யப்பட்டுள்ளன. இன்று பாலக்காடு, மேட்டுப்பாளையம், கோவை ரயில்கள் ஆவடியில் இருந்து புறப்படும். பேசின் பிரிட்ஜ், வியாசர்பாடி ரயில் நிலையம் இடையே தண்டவாளங்களில் மழைநீர் தேங்கியிருப்பதை அடுத்து ஜோலார்பேட்டை, ஆலப்புழா விரைவு ரயில்கள் சென்னை கடற்கரை வழியாக இயக்கப்படும் என ரயில்வே நிர்வாகம் தெரிவித்திருக்கிறது.

களத்தில் உதயநிதி ஸ்டாலின்

சென்னையில் மீண்டும் பலத்த மழை பெய்து வருவதால், துணை முதல்வர் உதயநிதி ஸ்டாலின் பல இடங்களில் திங்கள்கிழமை ஆய்வு மேற்கொண்டு மழைநீர் தேங்காமல் தடுக்க வேண்டிய பணிகளை துரிதப்படுத்தினார்.
பள்ளிக்கரணை மற்றும் கோவிலம்பாக்கம் இடையே உள்ள நாராயணபுரம் ஏரி கரையோரத்திலும் அவர் ஆய்வு பணிகளை மேற்கொண்டார்.
சென்னை எழிலகத்தில் இயங்கும் மாநில அவசரகால கட்டுப்பாட்டு மையத்தில் அவர் ஆய்வு நடத்தினார். தமிழகத்தில் பெய்து வரும் மழை நிலவரம், நிவாரணப் பணிகள், பேரிடர் மீட்புக் குழுக்கள் விவரம், மழைக்கால மருத்துவ முகாம்கள், மழைநீரை அப்புறப்படுத்தும் பணிகள் உள்ளிட்டவற்றை அதிகாரிகளிடம் கேட்டறிந்தார்.

கடந்த ஆண்டு தந்த அச்சம்

கடந்த ஆண்டு மிக்ஜாம் புயலால் கொட்டித் தீர்த்த மழையில் சென்னை மாநகரம் மிதந்தது. இதனால் சென்னை மக்கள் பெரிய அளவில் பாதிப்பை சந்தித்தார்கள்.
மழைநீர் வடிகால் பணிகள் சரியான முறையில் மேற்கொள்ளப்படவில்லை என்ற குற்றச்சாட்டு எதிர்க்கட்சிகளால் முன்வைக்கப்பட்டது. இதனால் வடிகால் பணிகளுக்காக ஒதுக்கீடு செய்யப்பட்ட ஏறக்குறைய 4,000 கோடி ரூபாய் மதிப்பீட்டிலான பணிகள் குறித்து வெள்ளை அறிக்கை வெளியிட வேண்டும் என்றும் எதிர்க்கட்சிகள் கோரிக்கை விடுத்தன.
தமிழ்நாட்டில் டிசம்பர் மாதம் வந்தாலே சென்னை மற்றும் அதனை ஒட்டிய திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் வசிக்கும் மக்கள் மத்தியில் அச்ச உணர்வு ஏற்பட்டு விடுகிறது.
இதற்கு முக்கிய காரணம் கடந்த 2015-ஆம் ஆண்டு ஏற்பட்ட வெள்ளம். கனத்த மழை பெய்த நிலையில், செம்பரம்பாக்கம், புழல் ஏரி திறக்கப்பட்டதால் வெள்ளக்காடாக சென்னை காட்சி அளித்தது.

இந்த நிலையில், சென்னையில் மீண்டும் பலத்த மழை பெய்து மக்களை அச்சத்தில் ஆழ்த்த தொடங்கியிருக்கிறது.

குறிப்பாக கடந்த ஆண்டில் பெய்த மழையில் தாழ்வான குடியிருப்புகளில் வெள்ளநீர் புகுந்தன. வேளச்சேரி, பள்ளிக்கரணை போன்ற இடங்களில் உள்ள குடியிருப்புகளின் தரைத்தளத்தில் நிறுத்தி வைக்கப்பட்ட கார்கள் மூழ்கின.

இதனால் கடந்த ஆண்டில் வெள்ளத்தால் பாதிக்கப்பட்டவர்கள் முன்னெச்சரிக்கையாக வேளச்சேரி மேம்பாலத்தின் ஓரமாக கார்களை நிறுத்தி வைத்தது சமூக வலைதளங்களில் டிரெண்டானது.

சென்னை மற்றும் சுற்றுப் பகுதிகளில் அதாவது சுமார் 6 ஆயிரம் சதுர கி.மீட்டர் பரப்பளவில் பெய்யும் மழை கடலை சென்றடைவதில் பெரும் சிரமம் ஏற்படுகிறது. கூவம் ஆறு, கொசஸ்தலை ஆறு, அடையாறு ஆகியவற்றின் மூலமும், பக்கிங்ஹாம் கால்வாய் மூலமாகவும்தான் கடலை சென்றடைய முடியும்.

கடந்த ஆண்டைப் போல் சென்னையில் மீண்டும் பலத்த மழை பெய்து வரும் நிலையில், 17-ஆம் தேதி காற்றழுத்தத் தாழ்வு நிலை கரையை கடப்பதால், நிவாரணப் பணிகள் மற்றும் மீட்புப் பணிகளுக்கு தயார் நிலையில் இருக்கிறது.

நல்லோர் சிறுகதை திருக்குறள்

சென்னை அருகே கடற்கரை திருக்கோயில்

திருப்பதி லட்டு: பக்தர்கள் நம்பிக்கையுடன் சாப்பிடலாமா?

Posted on September 22, 2024 by RR

சென்னை: திருப்பதி ஸ்ரீவெங்கடேச பெருமாள் கோயில் பிரசாதம் லட்டு. இதை திருப்பதி லட்டு என்று எல்லோரும் பக்தியோடு அழைப்பது வழக்கம்.

அந்த லட்டை இனி பக்தர்கள் நம்பிக்கையுடன் வாங்கி சாப்பிடலாமா? என்ற கேள்வி ஏழுமலையானை தரிசிக்கும் பக்தர்களிடம் எழுவது இயற்கை.

இதற்கு காரணம், திருப்பதி ஏழுமலையானுக்கு பிரசாதமாக படைக்கப்பட்டு பக்தர்களுக்கு வழங்கப்படும் லட்டில் மாட்டுக் கொழுப்பு, பன்றி கொழுப்பு, மீன் எண்ணெய் கலந்த தரமற்ற நெய் பயன்படுத்தப்பட்டதாக ஒரு ஆய்வு தகவல் வெளியாகி பரபரப்பை ஏற்படுத்தியதுதான்.

உள்ளடக்கம்

தேவஸ்தானம் சொல்வதென்ன?

பக்தர்களின் சந்தேகத்திற்கான பதிலை தற்போதைய திருமலை திருப்பதி தேவஸ்தானத்தின் செயல் அலுவலராக பொறுப்பேற்றிருக்கும் செயல் அலுவலர் ஜே. சியாமள ராவ் தெரிவித்திருக்கிறார்.

அவர் அண்மையில் செய்தியாளர்களிடம் தெரிவித்திருப்பது இதுதான்.

வெங்கடேஸ்வர ஸ்வாமிக்கு வழங்கப்படும் லட்டு பிரசாதத்தின் புனிதத் தன்மையை திருப்பதி திருமலை தேவஸ்தானம் உறுதி செய்யும்.

புதிய நிர்வாகம் பொறுப்பேற்றது முதல் லட்டுகளின் தரம் மற்றும் சுவையை மேம்படுத்துவதில் கவனம் செலுத்தப்படுகிறது.

தேவஸ்தானத்துக்கு 5 ஒப்பந்ததாரர்கள் நெய் விநியோகம் செய்து வந்தனர். அவர்கள் கிலோ நெய் விலையை மிகவும் குறைத்து தருவதை பார்க்கும்போது அவை தூய நெய்யை வழங்குவதற்கான சாத்தியமானதாக தெரியவில்லை.

அதனால் புதிய நிர்வாகம் பொறுப்பேற்றதும் நெய் மாதிரிகள் எடுக்கப்பட்டு வெளி ஆய்வகங்களுக்கு தர பரிசோதனைக்கு அனுப்பியது.

அதில் ஒரு விநியோகஸ்தர் அனுப்பிய 4 டேங்கர்கள் நெய் தரமற்றவை என்பது ஆய்வில் தெரியவந்தது.

அந்த ஆய்வின்படி, சோயா பீன்ஸ், சூரியகாந்தி, பனை கர்னல் கொழுப்பு அல்லது பன்றிக்கொழுப்பு மற்றும் மாட்டிறைச்சி கொழுப்பு போன்றவை இருப்பது தெரியவந்துள்ளது..

தரமற்ற நெய் விநியோகம் செய்த தனியார் நிறுவனம் மீது சட்டப்படி நடவடிக்கை எடுக்கப்படும். நிரந்தர தீர்வாக நவீன தர பரிசோதனை கருவிகள் விரைவில் இங்கேயே நிறுவப்படும்.

லட்டு தயாரிக்கும் மூலப் பொருள்களின் தரத்தை உறுதி செய்து, லட்டு பிரசாதத்தின் புனிதத் தன்மையை காக்க தேவஸ்தானம் முழு கவனம் செலுத்தும் என்று அவர் கூறியிருக்கிறார்.

அவரது வாக்குறுதியின்படி, தற்போதைய நிலையில், கலப்படமற்ற தரமான நெய்யினால் தற்போது திருப்பதி லட்டு தயாரிக்கப்படுவது உறுதி செய்யப்பட்டிருக்கிறது.

அதனால், திருப்பதி சென்று லட்டு பிரசாதம் வாங்கும் பக்தர்கள் எந்த தயக்கமும் இன்றி சாப்பிடலாம்.

திருப்பதி கோயில் பிரசாத வரலாறு

13-14-ஆம் நூற்றாண்டில்தான் முதன் முதலில் பக்தர்களுக்கு பிரசாதமாக பல்வேறு உணவு வகைகள் வழங்கி வந்திருக்கிறார்கள்.

இரண்டாம் தேவராயர் காலத்தில் கோயிலுக்கு வரும் பக்தர்களுக்கு பிரசாதமாக வழங்குவதற்கான மூல உணவுப் பொருள்கள் திருக்கோயிலுக்கு வழங்கப்பட்டு வந்திருக்கிறது.

அதையடுத்து அப்பம், வடை, உள்ளிட்ட பல உணவுகள் பிரசாதமாக வழங்கப்பட்டு வந்திருக்கிறது. எந்த போக்குவரத்து வசதியும் இல்லாத அந்த காலத்தில் பக்தர்களுக்கு இந்த உணவுதான் அவர்களை பசியாற வைத்தது.

கி.பி.1445-ஆம் ஆண்டு வாக்கில் வழங்கப்பட்டு வந்த உணவு வகைகள் விரைவில் கெட்டு விடுவதை அறிந்த கோயில் நிர்வாகம், அப்பத்துடன், கய்யம் என்ற நீண்டநேரம் கெடாத இனிப்பு வகையை வழங்கத் தொடங்கியது.

அடுத்து வடை, அதிரசம், மனோகரம் என்ற இனிப்பு போன்றவையும் பிரசாதமாக வழங்கப்பட்டிருக்கிறது. இந்த பிரசாதங்களை அக்காலத்தில் திருப்பொங்கம் என்று அழைத்தார்கள்.

1715-ஆம் ஆண்டில் ஏழுமலையான் பக்தர் ஒருவர் தன்னுடைய வேண்டுதல் நிறைவேறியதை அடுத்து பெருமாளுக்கு கொண்டந்தா என்ற 1000 பெரிய லட்டுகளை படைத்தார்.

இவை பக்தர்களுக்கு வழங்கப்பட்டது. அதை எல்லோரும் விரும்பி சாப்பிட்டதை கோயில் நிர்வாகம் அறிந்து, 1803-ஆம் ஆண்டு முதல் இனிப்பு பூந்தியை பக்தர்களுக்கு பிரசாதமாக வழங்கத் தொடங்கியது.

அத்துடன் பிரசாதங்களை விற்பனை செய்யும் முடிவும் எடுக்கப்பட்டு ஸ்ரீவாரி பிரசாத விற்பனைக் கூடம் திருமலையில் தொடங்கப்பட்டது.

1932-இல் திருப்பதி திருமலை தேவஸ்தானம் என்ற பெயரில் ஒரு தனி நிர்வாகம் நிறுவப்பட்டு, அதன் பராமரிப்பில் கோயில் நிர்வாகம் கொண்டு வரப்பட்டது.

சுவையான திருப்பதி லட்டு பிரசாதம்

காஞ்சிபுரம் பூதேரி கிராமத்தைச் சேர்ந்த கல்யாணம் அய்யங்கார் ஏழுமலையானுக்கு கைங்கர்யம் செய்ய வேண்டி தன் குடும்பத்துடன் திருமலைக்கு சென்றார்.

அவர் அங்கேயே தங்கி, பெருமாளுக்குத் தேவையான அன்றாட பிரசாதங்களை தயாரிக்கும் பணியில் ஈடுபடத் தொடங்கினார்.

1940-இல் அவர் தயாரித்த சிறிய லட்டு பிரசாதம் தேவஸ்தானம் கல்யாண உற்சவத்தின்போது, பக்தர்களுக்கு இலவசமாக வழங்கப்பட்டது. அந்த லட்டின் அலாதி சுவை பக்தர்களை ஈர்த்தது.

இதையடுத்து 1943-ஆம் ஆண்டு முதல் சனிக்கிழமைதோறும் ஏழுமலையான் கோயிலுக்கு வந்து செல்லும் பக்தர்களுக்கு சிறிய அளவிலான லட்டு பிரசாதமாக வழங்குவது வழக்கமானது.

லட்டு தயாரிப்பு திட்டமும், குழுவும்

கல்யாண அய்யங்கார் தலைமையில் 5 பேர் கொண்ட ஒரு குழு லட்டு தயாரிப்புக்காக அமைக்கப்பட்டது. இந்த குழுவின் பெயர் மிராசி.

பக்தர்களுக்கு நாள்தோறும் பெருமளவில் லட்டு கொடுக்க வேண்டிய சூழல் ஏற்பட்டதால், இந்த லட்டு தயாரிப்புக்கு விகிதாச்சார அடிப்படையில் பொருள்களை சேர்க்கும் திட்டத்தை கல்யாணம் அய்யங்கார் உருவாக்கினார்.

விகிதாசாரப்படி லட்டு மூலப்பொருள்கள்

இந்த லட்டுவை தயாரிக்க 51 பொருள்கள் பயன்படுத்தத் தொடங்கினார்கள். 5100 லட்டுகள் பிடிப்பதற்கு படி என்ற முறையை கொண்டு வந்தார்கள்.

அதன்படி, 185 கிலோ பசும் நெய், 200 கிலோ கடலை மாவு, 400 கிலோ சர்க்கரை, 35 கிலோ முந்திரிப் பருப்பு, 17.5 கிலோ உலர்ந்த திராட்சை, 10 கிலோ கற்கண்டு, 5 கிலோ ஏலக்காய் என இந்த விகிதாசாரம் நிர்ணயிக்கப்பட்டது.

இந்த மூலப் பொருள்களின் எடை 852.50 கிலோ. இதையே படி என்கிறார்கள்

லட்டு தயாரிப்பு கூடம்

இந்த லட்டு பிரசாதம் ஆலயத்தின் உள்புறத்தில் கொலுவிருக்கும் பெருமாளின் அன்னை வகுளா தேவியின் நேரடி பார்வையில் பொட்டு என அழைக்கப்படும் மடப்பள்ளி அறையில் தயாரிப்பதை வழக்கமாகக் கொண்டார்கள்.

இங்கு தன் மகனுக்கு தயாரிக்கப்படும் பிரசாதங்களை தாயார் வகுளாதேவி மேற்பார்வையிட்டு அனுப்புவதாக ஐதீகம்.

நாளடைவில் லட்டு விற்பனை லட்சக்கணக்கை எட்டியதால், ஆலயத்தின் உள்ளே மட்டுமின்றி வெளியிலும் லட்டு தயாரிப்பு பணிகள் மேற்கொள்ளப்பட்டன.

1995-ஆம் ஆண்டு இறுதி வரையிலும் லட்டு தயாரிப்பு மிராசிகள் கட்டுப்பாட்டில் இருந்து வந்தது. 1996-ஆம் ஆண்டில் இந்த நடைமுறை மாற்றப்பட்டது. திருப்பதி தேவஸ்தானமே லட்டு தயாரிப்புப் பணியை மேற்கொள்ளத் தொடங்கியது.

இப்போது லட்டு தயாரிப்பு கூடம் ஒரு நாளைக்கு 8 லட்சம் லட்டுகள் தயாரிக்கும் திறன் கொண்டதாக மாற்றப்பட்டிருக்கிறது. 200 சமையலர்கள் பணியில் ஈடுபட்டிருக்கிறார்கள். இவர்களை பொட்டு கார்மீகலு என்று அழைக்கிறார்கள்.

பிரசாதமாக 3 வகை லட்டுகள் தயாரிப்பு

இப்போது திருமலையில் ஆஸ்தான லட்டு, கல்யாண உற்சவ லட்டு, புரோக்த லட்டு என 3 விதமாக லட்டுகள் தயாரிக்கப்பட்டு வருகின்றன.

இப்போது பக்தர்களுக்கு இலவசமாகவும், விற்பனை வழியாகவும் வழங்கப்படுவதுதான் புரோக்தம் லட்டு அல்லது புரோகிதம் லட்டு என்கிறார்கள். இதன் எடை 175 கிராம்.

ஆஸ்தான லட்டு முக்கிய விழாக் காலங்களில் மட்டும் தயாரிக்கப்படும். இது முக்கிய பிரமுகர்களுக்கு மட்டுமே வழங்கப்படுகிறது. இந்த லட்டின் எடை 750 கிராம். இதில் அதிகமாக முந்திரி, பாதாம், குங்குமப்பூ ஆகியவற்றை சேர்க்கிறார்கள்.

கல்யாண உற்சவ சேவையில் பங்கேற்கும் பக்தர்களுக்காக தயாரிக்கப்படுவதுதான் கல்யாண உற்சவ லட்டு. இதன் எடை 750 கிராம்.

புவிசார் குறியீடு

திருப்பதி லட்டுக்கு புவிசார் குறியீடு வழங்கப்பட்டிருக்கிறது. இதனால் திருப்பதி லட்டு பெயரில் வேறு யாரும் தயாரிக்க முடியாது.

கோயிலுக்கு தற்போது வழக்கமான நாள்களில் 75 ஆயிரம் பேர் வருகை தருகிறார்கள். விசேஷ காலங்களில் இதன் எண்ணிக்கை இரு மடங்காக உயர்கிறது.

இதனால் நாள்தோறும் ஸ்ரீவாரி பிரசாத கூடத்தில் 5 லட்சத்துக்கும் மேற்பட்ட லட்டுகள் விற்பனையாகின்றன.

திருப்பதி லட்டு பிரசாதத்தை இடைத் தரகர்கள் வாங்கி அதிக விலைக்கு விற்பனை செய்வது திருப்பதி தேவஸ்தானத்துக்கு தெரியவந்தது.

அதையடுத்து ஆதார் அட்டையை காண்பித்த பிறகே லட்டு பிரசாதத்தை பெறக் கூடிய நிபந்தனை சமீபகாலமாக விதிக்கப்பட்டிருக்கிறது.

ஆய்வில் தரமற்ற நெய்

இப்படி பாரம்பரியமான வரலாற்றைக் கொண்ட லட்டு தயாரிப்பில் தரமற்ற நெய் பயன்படுத்தப்பட்டதாக எழுந்த புகாரால் ஆந்திர மாநில அரசியலில் புயல் வீசுகிறது.

லட்டு தயாரிப்பு பொருள்கள் அனைத்தும் ஆண்டுதோறும் ஒப்பந்த அடிப்படையில் வாங்கப்படுகின்றன. இது தேவஸ்தானத்துக்கு பொறுப்பு வகிக்கும் நிர்வாகிகள் கண்காணிப்பிலும், கட்டுப்பாட்டிலும் உள்ளது.

ஆந்திர மாநிலத்தில் ஆட்சி மாற்றம் ஏற்பட்டதை அடுத்து புதிய நிர்வாகிகள் பொறுப்பேற்றார்கள்.

ந்த நிலையில்தான், கடந்த சில மாதங்களுக்கு முன்பு லட்டு தயாரிக்க பயன்படுத்தப்பட்ட நெய் தரமற்றது என்பது ஒரு ஆய்வு மூலம் தெரியவந்தது.

இதையடுத்து ஆந்திர மாநில முதல்வர் சந்திரபாபு நாயுடு, திருப்பதியில் பக்தர்களுக்கு வழங்கப்படும் உணவு மற்றும் பிரசாதத்தின் தரத்தை மேம்படுத்த உத்தரவிட்டார்.

இதையடுத்து கோயில் அதிகாரிகள், பொட்டு பணியாளர்களுடன் கலந்தாலோசனை நடத்தியிருக்கிறார்கள்.

அதைத் தொடர்ந்து, நந்தினி நெய் வழங்குவதற்காக கர்நாடக பால் கூட்டமைப்புடன் திருப்பதி தேவஸ்தானம் ஒப்பந்தம் செய்துள்ளது..

இதன்படி இவ்வாண்டில் மட்டும் அது 350 டன் நெய்யை ரூ.470 விலைக்கு கொள்முதல் செய்யவுள்ளது.

முதல்வர் பேச்சால் ஏற்பட்ட பரபரப்பு

கடந்த சில நாள்களுக்கு முன்பு நடந்த தேசிய ஜனநாயக கூட்டணி எம்எல்ஏக்கள் கூட்டத்தில் பேசிய ஆந்திர முதல்வர் சந்திரபாபு நாயுடு, “திருப்பதி லட்டு தயாரிக்க நெய்க்கு பதிலாக விலங்கு கொழுப்பு உள்ளிட்ட தரமற்ற பொருள்கள் பயன்படுத்தப்பட்டு வந்திருக்கின்றன. இப்போது சுத்தமான நெய் மூலம் லட்டுகள் தயாரிக்கப்படுகின்றன. இதனால் அதன் தரம் மேம்பட்டிருக்கிறது” என்று குறிப்பிட்டிருக்கிறார்.

இதைத் தொடர்ந்து, லட்டுக்கு பயன்படுத்தப்பட்ட தரமற்ற நெய்யை குஜராத்தில் உள்ள தேசிய பால்வள மேம்பாட்டு வாரியத்தின் சிஏஎல்எஃப் ஆய்வகத்தில் சோதனை செய்ததற்கான ஆவணத்தை தெலுங்கு தேசம் கட்சியின் செய்தித் தொடர்பாளர் அன்னம் வெங்கட ரமணா ரெ்டி செய்தியாளர்கள் சந்திப்பின்போது வெளியிட்டார்.

அந்த ஆவணத்தின்படி, பன்றி கொழுப்பு, மீன் எண்ணெய், மாட்டு கொழுப்பு சோயாபீன்ஸ், சூரியகாந்தி எண்ணை உள்ளிட்டவை திருப்பதி கோயில் லட்டு தயாரிப்புக்கு பயன்படுத்தப்பட்ட நெய்யில் கலந்திருப்பதாக அந்த ஆய்வறிக்கை தெரிவிக்கிறது.

எதிர்க்கட்சிகள் கருத்து

முதல்வர் சந்திரபாபு நாயுடுவின் குற்றச்சாட்டை ஒய்எஸ்ஆர் காங்கிரஸ் கட்சி மறுத்துள்ளது. அரசியல் ஆதாயத்துக்கான முயற்சியாக திருப்பதி லட்டு பிரசாதத்தின் புனிதத் தன்மையை கேள்விக்குறியாக்கியிருப்பதாக அக்கட்சி கூறியுள்ளது.

விஸ்வ ஹிந்து பரிஷத் அமைப்பு, இது மிகவும் தீவிரமாக பிரச்னை. இதில் தொடர்புடையவர்கள் மீது கடும் நடவடிக்கை எடுக்கப்பட வேண்டும் என்று கூறியது.

ஆந்திர மாநில காங்கிரஸ் கட்சித் தலைவர் ஒய்.எஸ்.ஷர்மிளா, ஆளும் தெலுங்கு தேசம் கட்சியும், ஒய்எஸ்ஆர் காங்கிரஸ் கட்சியும் கோயிலை வைத்து மோசமான அரசியல் செய்வதாகவும், இந்த விவகாரம் குறித்து சிபிஐ விசாரணை நடத்த வேண்டும் என்று கூறியிருக்கிறார்.

திருப்பதி லட்டு தரத்தில் கவனம்

இதைத் தொடர்ந்து அண்மையில் பத்திரிகையாளர்களை சந்தித்த தேவஸ்தானத்தின் செயல் அலுவலர் சியாமள ராவ், புதிய நிர்வாகம் பொறுப்பேற்றது முதல் லட்டுகளின் தரம் மற்றும் சுவையை மேம்படுத்துவதில் கவனம் செலுத்தப்படுகிறது என்று தெரிவித்திருக்கிறார்.

வெங்கடேஸ்வர ஸ்வாமிக்கு வழங்கப்படும் லட்டு பிரசாதத்தின் புனிதத் தன்மையை திருப்பதி திருமலை தேவஸ்தானம் உறுதி செய்யும். தரமற்ற நெய்யை விநியோகம் செய்தவர்கள் மீது கடும் நடவடிக்கை எடுக்கப்படும் என்றும் கூறியிருக்கிறார்.

சிக்கலில் சிக்கிய தமிழ்நாட்டு நிறுவனம்

திருப்பதி தேவஸ்தானத்துக்கு தரமற்ற நெய் விநியோகம் செய்ததாக ஆய்வு மூலம் சுட்டிக் காட்டப்பட்டு, கருப்பு பட்டியலில் சேர்க்கப்பட்டிருப்பது தமிழ்நாடு, திண்டுக்கல்லை சேர்ந்த ஏ.ஆர்.டெய்ரி ஃபுட்ஸ் நிறுவனமாகும்.

இந்த நிறுவனம் திருப்பதி தேவஸ்தானத்தின் குற்றச்சாட்டை மறுத்திருக்கிறது. “கடந்த ஜூன், ஜூலை மாதங்களில் மட்டுமே நாங்கள் தொடர்ச்சியாக இரண்டு முறை நெய் அனுப்பினோம். தற்போது நெய் அனுப்புவது நிறுத்தப்பட்டிருக்கிறது.

தேவஸ்தானத்துக்கு நெய் அனுப்பும் முன் தரக்கட்டுப்பாட்டுத் துறை மூலம் ஆய்வு செய்திருக்கிறோம்.

இந்த பிரச்னை குறித்து தேவஸ்தானத்தில் இருந்து கேள்வி எழுப்பியபோதே, எங்கள் நிறுவனத்தின் தரப்பில் இருந்து அனைத்து ஆய்வறிக்கைகளையும் அனுப்பியிருக்கிறோம்.
இந்த விவகாரம் தற்போது விசாரணையில் உள்ளது. எங்கள் நிறுவனத்தின் தரத்தை நிரூபிக்க சட்டரீதியான நடவடிக்கைகளை எதிர்கொள்ள தயாராக இருக்கிறோம்” என்று தெரிவித்திருக்கிறார்கள்.

இந்த விவகாரம் விஸ்வரூபம் எடுத்துள்ள நிலையில், மத்திய அரசின் உணவு தரக் கட்டுப்பாட்டு அலுவலர்கள் ஏ.ஆர்.டெய்ரி ஃபுட்ஸ் நிறுவனத்தில் ஆய்வு நடத்தியிருக்கிறார்கள்.

ஹேமா கமிட்டி அறிக்கையும் உயர்நீதிமன்றத்தின் கேள்வியும்

திருமலை லட்டு பிரசாதமும் அதன் வரலாறும் – விடியோ தகவல்

நல்லோர் திருக்குறள் – சொல்லும் கதையும் விளக்கமும்

Posted on September 19, 2024 by L. இராஜேந்திரன்

நல்லோர்க்கு எது அழகு?. இந்த கேள்விக்கு விடை சொல்கிறது நல்லோர் திருக்குறள் கதையும் விளக்கமும்.

உள்ளடக்கம்

ரமாவும் கல்யாண நாளும்

ரமா எங்கே இருக்க?

ஏங்க… அடுப்பங்கரையில் தான் இருக்கேன்.

ஆமா, துணி எடுக்கப் போகணும் சொன்னியே? போன வாரம் தானே எடுத்துட்டு வந்தே. இப்போ என்ன திரும்பவும் துணி எடுக்க போகணும்னுி சொல்றே?

வரவர உங்களுக்கு ஞாபக மறதி அதிகமாயிடுச்சு… அடுத்த வாரம் நமக்கு திருமண நாள் தெரியுமா?

அடடா… மறந்தே போய்ட்டேன்!

அப்பாடி… இப்பவாவது ஞாபகம் வந்துச்சே… அதற்காகத்தான் ஜவுளிக் கடைக்கு போறேன்.

திருமண நாள் வந்தா… அதுக்கும் ஜவுளி எடுக்கணுமா என்ன?

ம்…. கல்யாணம் ஆன ஆரம்ப காலத்துல ஒரு 10 வருஷம் தொடர்ச்சியா நீங்க செஞ்சதத்தான்… இப்ப நான் செய்யப் போறேன். தெரியுமோ?

கல்யாண நாளை நான் மறந்தாலும், நீங்க மறக்காம எனக்கு புடவை எடுத்து தர்றது வழக்கம். அதோட உங்களுக்கும் புது வேட்டி, சட்டை எடுப்பதும் வழக்கம். உங்க பழக்கத்தைத்தான் இப்ப நான் தொடர்றேன்.

சரி… சரி… இப்ப எவ்வளவு பணம் உனக்கு தேவைப்படுது?

ரொம்ப வேணாம். ஒரு பத்தாயிரம் போதும்…

என்னது? பத்தாயிரமா…. ஜவுளி எடுக்க 10 ஆயிரமா…. என்னடி சொல்ற…

அவ்வளவு முடியாதுன்னா சொல்லுங்க… நான் ஜவுளிக் கடைக்கே போகல..

பக்கத்து வீட்டு மாமி பட்டுப் புடவை

நேத்து பக்கத்து வீட்டுக்கு சும்மா போனேன். அந்த மாமி 20 ஆயிரத்துக்கு ஒரு பட்டுப் புடவை வாங்கி வந்திருந்தா…. பார்த்ததும் எனக்கு அதை கட்டிப் பார்க்கணும்போல ஆசை வந்துச்சு…

நான் அது மாதிரி ஒரு புடவை எடுக்கனும்னா… இந்த ஜென்மத்துல முடியாது… அதனாலத்தான் 10 ஆயிரம் கேட்டேன். முடிஞ்சா கொடுங்க… இல்லாட்டி பரவாயில்லை.

பச்சையப்பா சில்க்ஸ், ஜெயச்சந்திரன் இங்க போனா… 100 ரூபாய்க்கு எல்லாரும் பாத்துபாத்து கசக்கிப் போட்ட புடவை ஏதாவது ஒண்ணை நான் சேர்த்து வச்சிருக்கிற காசுல எடுத்துக்கிறேன்.

தோ பாரு ரமா… நான் உழைச்சு சம்பாதிக்கிறவன். பக்கத்து வீட்டுல இருக்கிறவர பத்தி உனக்கு நல்லாவே தெரியும்… அவருக்கு பல வழியில் வருமானம். அதிலே அவர் மனைவி எது வேணும்னாலும் வாங்கலாம்… அவங்களோட நம்மல கம்பேர் பண்ணாதேம்மா…

அடப் போங்க… நேர்மைன்னு சொல்லிகிட்டு திரிஞ்சா… கடைசி வரைக்கும் கஷ்டப்பட வேண்டியதுதான். உங்க நேர்மையை யாராவது மதிக்கிறாங்களா… அதை ஒரு தாளில் எழுதி வச்சு கழுத்திலே தொங்க போட்டுக்குங்க…

நீ அப்படியெல்லாம் சொல்லாதே ரமா… நீ நாலும் அறிஞ்சவள். நீயே நம்ம குழந்தைகளுக்கு பாடம் சொல்லித் தரப்போ… நேர்மையா இருக்கனும்… உழைச்சு சம்பாதிக்கனும்… அப்பதான் உன்னுடைய அப்பாவுக்கும், எனக்கும் பெருமைன்னு சொல்லுவியே… அது சும்மாவா….

உனக்கு ஒரு நல்லோர் திருக்குறள் சொல்கிறேன் கேள்.

நல்லோர் திருக்குறள்

கெடுவல்யான் என்பது அறிகதன் நெஞ்சம்
நடுவொரீஇ அல்ல செயின்

(குறள்- 116)

ஒருவன் நடுவு நிலையிலிருந்து நழுவி, பாவத்தைச் செய்ய நினைத்தால் அதுவே பின்னர் தனக்கு வரப் போகும் தீமைகளுக்கான அறிகுறி என்று குறளாசான் சொல்கிறார்.

நல்லோர்க்கு அழகு

சிந்தனை, சொல், செயல் அனைத்திலும் நேர்மை இருக்க வேண்டும். நேர்மையற்ற முறையில் சம்பாதிப்பதும் தவறு. அதை முறைதவறாக செலவிடுவதும் தவறு.

நாம் எப்போது நேர்மை தவறுகிறோமோ, அப்போதே ஆன்மாவின் தூய தன்மை மறைந்துவிடுகிறது.

கபடமும் , ஏமாற்றுத் தன்மையும் மேலோங்கி மனதிலே உள்ளொன்று வைத்து புறமொன்று பேசுவதும் அதிகமாகி விடுகிறது.

இதனால் நாம் ஏழையாக இருக்கிறோம். அவர்களைப் போல் பணக்காரனாக வேண்டும். அதற்காக அவர்களைப் போல தவறான பாதையை தேர்வு செய்ய வேண்டும் என்று நினைப்பதே தவறு ரமா..

இப்போதாவது புரிந்துகொள். போதுமென்ற மனமே பொன் செய்யும் மருந்து என்ற பழமொழியை கேள்விப்பட்டது இல்லையா?

நம்மை விட வசதியானவர்களை, வசதிகளை அனுபவிப்பவர்களை பார்ப்பதை விட்டு, நம்மை விட வசதி குறைவானவர்களை எண்ணிப் பார் ரமா…

ஏங்க… பக்கத்து வீட்டு மாமி பட்டுப் புடவை எடுத்திருக்கிறா… நானும் ஒரு பட்டுப் புடவை எடுக்கனும்னு ஆசைப்பட்டது தவறா… இதுக்கு ஒரு மணி நேரம் எனக்கு கச்சேரி பண்றீங்களே…

என் போதாத காலம் நான் இங்கு வந்து மாட்டிக்கிட்டு அவஸ்தைப்பட்டுகிட்டு இருக்கேன்…

எதிர்வீட்டு பங்கஜம்

ரமா…. ரமா… (வீட்டு வாசலில் உரத்த குரலில் எதிர்வீட்டு பங்கஜம் பதற்றமாக கூப்பிட்டாள்)

ரமா… யாரோ வாசல்ல கூப்பிடுறாங்க… பாரு…ன்னார் வீட்டுக்காரர்.

ம்ஹூம்…. ஏதாவது அக்கப்போர் பேச வருவா… அந்த பங்கஜம்… இதோ போறேன்னு சொல்லிட்டு ரமா வாசலுக்கு போனா…

ஏதோ இரண்டு பேரும் ரொபம் சுவாரஸ்யமாக அரை மணி நேரம் பேசிக்கிட்டிருந்தாங்க..

உள்ளே வந்த ரமா… சொன்னா…

ஏங்க… நம்ம பக்கத்துவீட்டு மாமி பாவம்ங்க… அந்த மாமாவை போலீஸார்காரங்க கைது பண்ணிட்டாங்களாம்… டி.வி. நியூஸ்ல அவர் பேர சொல்றாங்களாம். அவமானத்துல, பக்கத்து வீட்டு மாமி கதவை பூட்டிக்கிட்டு வெளியே வராம இருக்காங்க..

நான் கூட பக்கத்து வீட்டு கதவை தட்டினேன். அவங்க திறக்கலே…

எதுக்கு கைது பண்ணியிருக்காங்களாம்?

ஏன்? மாமி. எதற்காக கூப்பிட்டேள்? எனக் கேட்டாள் ரமா.

மாமா… ஆபிஸ்ல ஒரு சர்பிகேட் கொடுக்க 1000 ரூபா லஞ்சம் வாங்கினாராம். அதை லஞ்ச ஒழிப்பு போலீஸ்காரங்க கையும் களவுமா பிடிச்சுட்டாங்களாம்.

கொஞ்ச நாழி முன்னாடித்தான் டி.வி. செய்தில சொன்னத கேட்டுட்டு பங்கஜம் ஓடி வந்து சொன்னா…

மாமி… பாவம்ங்க…

சரி… சாப்பாடு வைக்கிறேன். சாப்பிடுங்க… நான் இன்னைக்கு ஜவுளிக் கடைக்கு போகலே…

நாளைக்குத்தான் போறேன். வருஷம் தவறாம புடவையும், வேட்டி, சட்டையும் எடுத்துகிட்டு வர்றோம். இந்த வருஷம் தவறக்கூடாதுங்கிறதால நம்ம வசதிக்கேற்ப புடவை, வேட்டி, சட்டை எடுத்துகிட்டு வரேன்னு சொல்லிட்டு சமையல் கட்டுக்கு போனா ரமா.

நேர்மை என்றைக்கும் நமக்கு பாதிப்பை ஏற்படுத்தி விடாது. அது என்றைக்கும் நமக்கு பாதுகாப்பைத்தான் தரும்.

பணமும், பகட்டும்தான் வாழ்க்கை என்று நினைப்பவர்கள் நாளும் உறங்க முடியாமல் தவிப்பது வாடிக்கை. ஆனால் நமக்கு இருக்கும் வசதியே போதும், நிம்மதியே வேண்டும் என்று நினைப்பவர்களை எந்த ஆபத்தும் அண்டாது என்பதே உண்மை.

இதைத்தான் குறளாசன், தன் நெஞ்சம் நீதியை விட்டுவிட்டு அநீதி செய்ய துணிந்தால், அதுவே தான் கெடப்போவதற்கு அறிகுறி என்று அழகாகக் கூறியிருக்கிறார்.

இந்த பழக்கம் யார்கிட்டே இருந்து வந்துச்சு…

திருப்பதி லட்டு: பக்தர்கள் நம்பிக்கையுடன் சாப்பிடலாமா?

கண்ணால் காண்பதும் பொய் தீர விசாரிப்பதே மெய்!

Posted on September 19, 2024 by வெ நாராயணமூர்த்தி

வெ நாராயணமூர்த்தி

‘கண்ணால் காண்பதும் பொய், காதால் கேட்பதும் பொய், தீர விசாரிப்பதே மெய்’ இது நாமறிந்த மூதுரை. என்ன சொல்கிறது இந்த அறிவுரை?

நாம் நேரடியாகப் பார்ப்பது, நம் கண்ணுக்குத் தெரிவது எப்படி பொய்யாக
முடியும்? நாம் நேரடியாகக் கேட்பது எப்படி பொய்யாக முடியும்? இதில்
‘நேரடி’ என்பது என்ன? பொய் என்பது ஏன்? எப்படி ‘தீர’ விசாரிப்பது?
அது மட்டும் எப்படி மெய்யாக முடியும்?

கண்ணால் காண்பதும் பொய் – மூதுரைக்குப் பின்னால் பல விஷயங்கள் புதைந்துள்ளன. ஒவ்வொன்றாகப் பார்ப்போம்.

உள்ளடக்கம்

இந்த்ரியங்களும் அனுபவங்களும்

சில அடிப்படை விஷயங்களைப் பார்போம். நாம் பார்ப்பது, கேட்பது, நுகர்வது, ருசிப்பது, தொடு உணர்வுகள் ஆகிய இந்த ஐந்து அனுபவங்களையும் எப்படிப் பெறுகிறோம்?

உடலில் உள்ள இந்த்ரியங்களைப் பயன்படுத்தி மனதால் உணர்கிறோம். அதாவது, கண்,
காது, மூக்கு, நாக்கு மற்றும் சருமம் வழியாக நம் முன்னே தெரியும் உலகை அறியும் அனுபவங்களைப் பெறுகிறோம்.

இதை ‘ப்ரத்யக்க்ஷ ஞானம்’ என்று வகைப் படுத்துகிறது உபநிஷத்துகள். ஸம்ஸ்க்ருத மொழியில் ‘அக்க்ஷ’ என்றால் ‘கண்’ என்று பொருள். உபநிஷதங்கள் பொதுவாக எல்லா இந்த்ரியங்களையுமே ‘அக்க்ஷ’ என்று வகைப்படுத்துகிறது.

அதாவது வெளி உலகிலிருந்து இந்த்ரீயங்கள் வழியாக உள்வாங்கும் அனைத்து அனுபவங்களையும் ‘ப்ரதி அக்க்ஷ ஞானம்- ப்ரத்யக்க்ஷ ஞானம்’ என்று விளக்கமளிக்கிறது.

தவறான புரிதல்

நம்மில் பெரும்பாலோர் இந்த அனுபவத்தையே ‘நேரடி அனுபவம்’ என்று தவறாகப் புரிந்து கொள்கிறோம். இதில் என்ன தவறு?

ஏனென்றால் இத்தகைய அனுபவங்களை நாம் இந்த்ரியங்கள் வழியாகவே
பெறுகிறோம். இந்த்ரியங்கள் இல்லாவிட்டால் இந்த அனுபவங்கள் கிடைக்காது அல்லவா?

அனுபவிப்பவருக்கும், அனுபவிக்கப்படும் பொருளுக்கும் இடையே செயல்படும் கருவிகளாக இந்த இந்த்ரியங்கள், ஒரு ஊடகமாக மட்டுமே செயல்படுகிறது.

ஆகவே இவை பிரதிபலிக்கும் அனுபவங்கள் நம்முடைய நேரடி அனுபவங்களாக இருக்க முடியாது.

அனுமானங்கள்

சில நேரங்களில் இந்த இந்த்ரியங்களைப் பயன்படுத்த முடியாதபோது, சில விஷயங்களை அனுமானங்களால் மறைமுகமாக அறிகிறோம். எப்படி?

நம் இந்த்ரியங்களின் உணர்வு எல்லைகளுக்கு அப்பால் உள்ள விஷயங்களை, நாம் அறிய முடியாத, அல்லது நமக்கு அதுவரை தெரியாத விஷயங்களை நாம் நம்முடைய இந்த்ரியங்களைப் பயன்படுத்தி அறியமுடியாதபோது, புத்தியைப் பயன்படுத்தி அனுமானிக்கிறோம். அதாவது மறைமுகமாக அறிந்துகொள்கிறோம்.

உதாரணமாக, தூரத்தில் புகை தெரிகிறது என்றால் அங்கே நெருப்பும் இருந்திருக்க வேண்டும் என்று நாம் ஏற்கனவே பார்த்த அனுபவத்தின் அடிப்படையில் அறிந்து கொள்கிறோம்.

நெருப்பை நாம் காணமுடியாமல் போனாலும், புகையின் அடிப்படையில், நாம் காணமுடியாத நெருப்பை நாம் அங்கே இருப்பதாக அனுமானிக்கிறோம்.

சில நேரங்களில் ப்ரத்யக்க்ஷமாக அறியமுடியாத அனுபவங்களை மற்றவர் சொல்லக் கேட்டு அறிகிறோம், அல்லது புத்தகங்களைப் படித்து அறிகிறோம்.

நேரில் பார்க்க முடியாவிட்டாலும் படங்களைப் பார்த்து அறிகிறோம். இதை உபநிஷத்துகள் ‘பரோக்க்ஷ ஞானம்’ (அதாவது ‘பர அக்க்ஷ’ இந்த்ரியங்களின் உணர்வு எல்லைகளுக்கு அப்பாற்பட்ட) என்று வகைப்படுத்துகின்றன.

சொல்லப் போனால் பெரும்பாலான அனுபவங்கள் நமக்கு பரோக்க்ஷமாகவே கிடைக்கின்றன. இந்த வகையான அனுபவங்களும் நேரடியாகக் கிடைப்பவை அல்ல.

விசித்திரமான மூன்றாவது அனுபவம்

இந்த இரண்டு வகையான அனுபவங்கள் அல்லாது மூன்றாவதாக இன்னொரு அனுபவம் இருக்கிறது. இது இந்த்ரியங்களை பயன்படுத்தியோ அல்லது பயன்படுத்தாமலோ அல்லது புத்தியைப் பயன்படுத்திப் பெறக்கூடிய அனுபவம் அல்ல.

இது மிகவும் வித்தியாசமானது. விசித்திரமானது. அலாதியானது. இயல்பானதும் கூட. இது நம் அன்றாட வாழ்க்கையில் நித்தமும் அனுபவிக்கிறோம்.

ஆனால் பெரும்பாலும் இதைப்பற்றி நாம் யோசிப்பதும் இல்லை, கூர்ந்து கவனிப்பதும் இல்லை. அதனால் இந்த அனுபவம் நமக்கு புரியாததாக இருக்கிறது.

இந்த அனுபவத்தை ‘அபரோக்க்ஷ ஞானம்’ என்று வர்ணிக்கிறது உபநிஷதம். இந்த்ரியங்களையோ, அனுமானங்களையோ பயன்படுத்தாமல், அதாவது இடையே எந்த ஊடக (இந்த்ரியங்களின்) உதவியும் இல்லாமல் நேரடியாக அறிவது, உணர்வது.

உதாரணமாக நமக்கு மனதில் தோன்றும் எண்ணங்களை நாம் நேரடியாகவே உணர்கிறோம். அதற்கு எந்த இந்த்ரியங்களின் உதவியும் தேவை இல்லை.

மனதில் ஏற்படும் சோகம், துக்கம், மகிழ்ச்சி, ஞாபகம் போன்ற உணர்வுகளை நேரடியாகவே உணர்கிறோம். அனுபவங்களின் அடிப்படை ‘வாழும் தன்மை’ இங்கே ஒரு விஷயத்தை கவனிக்க வேண்டும்.

இந்த அனைத்து அனுபவங்களையும் உணர்தலுக்கு அடிப்படையான நம் ‘உணரும் தன்மை’, அல்லது ‘வாழும் தன்மை’ (‘நான்’ இருக்கிறேன் என்பதை எப்போதும் நம்மால் உணரமுடிகிறது).

இதற்கு இந்த்ரியங்களோ, அல்லது மறைமுக அனுபவமோ தேவை இல்லை அல்லவா? இது நேரடி அனுபவம்.

நம்முடைய ‘நான் வாழ்கிறேன், நான் இருக்கிறேன்- என்கிற தன்மை’, இதை உணரும் தன்மையே மற்ற எல்லா அனுபவங்களுக்கும் அடிப்படை. இந்த்ரியங்கள் எப்படி உலக அனுபவங்களை நமக்கு உணர்த்துகின்றன? இதுதான் விந்தை. தெய்வீக விளையாட்டு.

ஆனால், இந்த்ரியங்களின் உதவியின்றி, நம் மனதில் தோன்றும் எண்ணங்களை நேரடியாகவே நாம் எப்படி உணரமுடிகிறது ? இது அதை விடப் பெரிய விந்தை.

அனாஹத குரல்

நமக்குள்ளே சதா கேட்கின்ற ‘அனாஹத’ குரல், இதைப் பற்றி நாம் யோசித்தது உண்டா? இரண்டு பொருள்கள் மோதிக்கொள்ளும்போது செயற்கையாக ஏற்படுவது ‘ஹத’- சப்தம்.

எந்தப் பொருளும் மோதாமல் இயற்கையாக ஏற்படுவது அனாஹத சப்தம். இந்தச் சப்தம், இந்தக் குரல் எங்கே, எப்படி உருவாகிறது? இந்த்ர்யங்களின் உதவியின்றி இதை
எப்படி உணர்கிறோம்? உணர வைப்பது யார்? இதுவல்லவோ அதிசயம்!

குறுகிய வட்டம்

இந்த்ரியங்கள் கொண்ட உடல், உள்ளம் ஆகியவையின் கலவையை ‘நான்’ என்று சொந்தம் கொண்டாடும் மனிதன், அனுபவங்களை உணரக்கூடிய மிகச் சிறிய எல்லைகளோடு வரையறுக்கபட்டவன் தான் என்றும், இந்தப் பரந்த உலகில் தான் ஒரு சிறு துறும்பு என்கிற கற்பனை சிறுமையில் திளைக்கிறான்.

தான் சிறிது காலம் வாழ்த்து மடியப் போகிறவன். இந்த உடலும் உள்ளமும் நோய்களாலும், கர்ம வினைகளாலும் அழியப் போகிறது. அதை தடுக்கமுடியாது.

ஆகவே இந்த அழிவிலிருந்து மீள வழியில்லை, ஆகவே வாழும் வரை எல்லா சுகங்களையும் அனுபவித்து மடிவோம் என்ற சிந்தனையோடு சம்சார வாழ்க்கையில் அல்லல் படுபவர்கள் நம்மை போன்ற சராசரி மனிதர்கள்..

உணர்வுகளை உணர வைப்பது யார்?

அபரோக்ஷ உணர்வுகளை ‘உணர்வது’ ஒருபக்கம் இருக்க, இந்த உணர்வுகளை உணர வைப்பது யார்? இந்தக் கேள்விக்கு உபநிஷதங்கள் அருமையாக ஒரு விளக்கத்தைத் தருகின்றன.

ப்ரத்யக்ஷ, பரோக்ஷ மற்றும் அபரோக்ஷ அனுபவங்களை நமக்கு புரியவைப்பது யார்? எந்த ஒரு அனுபவமும் எப்படி ஏற்படுகிறது? என்கிற கேள்விக்கு அளிக்கப்பட்ட
பதில் இதுதான்:

ஒரு அனுபவம் ஏற்பட மூன்று விஷயங்கள் தேவை. அனுபவிக்கப்படும் பொருள், அனுபவிப்பவர், இரண்டுக்கும் இடையே அந்த தெய்வீக உணர்வு,

அனுபவிக்கப்படும் பொருளும் அனுபவிப்பவரும் வெவ்வேறாக இருக்கும்போது மட்டுமே அனுபவம் ஏற்படுகிறது. இந்த உலகம் அனுபவிக்கப்படும் பொருள். இதற்கு இடை-ஊடகமாக உதவுவது உடல் (இந்த்ரியங்கள்), மனம், புத்தி போன்றவை.

அப்படியானால் அனுபவிப்பவர் யார்? இதைப் புரிந்துகொள்வதில்தான் நாம் தவறு செய்கிறோம்.

ஞான யோகம்

உதவி செய்யும் இடை-ஊடகங்களையே அனுபவிப்பவராக ஏற்றுக்கொண்டு அதனால் ஏற்படும் சங்கடங்களுக்கும் இந்த ஊடகங்களின் கலவையான உடலும், உள்ளமும்தான் காரணம் என்று ஏற்றுக்கொண்டு நிவாரணம் தேடுகிறோம்.

அனுபவங்களின் இந்த அடிப்படை உணர்வுகளை சதா வெளிச்சம் போட்டு காட்டுவது
ஸ்வப்ரகாஸமாக ஒளிர்ந்துகொண்டிருப்பது ‘ஆத்மன்’.

இது ஊடகம் அல்ல, கருவியும் அல்ல. இது தெய்வீகம். நம் உண்மை ஸ்வரூபம். நம்
உண்மை இயல்பும் இதுவே. இதுவே ‘நாம்’.

இதை வேறு எந்த கருவியாலும் உணரமுடியாது, ஆழ்ந்த விசாரணை வழியாக மட்டுமே
அறியமுடியும். இதுவே ஞான யோகம்.

‘ப்ரதி போத விதிதம் மதம், அம்ருதத்வமஹி விந்ததே’ ஒவ்வொரு அனுபவத்தின் பின்னணியிலும் இந்த தெய்வீக சக்தி வெளிப்படுகிறது.

இந்த விந்தையை உணர்ந்தவனுக்கு பிறப்பு, இறப்பே இல்லை என்கிறது உபநிஷத்து.
ஆனால் நாமோ, நம் அடிப்படையான இந்த தெய்வீகத் தன்மையை உணராமல், தெய்வீக அனுபவத்தை வெளியில், இந்த உலகில் தேடி அலைகிறோம்!

தெய்வீகத் தன்மை

இந்தத் சூட்சுமான தெய்வீகத் தன்மை, நமக்கு நேரடியாகவே புலப்படுகிறது. இதை யாரைக் கேட்டும் தெரிந்துகொள்ள வேண்டிய அவசியம் இல்லை.

இந்த தெய்வீகத்தன்மை இல்லையென்றால் எந்த வகையான அனுபவமும் சாத்யமில்லை. பிரத்யக்க்ஷமோ பரோக்க்ஷமோ அல்லது அபரோக்க்ஷ அனுபவமோ இவை அனைத்திற்கும் அடிப்படையானது இந்த தெய்வீகத் தன்மை.

இதை உணர்ந்து, தெளிந்து, ஸம்சார சிறையிலிருந்து விடுதலை பெறுவதே மானிடப் பிறப்பின் பயன். இதையே வேதங்கள் ‘மோக்ஷம்’, என்று வர்ணிக்கின்றன.

அதாவது, இறந்த பிறகு வேறு எங்கோ கிடைப்பது அல்ல இது. ‘வாழும் நிலையிலேயே சோகம், துக்கம், ஸம்ஸார பந்தம் முதலான அனைத்து பிணைப்புகளிலிருந்தும் விடுதலை’.

இதை ‘அத்யந்தக துக்க நிவர்த்தி, பரமானந்தப் ப்ராப்தி’ என்று வேதங்கள்
வருணிக்கின்றன. இதுவே சத்சித் ஆனந்த நிலை.

ஆனாலும் நம்மோடு இணைந்து, நமக்கு அனைத்தையும் உணர்த்தும் இந்த தெய்வீகத்
தன்மையை பற்றி நாம் பெரும்பாலும் யோசிப்பதில்லை.

பத்து நண்பர்கள் கதை

இந்த நேரடி அனுபவத்தை புரிந்துகொள்ள உதவி செய்யும், நமக்குத் தெரிந்த ஒரு பிரபலமான பழைய கதையை மீண்டும் அலசிப் பார்ப்போம்.

பத்து நண்பர்கள் ஒரு பயணத்தை மேற்கொண்டனர். வழியில் நீர் புரண்டோடும் ஒரு ஆற்றைக் கடக்க நேரிட்டது. அனைவரும் மிகவும் கவனத்துடன் ஆற்றை நீந்திக் கடந்துவிட்டனர்.

சந்தேகம்

மறுகரையை அடைந்ததும், பத்து நண்பர்களும் பத்திரமாக சேர்ந்து
விட்டனாரா என்ற சந்தேகம் எழுந்தது. இதை உறுதி செய்துக் கொள்ள,
வரிசையாக நின்று அவர்களை எண்ணத் தொடங்கினர்.

முதலில் எண்ணிக்கையை மேற்கொண்டவர், அவரை விடுத்து மற்றவர்களை
எண்ணிக்கையில் கொண்டு, ஒன்பது நண்பர்களே ஆற்றைக் கடந்துள்ளதாக அறிவித்தார்.

இப்படி ஒவ்வொருவராக இதே தவறைச் செய்து ஒன்பது பேர் மட்டுமே இருப்பதாக அனுமானித்துக் கொண்டு பத்தாவது நபர் ஆற்றில் அடித்துக்கொண்டு போய்விட்டார் என்று முடிவு செய்தனர். இது ஒரு வகையில் கண்ணால் காண்பது பொய் அல்லவா?

சோகம்

‘அந்த பத்தாவது நண்பரின் குடும்பத்தாருக்கு என்ன பதில் சொல்வோம்’
என்று பயத்தில் சிக்கி சோகத்தில் மூழ்கி அழத்தொடங்கினர்.

அப்போது அந்த வழியே வந்த முதியவர் ஒருவர் இந்த இளைஞர்கள் அழுவதைக்
கண்டு என்னவென்று விசாரித்தார்.

தாங்கள் பத்து நண்பர்கள் இந்த ஆற்றைக் கடந்ததாகவும் ஒரு நண்பர் நீரில் அடித்துச் சென்று விட்டதாகவும் சொல்லி மேலும் அழுதனர்.

உண்மை அளித்த ஆறுதல்

முதியவருக்குப் பார்த்ததுமே புரிந்தது. பத்து நண்பர்களும் அங்கே இருந்தனர். உண்மையில் பத்து பேர் அங்கே இருந்தும் இவர்களுக்கு அறியாமையால் இது தெரியவில்லையே!

‘கவலைப்பட வேண்டாம். பத்தாவது நண்பர் இங்கேயேதான் இருக்கிறார். நான் உங்களுக்குக் காட்டுகிறேன்’ என்று ஆறுதல் கூறினார்.

மகிழ்ச்சி

நண்பர்களுக்கு மேலும் குழப்பம் அதிகரித்தது. முதியவர் அனைவரையும்
வரிசையில் நிற்கவைத்து ஒரு இளைஞனை அழைத்து எண்ணச்
சொன்னார்.

அவன் முன்பு செய்தது போல ஒன்பது பேரை எண்ணி முடித்தான். கண்ணால் காண்பதும் பொய் என்பதை அவன் உணரவில்லை. முதியவர் அந்த எண்ணிக்கை மேற்கொண்டவனின் கையை அவனை நோக்கி மடக்கி நீதான் அந்த பத்தாவது நண்பன் என்றார்.

‘அட என்ன ஆச்சர்யம், இவ்வளவு நேரம் எனக்குப் புலப்படாத நான் அல்லவா அந்த பத்தாவது நண்பன்’ என்று உணர்ந்து மகிழ்ச்சி அடைந்தான்.

இப்படியாக அனைத்து நண்பர்களும் தங்கள் பத்தாவது நண்பன் எங்கும் காணாமல் போகவில்லை. தங்களுடனேயே இருக்கிறான். அது எண்ணிக்கையில் சேர்த்துக் கொள்ளப்படாத தாங்கள்தான் தற்காலிகமாக காணாமல் போனோம் என்கிற உண்மையை உணர்ந்து மகிழ்ச்சியுடன் தங்கள் பயணத்தைத் தொடர்ந்தனர்.

கண்ணால் காண்பதும் பொய்?

இந்தக் கதையைக் கூர்ந்து கவனித்தால் கண்ணால் காண்பதும் பொய் என்பது உள்பட பல விஷயங்கள் நமக்குப் புலப்படுகின்றன. பத்து நண்பர்களும் தங்கள் கண்கள் வழியாகப் பார்த்தும், அவர்களுக்குள்ளே உயிருடன் இருந்த பத்தாவது நபரை ஏன்
தெரிந்துகொள்ள முடியவில்லை?

அவர்கள் எண்ணிக்கையை மேற்கொண்டு முயன்றபோதும் பத்தாவது நபர் கிடைக்கவில்லை. நேரில் இருந்தும் அந்த பத்தாவது நபர் மற்றவர் கண்ணுக்குப் புலப்படவில்லை. அப்படியெனில் கண்ணால் காண்பதும் பொய் என்பது சரியாக இருக்குமோ?

முதியவர் அந்தப் பத்தாவது நபர் அங்கேயே இருக்கிறார் என்று சொன்னபோது, அந்த நபரை அடையாளம் காணும் வரை, கேட்டதும் பொய்யாகவல்லவா பட்டது?

உண்மை புலப்படாத வரை, பார்த்ததும் கேட்டதும் பொய்யாகிவிடவில்லையா? ஆனால் முதியவர் சொல்லிய விசாரணை வழியாக, தன்னை விடுத்து மற்றவர்களை மட்டுமே எண்ணிக்கையில் சேர்த்த தவறை அந்த இளைஞர்கள் உணர்ந்தபோது,
பத்தாவது நண்பன் புலப்பட்டதோடு அல்லாமல் அவன் உயிரோடுதான்
இருக்கிறான், தங்கள் முன்னேயே இருக்கிறான், அவன் உண்மையுமாகி விட்டான் என்கிற நிதர்சனம் தெரிந்தது.

விசாரணை வழி காட்டியது

அதுகாறும் மூடி மறைந்திருந்த இந்த ‘உணர்தல் அனுபவம்’ எப்படி வெளிப்பட்டது? எப்படி சாத்தியமாகியது?

இது இந்தியங்களைச் சார்ந்ததோ அல்லது அனுமானங்களைச் சார்ந்ததோ இருக்கவில்லை அல்லது, முதியவர் சொல்கிறார் என்றால் அதில் உண்மை இருக்கும் என்ற நம்பிக்கையின் அடிப்படையில் உணர்ந்த அனுபவமோ அல்ல இது.

அந்த இளைஞர்களே, தங்கள் தவறை (எண்ணிக்கையில் தங்களை சேர்க்காமல்
விட்டதை) உணர்ந்து தங்கள் அறியாமையிலிருந்து மீண்டபோது, காணாமல் போன அந்த பத்தாவது நண்பன் புலப்பட்டான்.

இங்கே இந்த்ரியங்களோ அல்லது அனுமானங்களோ உதவி செய்யவில்லை. இந்த
இரண்டு வகை அனுபவ எல்லைகளைத் தாண்டி அபரோக்க்ஷ ஞானம் வழியாகத்தான் உண்மை தெரிந்தது. இது அவர்கள் மேற்கொண்ட விசாரணை வழியாக மட்டுமே கிடைத்தது.

அனுபவங்கள் ஒரு தோற்றமே

இந்தக் கதையில் மேலும் சில உண்மைகள் தெரிகின்றன. முதியவர் சொல்லும்வரை, பத்தாவது நபர் அங்கேயே இருந்தும் மற்றவர்களுக்கு ஏன் புலப்படவில்லை?

ஏனென்றால் இப்படித்தான் நாம் நம் உண்மையான இயல்பைத் தெரிந்துகொள்ளாமல், ‘பிரத்யக்க்ஷ மற்றும் பரோக்க்ஷ அனுபவங்களே நிதர்சனமானவை, நிஜமானவை’ என்று
ஏற்றுக் கொண்டு நம்மை பழக்கிக் கொண்டு விட்டோம்.

இந்த அறியாமையிலிருந்து நம்மை மீளச் செய்வதே வேதங்களின் நோக்கம். இந்த மூன்று வகையான அனுபவங்களையும் நமக்கு உணர்த்தும் அந்த தெய்வீக சக்தியே உண்மையில் “நாம்” என்பதை உணரும்போது இந்த அனுபவங்கள் அனைத்தும் ஒரு தோற்றம் என்று புரிகிறது.

ஆத்மன் ஒன்றே உண்மை, நிரந்த்ரம்

இந்த அனுபவங்களை நமக்கு உணர்த்தும் சக்தியே ‘ஆத்மன்’ அல்லது ‘ப்ரம்மன்’ என்று உபநிஷத்துக்கள் வர்ணிக்கின்றன.

உருவமில்லாத, அருவமான இயல்புடன், அனைத்து அனுபவங்களுக்கும் சாட்சியாக
இருக்கும் ஆத்மனுக்குள்ளே தோன்றுவதுதான் இந்த உடல், உள்ளம், உலகம் எல்லாம். ஆத்மன் ஒன்றே நிரந்தரம், மற்ற அனைத்தும் தோன்றி மறைபவை.

ஆத்ம ஸ்வரூபமே நம் உண்மை இயல்பு

அதனால்தான் அனுபவங்கள் அனைத்தும் ஆத்மனுக்குள் தோன்றும் தோற்றங்கள், அவை நிரந்தரமானவை அல்ல என்றனர் நம் முன்னோர்கள்.

புத்தியைப் பயன்படுத்தி இந்த அனுபவங்கள் வாயிலாக விசாரணை மேற்கொள்ளும்போது, நம் அறியாமை விலகுகிறது.

அப்போது அனைத்து அனுபவங்களையும் நமக்கு உணர்த்தும் ஸ்வப்ரகாசமாக சதா ஒளிர்ந்து கொண்டிருக்கும் ஆத்ம ஸ்வரூபமேதான் நம் உண்மை இயல்பு என்பது புரியும்.

அப்போது நம் அனுபவங்கள் அனைத்தும் நிஜம் அல்ல என்கிற உண்மை புரியும். உடல் உள்ளம் சேர்ந்த கலவையே தோற்றமாகும்போது அவைகளால் உணரப்படும்
அனுபவங்களும் தோற்றங்களாகும் அல்லவா?

ஆன்மீகப் பயணம்

அறியாமை அகலும்போது உண்மை என்று நினைத்து ‘நாம்’ மேற்கொள்ளும் அனைத்து சோகங்கள், துக்கங்கள், கஷ்டங்கள், கவலைகள் எல்லாம் மறைந்து போகாதா?

இந்த உலகமும், வாழ்க்கையும் தோற்றங்கள் என்று ஏற்றுக்கொள்ளும்போது, ஒரு திரைபடத்தை ரசிப்பதுபோல ரசித்து சந்தோஷமாக இருப்பதே ஆன்மீகப் பயணம்.

ப்ரஹதாரண்யக உபநிஷத் இதை அழகாகக் குறிப்பிடுகிறது. ‘ஆத்மானம் சேத்விஜானியாத், அயம் அஸ்மி இதி புருஷஹ கிம் இச்சன் கஸ்ய காமய, சரீரம் அனு ஸஞ்ஜ்வரேத்’

இதுநாள் வரை இந்த உடலே ‘தான்’, உள்ளமே ‘தான்’, அல்லது இரண்டும் சேர்ந்த கலவையேதான் ‘தான்’ என்று கற்பனை செய்துக் கொண்டவன்.

அதனால் இந்த உடல் உள்ளம் கலந்த கலவை வழியே அனுபவிக்கும் அனைத்து அனுபவங்களுக்கும் தானேதான் பொறுப்பு என்று அல்லல் பட்டுக்கொண்டிருக்கும் மானிடன்.

எப்போது தான் உடல், உள்ள சேர்ந்த கலவை அல்ல, அதையும் தாண்டி இந்த அனுபவங்களுக்கும் அடிப்படையான, சதா ஒளிர்ந்துகொண்டிருக்கும் ஆத்மன் என்பதை
உணரும்போது, யாருக்காக இந்த உலக அனுபவங்களையோ அல்லது அனைத்து வகையான இச்சைகளையோ நாடி அதன் வழியாக சரீரம் தரும் துக்கம் என்கிற ஜ்வரத்தை அனுபவிக்கப் போகிறான்? என்று உண்மையின் தன்மையை விளக்குகிறது இந்த உபநிஷத்து.

இதுதான் நாம் தேடி அலையும் ‘உண்மை’. நாமேதான் அந்த உண்மை! இது ஒன்றேதான் நிதர்சனம்.

மற்றவை எல்லாம் இந்த உண்மையில் தோன்றி மறையும் தோற்றங்கள். ரிக் வேதம் இதையே ‘ஏகம் ஸத்’ என்கிறது. இந்த உண்மையை உலகிற்கு உணர்த்தவே உருவாகி உள்ளது சென்னப்பமலையும் அங்கே அருவமாக ஐக்யம் கொண்டுள்ள ப்ரம்மகுருவும்.

உபநிஷத்துக்கள் என்றால் என்ன?

பல நூற்றாண்டுகளாக ஆன்மிக வழிகாட்டுதல்களை மனிதனுக்கு அளித்து இயற்கையின் மீதான அவனுடைய வெற்றியை உறுதிப்படுத்தி பாதுகாப்பவைத்தான் உபநிஷத்துக்கள்.
இவை ரிஷிகளால் வெறும் தத்துவ ஆராய்ச்சிகளில் கிடைத்தவை அல்ல. மாறாக உள்ளுணர்வில் ஆழ்ந்த இறை வழிபாட்டின் மூலம் பெற்றவை.

உபநிஷத்துக்களின் தாக்கம் இந்தியா தவிர வேறு நாடுகளில் உண்டா?

உண்டு. ஜப்பான், சீனா, கொரியா, மத்திய ஆசிய நாடுகள் பலவற்றிலும் உபநிஷத்துக்களின் தாக்கம் அந்தந்த நாடுகளின் சமய, சமுதாய வாழ்க்கையில் பிரதிபலிக்கின்றன.

உபநிஷத்துக்களுக்கு உயர்ந்த இடத்தை எந்த சமயம் கொடுத்திருக்கிறது?

உபநிஷத்துக்களுக்கு எல்லாவற்றையும் விட உயர்ந்த இடத்தை அளித்திருப்பது இந்து சமய பாரம்பரியமே.

உபநிஷதம் என்பது பொருள் என்ன?

ஸத் என்ற வார்த்தையில் இருந்து தோன்றியது உபநிஷத். ஸத் பல பொருள்களைக் கொண்டது. தளர்த்துதல், செல்லுதல், அழித்தல், என நிலையற்ற சம்சார வாழ்க்கையில் இருந்து நம்மை தளர்த்தி, தெய்வீக ஞானமாகிய உபநிடதம், நம்முடைய உண்மை இயல்பை மறைக்கும் அறியாமையை அழித்து இறைவன் என்ற பரம்பொருளை நோக்கி அழைத்துச் செல்கிறது.
இந்த ஞானத்தை கற்றுத் தரும் நூல்களும், சாஸ்திரங்களும்தான் உபநிஷத்துக்கள் என்று நாம் அழைக்கிறோம்.

தில்லி மதுபான முறைகேடு வழக்கு ஏன்?

ஏழை சிறுவனும் நேர்மை தந்த பரிசும்

நேர்மை ஏழைச் சிறுவனுக்கு தந்த மாபெரும் பரிசு

Posted on September 18, 2024 by மயூரன்

பிறப்பு எத்தகையதாக இருந்தாலும், ஒருவன் உண்மையை கடைப்பிடித்தால் அவன் வாழ்வில வெற்றியாளனாக வலம் வருவான் என்பதை “ஏழைச் சிறுவனும் நேர்மை தந்த பரிசும்” கதை எடுத்துச் சொல்கிறது.

உள்ளடக்கம்

ஏழை சிறுவன்

அவனுடைய பெயர் வாசு. ஏழ்மையான குடும்பத்தைச் சேர்ந்தவன். அவன் குழந்தையாக இருந்தபோதே தந்தை இறந்து விட்டார்.

கூவம் ஆற்றங்கரையோரம் ஒரு குடிசைப் போட்டு வசித்து வந்த அவனுடைய தாய் ரேவதி, மகனை படிக்க வைக்க ஆசைப்பட்டாள்.

ஒருசில அடுக்குமாடிக் குடியிருப்புகளுக்கு அதிகாலையிலேயே சென்று வாசல் பெருக்கி, கோலமிட்டு கிடைக்கும் பணத்தைக் கொண்டு மகனை பள்ளியில் சேர்த்து படிக்க வைக்கத் தொடங்கினாள்.

சிறுவன் வாசு, 5-ஆம் வகுப்பை தொட்டபோது, ரேவதிக்கு ஏற்பட்ட திடீர் காய்ச்சல் அவளை படுத்த படுக்கையாக்கியது. விவரம் அறியாத சிறுவன் வாசுவுக்கு என்ன செய்வது என்று தெரியவில்லை.

இறந்துபோன தாய்

ஒரு நாள் இரவு அவள் திடீரென இறந்து போனாள். தாய் இறந்ததுகூட தெரியாமல் காலை வரை அவளை கட்டிப்பிடித்து உறங்கிய அவன், மறுநாள் காலை அவளுடைய கண்கள் திறந்தபடியே இருப்பதைக் கண்டு பயந்து போனான்.

தாயை எத்தனையோ முறை தட்டி எழுப்பியும் அவள் எழுந்திருக்கவில்லை. அருகில் இருந்த வீடுகளைச் சேர்ந்தவர்களிடம் அவன் ஓடிப்போய் சொன்னபோது அவர்கள் வந்து பார்த்துவிட்டு, உன் தாய் இறந்து பல மணி நேரம் ஆகிவிட்டது என்றபோது அவனுக்கு கண்கள் இருண்டு போனது.

அவள்தான் அவனுடைய உலகமாக இருந்தாள். ஆதரவற்ற நிலையில் விடப்பட்ட அவனுடைய பள்ளிப் படிப்பு கனவாக மாறிப்போனது.

ஆதரவு கரம் நீட்டிய மற்றொரு தாய்

அருகில் இருந்த குடிசையில் வசித்து வந்த பார்வதி அம்மாள், நீயும் என் பிள்ளைதான் என்று பாசம் காட்டி சில நாள்களாக உணவு கொடுத்து வந்தார்.

அவரும் ஆதரவற்றவர்தான். அவளுடைய மகன் செந்தாமரை வாசுவின் வயதை ஒத்தவன்தான். அவனுடைய பள்ளிப் படிப்பு நிறைவேறாமல் போனது. அதனால் அவன் குப்பைகளில் கிடக்கும் பொருள்களை சேகரிக்கும் வேலைக்கு சென்று கொண்டிருந்தான்.

ஒரு நாள் அந்த கூவத்தின் ஓரம் கட்டப்பட்டிருந்த குடிசைகளை மாநகராட்சி அகற்றியது. அதில் வாசுவின் குடிசையும் காணாமல் போனது.

குடிசைவாசிகளுக்கு ஏதோ ஒரு இடம் தரப்போவதாகச் சொன்னபோது, எல்லோரும் புதிய இடத்தை நோக்கி புறப்பட்டார்கள்.

தனித்து நின்ற சிறுவன்

பார்வதி அம்மாவும் புறப்பட்டாள். பலமுறை அவள் வாசுவை தன்னோடு வருமாறு அழைத்தும் அவளோடு வர மறுத்துவிட்டான். தாய் இருந்த இடத்தை விட்டு செல்வதற்கு அவனுக்கு மனமில்லாமல் தவித்தான்.

இதனால் அவனை பிரிய மனமில்லாதவளாக வேறு வழியின்றி தன் மகன் செந்தாமரையுடன் பார்வதி அம்மாள் புறப்பட்டு போய்விட்டாள்.

பார்வதி அம்மாள் உணவளித்து வந்த வரை அதைப் பற்றி சிந்திக்காமல் இருந்து விட்டோமே. இப்போது நானே உழைத்து சம்பாதித்தால்தான் உணவு சாப்பிட முடியும் என்பதை அப்போதுதான் வாசு உணர்ந்தான்.

அவன் பல இடங்களில் வேலைக் கேட்டு சென்றபோது, சிறுவனாக இருக்கும் அவனுக்கு யாரும் வேலை தர முன்வரவில்லை. இரண்டு நாள் பட்டினி கிடந்த அவன், சாலையோரத்தில் படுத்துறங்கினான்.

பிழைக்க வழி தெரிந்தது

அதிகாலை நேரத்தில் நாய்கள் குலைக்கும் சத்தத்தில் எழுந்த அவன், எதிரில் ஒரு குப்பைத் தொட்டியில் முதியவர் ஒருவர் குப்பைகளை கிளறி, பிளாஸ்டிக் பாட்டிகளை சேகரித்து சாக்குப் பையில் போடுவதைப் பார்த்தான்.

உழைப்பதற்கு தயாராக காத்திருந்த அவனுக்கு இப்போது கண் முன்னே ஒரு வேலை இருப்பதைப் பார்த்ததும் சந்தோஷம் தாளவில்லை.

முதியவரை பார்த்து, இனி நான் உங்களுக்கு உதவிக்கு வருகிறேன். கிடைக்கும் பணத்தில் எனக்கு 3 வேளை சாப்பாடு போட்டால் போதும் என்றான் வாசு. தனி ஆளாக தவித்த அந்த முதியவரும், அவனை தன்னுடைய வேலைக்கு அவனை துணையாக சேர்த்துக் கொண்டார்.

ஒரு சில ஆண்டுகள் கடந்த நிலையில், முதியவரும் இறந்து போனார். அவர் சாலையோரம் குடிசைப் போட்டு வசித்து வந்த இடம் இப்போது வாசுவுக்கு சொந்தமானதாக மாறியது.

நேர்மைக்கு கிடைத்த பரிசு

தனி ஆளாக குப்பைகளில் உள்ள பொருள்களை சேகரித்து பணம் ஈட்டத் தொடங்கிய வாசு, தன்னுடைய தாய் “நேர்மை தவறாதே. உழைப்புதான் உன்னை உயர்வடையச் செய்யும். படித்து பெரியவனாகி நீ 4 பேருக்கு வேலை கொடு” என்று சொல்வதை அடிக்கடி நினைத்துக் கொள்வான்.

சில ஆண்டுகள் இப்படியே உருண்டோடியது. 21 வயதைக் கடந்த அவன் இப்போது ஒரு வங்கியில் சேமிப்புக் கணக்கு தொடங்கியிருந்தான். சாப்பாடுக்கு போக மீதமிருந்த தொகையை தொடர்ந்து சேமிக்கத் தொடங்கினான்.

ஒரு நாள் அவனுடைய வங்கிக் கணக்கில் யாரோ 10 லட்சம் ரூபாய் போட்டிருந்தார்கள். நேர்மையாக வாழ வேண்டும் என்று தாய் சொன்னது அப்போது அவனுக்கு ஞாபகம் வந்துவிடவே, அந்த பணத்தின் மீது அவனுக்கு ஆசை ஏற்படவில்லை.

உடனடியாக அவன் வங்கி மேலாளரை சந்தித்து விவரத்தைச் சொன்னபோது, வங்கி மேலாளர் அவனுடைய நேர்மையைக் கண்டு வியந்து போனார்.

குப்பைகளில் வீசப்படும் பிளாஸ்டிக் பாட்டிகளையும், அட்டைப் பெட்டிகளையும் பொறுக்கி வாழும் உன்னிடம் இந்த நேர்மையை நான் எதிர்பார்க்கவில்லை என்று பாராட்டினார்.

உடனடியாக தவறாக போடப்பட்ட பணத்தை, திருப்பி அந்த பணத்துக்கு உரியவரிடமே தகவல் அளித்து மாற்றியபோது, அந்த நபர் வாசுவிடம் செல்போனில் பேச விரும்பினார்..

வாசுவும் அவரிடம் சிறிது தயக்கத்தோடு பேசினான். அப்போது அந்த எதிர் முனையில் இருந்தவர், நான் ஒரு வைர வியாபாரி. எனக்கு இந்த 10 லட்சம் ரூபாய் வேறு கணக்குக்கு தவறாக போவதால் பெரிய இழப்பை ஒன்றும் சந்தித்திருக்க மாட்டேன்.

ஆனால் தவறாக ஒரு பெரிய தொகை உன் வங்கிக் கணக்குக்கு வந்தபோது கொஞ்சம் கூட சபலமின்றி நீ செயல்பட்டது எனக்கு வியப்பாக இருக்கிறது. உன்னே போன்ற ஒரு நேர்மையாளனைத்தான் இதுவரை தேடிக் கொண்டிருந்தேன்.

நீ என்னிடம் வந்துவிடு. நான் உனக்கு வேலை தருகிறேன் என்று சொன்னபோது வாசுக்கு பதில் சொல்லத் தெரியவில்லை.

வங்கி மேலாளர் அந்த வைர வியாபாரியிடம் பேசும்போது, இந்தப் பையன் அதிகம் படிக்காதவன் என்றபோது, எனக்கு படிப்பு தேவையில்லை. திறமையும், உண்மையும்தான் தேவை. அதனால் உடனே அவனை என்னிடம் அனுப்பி வையுங்கள் சென்று சொல்லிவிட்டார்.

வேலையில் சேர்ந்த வாசு

வங்கி மேலாளரின் வற்புறுத்தலை அடுத்து அவன் அந்த வைர வியாபாரியிடம் சென்றடைந்தான்.

அது முதல் அவனுடைய வாழ்க்கை தலைக்கீழாக மாறிப்போனது. வைர வியாபாரத்தின் அனைத்து நுணுக்கங்களையும் அந்த வியாபாரி வாசுக்கு கற்றுத் தந்து தன்னுடைய நம்பிக்கைக்கு உரியவனாக தன்னிடம் வைத்துக் கொண்டார்.

வருமானத்தில் ஒரு பகுதியை அவனுடைய வங்கிக் கணக்கில் போடத் தொடங்கினார். இப்போது வாசு நகரின் முக்கியப் பகுதியில் ஒரு மாடி வீட்டுக்கு சொந்தக்காரனாக மாறிப்போனான்.

நகரில் முதலாளிக்கு சொந்தமான கிளையை கவனித்துக்கொள்ளும் பொறுப்பாளனாக மாறினான். முதலாளி, அவனுக்கு ஒரு பெண்ணை பார்த்து திருமணம் செய்தும் வைத்தார்.

நன்றி மறவாத வாசு

ஒரு நாள் அவன் தன்னுடைய கடை வாசலில் யாரோ ஒரு குப்பை பொறுக்கும் தொழிலாளி தயங்கி நிற்பதைப் பார்த்த அவன், உடனடியாக அந்த இளைஞனை உள்ளே அழைத்து வந்து அமர வைத்தான்.

அந்த இளைஞன் வேறு யாருமல்ல. பார்வதி அம்மாவின் மகன் செந்தாமரை என்பதை முகசாயலில் இருந்து தெரிந்துகொண்டுதான் அவனை உள்ளே அழைத்து வந்தான்.

பார்வதி அம்மா எப்படி இருக்கிறார்கள் என்பதையும், பல இடங்களில் உன்னையும், பார்வதி அம்மாவையும் தேடியும் பார்க்க முடியாமல் போய்விட்டது. இப்போதாவது உன்னை பார்க்க முடிந்தது என்று பழைய பாசத்தோடு அவனுடைய கைகளை பிடித்து தடவினான் வாசு.

பார்வதி அம்மா உடல்நிலை சரியில்லாமல் இருப்பதாகவும், அவளுக்கு மருந்து வாங்கக் கூட காசு இல்லை. நான் ஒரு நாள் குப்பையில் இருந்து இந்த கல்லை எடுத்தேன். அது விலை உயர்ந்த கல்லாக இருக்கும் என்று நான் சேகரித்த பொருள்களைக் கொடுத்து வரும் கடைக்காரர் சொன்னார்.

அதனால் அதை வீட்டில் எடுத்து வைத்திருந்தேன். அம்மாவுக்கு சில நாள்களாகவே உடம்பு சரியில்லை. இன்றைக்கு அம்மாவுக்கு மருந்து வாங்கக் கூட பணம் இல்லாமல் போனதால் இந்த கல்லை உங்கள் கடைக்கு அருகில் உள்ள கடைக்கு வந்து காட்டினேன்.

அவர் இது சாதாரணக் கல்தான். வேண்டுமானால் 50 ரூபாய் தருகிறேன் என்றார். எனக்கு மருந்து வாங்க 100 ரூபாய் தேவைப்பட்டது. அதனால் தயக்கத்தோடு அவரிடம் இருந்து கல்லை வாங்கிக் கொண்டு அடுத்தக் கடையாக இருக்கும் உன் கடை வாசலில் வந்து நின்றேன்.

நீ இங்கிருப்பாய் என்று நான் எதிர்பார்க்கவில்லை என்று சோகத்தோடு சொன்னான் செந்தாமரை.

கவலைப்படாதே… இப்போதே அம்மாவை மருத்துவமனையில் சேர்த்து நல்ல சிகிச்சை அளித்து குணப்படுத்துவோம் என்று அவனை அழைத்துக் கொண்டு அவன் இடத்துக்கு புறப்பட்டான்.

பார்வதி அம்மா குணடைந்ததும் தன் வீட்டுக்கு அழைத்து வந்தான். செந்தாமரையை அழைத்து ஒரு நாள் விலை உயர்ந்த கல்லாக இருக்கும் என்று சந்தேகப்பட்டு என்னிடம் கொண்டு வந்து தந்தாயே… அது உண்மையில் விலை உயர்ந்த நீலக்கல்.

அதை பட்டை தீட்டி விலை மதிப்பை செய்தபோது, இந்தியாவில் உள்ள பெரிய கற்களில் இது ஒன்றாக இருக்கும் என்று மதிப்பிடப்பட்டிருக்கிறது. அதன் மதிப்பு இன்றைக்கு குறைந்தபட்சம் 5 கோடி ரூபாய் இருக்கும்.

அதை என் முதலாளியிடம் கொடுத்து பணத்தை உனக்குத் தர ஏற்பாடு செய்திருக்கிறேன். இனி நீ அந்த பணத்தில் சொந்தமாக ஒரு தொழிலை தொடங்கிவிட்டு அம்மாவை அழைத்துச் செல் என்றான் வாசு.

அர்த்தமுள்ள வாழ்க்கை இதுதான்!

மனைவியை அடக்குவது எப்படி?

அர்த்தமுள்ள வாழ்க்கை இதுதான்!

Posted on September 16, 2024 by mithiran

நம்மில் பலரும் வாழ்க்கை என்பது என்ன என்பதைத் தெரியாமலேயே, காழ்ப்புணர்வு, போட்டி, பொறாமை, வஞ்சம் தீர்த்தல் என வாழ்நாளை வீணடிப்பதோடு, நம் மனதையும் ஆரோக்கியமாக வைத்திருக்க தவறிவிடுகிறோம் என்பதைத் தான் இந்த அர்த்தமுள்ள வாழ்க்கை இதுதான் கதை சொல்கிறது.

உள்ளடக்கம்

யோகேஷும் அவனது குடும்பமும்

ஒரு ஊரில் கார் டிரைவராக இருந்து வந்தவன் யோகேஷ். அவனுக்கு குடிப்பழக்கம் இருந்தது. அதனால் அவனுடைய நடவடிக்கைகள் பிடிக்காமல் மனைவி பிரிந்து சென்றுவிட்டாள்.

அதனால் தன்னுடைய 10 வயது மகன் சித்தார்த்துடன், யோகேஷ் வசிக்கத் தொடங்கினான். அவனுடைய வயதான தந்தை தாண்டவன், அவனுடைய பராமரிப்பில் இருந்து வந்தார். தாயார் அவனுடைய சிறுவயதிலேயே இறந்துவிட்டார்.

தாண்டவனும், அவரது மனைவியும் ஏழ்மையில் இருந்தபோது யோகேஷ் பிறந்தான். அதனால் படிப்பில் ஆர்வம் செலுத்திய யோகேஷை தாண்டவனால் உயர்கல்வி படிக்க வைக்க முடியாமல் போனது.

போதைக்குறைக்கு அவனுடைய தாயாருக்கு ஏற்பட்ட நோயை குணப்படுத்த போதிய வருவாய் இல்லாமல் போனதால் அவளும் இறந்துபோனாள்.

இதனால் தந்தை தாண்டவன் மீது யோகேஷ் மிகுந்த கோபம் கொண்டிருந்தான். தந்தையிடம் அவன் எப்போதும் பேசுவதில்லை. மற்றவர்கள் நம்மை குறைக் கூடாது என்பதற்காக வயதான தந்தையை தன்னுடைய பாதுகாப்பில் வைத்திருந்தான்.

கார் டிரைவராக தன்னுடைய வாழ்க்கையின் அடித்தளத்தை அமைக்க முயற்சித்த அவனை ஒரு கல்லூரி படிப்பை முடித்த பெண் விரும்பி திருமணம் செய்துகொண்டாள். அவர்களின் ஒரே மகன்தான் சித்தார்த்.

குடிபழக்கத்தில் சிக்கிய யோகேஷ்

நண்பர்கள் சேர்க்கை காரணமாக அவனுக்கு குடிபழக்கம் தொற்றிக்கொண்டது. பலமுறை கண்டித்து பார்த்த மனைவி ஒரு கட்டத்தில் அவனை விட்டு பிரிந்து சென்றுவிட்டாள்.

மனைவி பிரிந்து சென்ற பிறகு தன்னுடைய ஒரே மகனை நல்லவிதமாக படிக்க வைக்க யோகேஷ் விரும்பினான். அதனால் அவனுடைய படிப்பில் யோகேஷ் கவனம் செலுத்தினான்.

மனைவி அவனுடன் இருக்கும் வரை அவனுடைய தந்தை தாண்டவனை நல்ல முறையில் கவனித்து வந்தாள். ஆனால் அவள் பிரிவுக்கு பிறகு தந்தையை அவன் கண்டுகொள்ளவில்லை.

தந்தையிடம் கோபம்

ஒரு நாள் தந்தைக்கு உடல்நிலை சரியில்லாமல் இரவில் இருமிக் கொண்டிருந்தபோது, தன்னுடைய உறக்கம் கெட்டுப்போனதால், ஆத்திரமடைந்த யோகேஷ், இனி வீட்டுக்குள் இருக்க வேண்டாம். திண்ணையில்தான் இனி உறங்க வேண்டும் என்று கடுமையாக சொல்லிவிட்டான்.

இதனால் அவனுடைய தந்தை தாண்டவனும் அவனிடம் எதுவும் பேசாமல் திண்ணைவாசியாக மாறிப் போனார். அவருக்கு 2 வேளை உணவு மட்டுமே யோகேஷ் அளித்து வந்தான். அதற்காக ஒரு பீங்கான் தட்டை அந்த திண்ணையில் வைத்திருந்தான்.

காலையில் அவன் தன்னுடைய மகனை பள்ளிக்கு அனுப்பிவிட்டு, தந்தைக்கு அந்த தட்டில் உணவை வைத்து விட்டு வேலைக்கு புறப்பட்டுச் செல்வான்.

மாலையில் தன்னுடைய பணிக்கிடையே மகனை வீட்டுக்கு அழைத்து வந்துவிட்டு மீண்டும் கார் சவாரிக்கு செல்வதையும் வழக்கத்தில் வைத்திருந்தான்.

யோகேஷ், தன்னுடைய மகனை தன்னுடைய தந்தையிடம் பேசக் கூடாது என்றும் கட்டளையிட்டிருந்தான்.

ஆனால் யோகேஷ் வீட்டில் இல்லாத மாலை நேரத்தில் தன்னுடைய தாத்தா தாண்டவனுடன், பேசி விளையாடுவதை வழக்கமாக வைத்திருந்தான் சித்தார்த்.

உடைந்துபோன பீங்கான் தட்டு

தாத்தாவிடம் ஒரு நாள் பேரன் பேசிக்கொண்டிருந்தபோது, “உன்னுடன் ஏன் அப்பா பேசுவதில்லை. திண்ணையில் உட்கார வைத்திருக்கிறது. தனித் தட்டில் சாப்பாடு போடுகிறது” என்று கேள்வி மேல் கேள்வி எழுப்பினான்.

நான் மிகுந்த வறுமை நிலையில் இருந்ததால், உன் தந்தை விரும்பிய படிப்பை என்னால் படிக்க வைக்க முடியவில்லை. உன் பாட்டியையும் என்னால் காப்பாற்ற முடியவில்லை. காரணம் எனக்கு படிப்பறிவு இல்லை.

உன் தந்தை பள்ளிப்படிப்பை முடித்துவிட்டு, தன்னுடைய சொந்த உழைப்பில் இப்போது முன்னேறி வருகிறான்.

தான் படிக்க முடியாத படிப்பை தன் படிக்க வேண்டும் என்ற விருப்பம்தான் உன் மீது அவன் காட்டும் அதிக அக்கறை. அதை நன்றாக பயன்படுத்தி உயர்ந்த படிப்பு படித்து அவனுடைய கனவை நனவாக்கு என்று சொன்னார்.

சரி… தாத்தா… அப்பா வரும் நேரமாகிவிட்டது என்று அவசரமாக எழுந்த சிறுவன், தாத்தா சாப்பிடுவதற்காக வைத்திருந்த பீங்கான் தட்டின் மீது கால் பட்டு திண்ணையில் இருந்து கீழே விழுந்து உடைந்துவிட்டது.

இதைக் கண்ட சிறுவன் தாத்தா பதறிப்போய்… தாத்தா… தட்டு உடைந்து போய்விட்டதே… அப்பா வந்து கேட்டால் என்ன சொல்வது? என்று கேட்டான்.

கவலைப்படாதே. நீ உள்ளே போ.. நான் பார்த்துக் கொள்கிறேன் என்று சொல்லி சிதறிப்போன பீங்கான் துண்டுகளை எடுத்துக் கொண்டிருந்தார்.

தூக்கமின்றி தவித்த சிறுவன்

அப்போது வீட்டுக்கு வந்த யோகேஷ், அவரை தாண்டி கோபமாக உள்ளே சென்றான். அன்று இரவு அவருக்கு அவன் சாப்பாடு அளிக்கவில்லை.

இதைக் கண்ட சிறுவன், அப்பாவிடம், ஏன் இன்றைக்கு தாத்தாவுக்கு சாப்பாடு வைக்கவில்லை? அவர் பசியாக இருப்பாரே? என்று கேட்டான்.

தன்னுடைய சாப்பாடு தட்டைக் கூட பொறுப்பாக வைத்திருக்க தெரியாத அவருக்கு இதுதான் தண்டனை.

இன்றைய இரவுக்கு அவருக்கு சாப்பாடு கிடையாது. நாளைக்கு அவருக்கு வேறு ஒரு தட்டு வாங்கி வந்த பிறகுதான் சாப்பாடு என்று சொல்லிவிட்டு தூங்கச் சென்றுவிட்டான்.

தான் தட்டை தட்டிவிட்டதால் உடைந்து போனதை, அப்பாவிடம் சொல்ல முடியாத நிலை ஒருபுறம், தாத்தாவோ என்னுடைய தவறால் இரவு சாப்பாட்டை சாப்பிட முடியாமல் பசியால் துடிக்கும் நிலை ஏற்பட்டு விட்டதே என்ற வேதனை ஒருபுறம் என சிறுவன் சித்தார்த்துக்கு தூக்கம் வராமல் நீண்டநேரம் படுக்கையில் புரண்டு படுத்தப்படியே இருந்தான்.

யோகேஷ், தன்னுடைய மகன் உறங்காமல் தவிப்பதைப் பார்த்து என்னடா… ஆச்சு பள்ளிக்கூடத்தில் ஏதாவது பிரச்னையா? என்று கேட்டான்.

அதெல்லாம் இல்லை அப்பா.. என்று கண் மூடியபடியே பதில் அளித்த அவன் சிறிது நேரத்தில் உறங்கிப் போனான்.

காலையில் எழுந்த அவன், தன்னுடைய தந்தைக்கு, அவர் செய்யும் தவறை உணர்த்த வேண்டும் என்ற முடிவை எடுத்தான்.

தந்தைக்கு தவறை புரிய வைத்த சிறுவன்

மறுநாள் காலை வழக்கம்போல் பள்ளிக்கு புறப்பட்ட அவன், தந்தை யோகேஷ் அவ்வப்போது தரும் சில்லரை காசுகளை சேர்த்து வைக்கும் மண் உண்டியலை உடைத்து அதில் இருந்த காசுகளை எடுத்துக் கொண்டு சென்றான்.

தந்தையிடம் மாலையில் நானே என் நண்பனோடு வீடு திரும்பிவிடுவேன். அதனால் இன்று மாலை என்னை அழைக்க வர வேண்டாம் என்றும் சொல்லிச் சென்றான் சித்தார்த்.

மாலையில் வீடு திரும்பிய சித்தார்த், வரும் வழியில் பாத்திரக் கடை ஒன்றில் இரண்டு அலுமினியத் தட்டுக்களை வாங்கி எடுத்து வந்தான். அதை தன் தந்தை கண்ணில் படும்படி மேஜையில் வைத்தான்.

இரவு வழக்கம்போல் வீடு திரும்பிய யோகேஷ், மேஜையில் இரண்டு புதிய அலுமினியத் தட்டுக்களைப் பார்த்துவிட்டு, இது யார் கொடுத்தது? என்று கேட்டான்.

சித்தார்த் இப்போது பேசத் தொடங்கினான். தாத்தாவின் பீங்கான் தட்டு கீழே விழுந்து உடைந்து போய்விட்டது அல்லவா? அதனால்தான் உண்டியலில் சேர்த்து வைத்திருந்த காசுகளை கொடுத்து இந்த தட்டுகளை வாங்கி வந்தேன் அப்பா என்றான்.

சரி… ஒரு அலுமினியத் தட்டு போதாதா? எதற்கு இரண்டு தட்டுக்கள் என்றான் யோகேஷ்.

அப்பா… இன்னொரு தட்டு உனக்காக வாங்கியது. அதை நீ பத்திரமாக எடுத்து வைத்துக்கொள் என்றான் சிறுவன் எந்த சலனமும் இல்லாமல்.

என்னடா பேசறே… எனக்கும், உனக்கும்தான் எவர்சில்வர் தட்டுக்கள் இருக்கிறதே… பிறகு எதற்கு இந்த தட்டு என்றான் யோகேஷ்.

அப்பா… இப்போது நீ சம்பாதிக்கிறாய். அதனால் எவர்சில்வர் தட்டில் சாப்பிடுகிறாய்.

நான் உன்னைப் போல் பெரியவனாகி சம்பாதிக்கத் தொடங்கியதும், வயதான உன்னை நான்தான் பார்த்துக் கொள்ள வேண்டும்.

அப்போது நீ தாத்தாவை கவனித்துக்கொள்வதுபோல் நானும் திண்ணையில் இடம் தந்து, சாப்பாடு போட்டு கவனித்துக் கொள்ள வேண்டாமா? அதற்காகத்தான் இந்த தட்டு என்றான் சிறுவன்.

மகனின் பதிலைக் கேட்டு உறைந்து போனான் யோகேஷ். மகனை கட்டித் தழுவி அதுநாள் தான் அடக்கி வைத்திருந்த அழுகையை கட்டவிழ்த்து விட்டான் யோகேஷ். இதுநாள் வரை ஒரு அர்த்தமற்ற வாழ்க்கை வாழ்ந்ததை உணர்ந்தான்.

மன்னிப்பு கேட்ட யோகேஷ்

சித்தார்த் நீ சிறியவனாக இருந்தாலும், என் தந்தையை எப்படி நடத்த வேண்டும் என்று தெரியாமல் நான் செய்த தவறை இந்த அலுமினியத் தட்டின் மூலம் புரிய வைத்துவிட்டாய்.

முதல் காலையில் சாப்பிட்ட தந்தை மறுநாள் இரவு வரை அவருக்கு சாப்பாடு போடாமல் இருந்தபோதும், எதையும் வெளிக்காட்டிக் கொள்ளாமல், போர்வையை போர்த்திக் கொண்டு உறங்கிக் கொண்டிருப்பதைக் கண்ட யோகேஷுக்கு பெரிய தவறு செய்துவிட்டோமே என்ற உறுத்தல் ஏற்பட்டது.

தூங்கிக் கொண்டிருந்த தந்தையின் கால்களைப் பிடித்து என்னை மன்னித்துவிடுங்கள் அப்பா என்று அழுத அவனை, விழித்துக்கொண்ட தந்தை வாரி அணைத்துக் கொண்டபோதுதான் அந்த பாசத்தின் ஆழம் அவனுக்கு புரிந்தது.

தொடங்கியது அர்த்தமுள்ள வாழ்க்கை

தந்தைக்கு வீட்டில் பயன்படுத்தாமல் இருந்த அறையை சுத்தம் செய்து அவருக்கு ஒதுக்கியதோடு, அவருடைய உடல் நலனிலும், உணவு விஷயத்திலும் அக்கறைக் காட்டத் தொடங்கினான் யோகேஷ்.

அவனுடைய நடவடிக்கைகளில் மாற்றம் ஏற்படத் தொடங்கியது. தன்னுடைய குடிபழக்கத்தை கைவிட்டான். தன்னை விட்டு பிரிந்து சென்ற மனைவியை சமாதானம் செய்து வீட்டுக்கு அழைத்து வந்தான்.

இப்போதெல்லாம், மாலை நேரத்தில் வீட்டுக்கு வரும்போது, சித்தார்த், தன்னுடைய தாத்தாவுடனும், அம்மாவுடனும் பேசியும், சிரித்தும், விளையாடியும் மகிழ்ந்து வீட்டையை கலகலப்பாக்குவதே பார்த்து மனதுக்குள் சந்தோஷப்படுவது யோகேஷுக்கு வழக்கமானதாகி விட்டது.

ஒரு அர்த்தமில்லாத வாழ்க்கையை இதுநாள் வரை வாழ்ந்திருக்கிறோமே… அதை நம் மகன் அர்த்தமுள்ள வாழ்க்கையாக மாற்றியிருக்கிறானே என்று மனதுக்குள் நினைத்து சித்தார்த்தை இறுகக் கட்டிப்பிடித்து உச்சந்தலையில் முத்தமிடுவதும் யோகேஷுக்கு வாடிக்கையான ஒன்றாக மாறி விட்டது.

மன்னிக்கும் குணமே சிறந்தது!

சோற்றுக்கு இத்தனை பேரா?

ஹேமா கமிட்டி அறிக்கை: அரசுக்கு கேரள உயர்நீதிமன்றம் கேள்வி

Posted on September 12, 2024 by RR

சென்னை: மலையாள திரையுலகத்தை அதிர்ச்சியில் ஆழ்த்தியுள்ள ஹேமா கமிட்டி அறிக்கை தொடர்பாக அரசு எடுத்த நடவடிக்கைகள் என்ன என்ற கேள்வியை கேரள உயர்நீதிமன்றம் எழுப்பியிருக்கிறது.

அத்துடன் கேரள அரசின் செயலற்ற தன்மையையும் விமர்சித்திருக்கிறது.

திரைப்படத் துறை

மலையாள திரையுலகை பேசுபொருளாக ஹேமா கமிட்டி தற்போது மாற்றியிருக்கிறது. இந்த விஷயத்தை பார்ப்பதற்கு முன்பு இந்தியாவில் திரைப்படங்கள் வருகை குறித்த ஒரு சிறிய கண்ணோட்டத்தை தெரிந்துகொள்ளலாம்.

19-ஆம் நூற்றாண்டில் பிரான்ஸ் நாட்டைச் சேர்ந்த சகோதரர்கள் அகஸ்டே மற்றும் லூயிஸ் லூமியர் கண்டுபிடித்ததுதான் இன்றைக்கு நாம் பார்க்கும் திரைப்படங்களுக்கு முன்னோடியான நகரும் படம்.

அவர்கள் கண்டுபிடித்த நகரும் படம் அடுத்த இரண்டு ஆண்டுகளில், இந்தியாவில் அதுவும் சென்னையில் உள்ள விக்டோரியா பப்ளிக் ஹாலில் “சினிமாஸ்கோப்” என்ற பெயரில் ஆங்கிலேயரான எட்வர்டு என்பவர் மக்களுக்கு திரையிட்டு காட்டி அதிசயத்தில் ஆழ்த்தினார்.

தென்னிந்தியாவில் திரைப்படங்கள்

தென்னிந்தியாவிலேயே முதன்முறையாக சென்னையில் அப்போதைய மவுண்ட் தெருவில் (தற்போதைய அண்ணா சாலை) வார்விக் மேஜர் என்பவர் திரையரங்கை கட்டினார்.

இந்த திரையரங்கு மின்மயமாக ஜொலித்ததை அடுத்து அந்த காலத்தில் இதை எலக்ட்ரிக் திரையங்கு என்று மக்கள் அழைத்து வந்தார்கள்.

சினிமாவை பார்ப்பதில் மக்கள் ஆர்வம் காட்டுவதை அறிந்த பலர் சினிமாத் துறையில் அடியெடுத்து வைத்தார்கள். அதைத் தொடர்ந்து சினிமாத் துறையில் முக்கிய இடத்தை சென்னை வகித்தது.

சென்னை சினிமாத் துறையில் வளர்ந்தபோது, மலையாள சினிமாவும் அதனுடன் கைக்கோர்த்து வளர்ந்து வந்தது.

மலையாளத் திரைப்படங்கள்

இருபதாம் நூற்றாண்டின் பிற்பகுதி வரையிலும் கூட மலையாளத் திரைப்பட தயாரிப்புகள் சுறுசுறுப்படையவில்லை.

அதன் பிறகே மலையாளத் திரைப்படத் துறை சுறுசுறுப்படைந்தது. எண்ணற்ற தரமான படங்களை கொடுக்கத் தொடங்கியது.

1960-களில் குறிப்பிடத்தக்க அளவில் நல்ல படங்கள் பல உருவாகின. 1965-இல் வெளியான செம்மீன் சிறந்த திரைப்படத்துக்கான தேசிய விருதைப் பெற்றது.

1970-களில் கேரளாவில் ஃபிலிம் சொசைட்டி இயக்கம் பிரம்மாண்ட வளர்ச்சியைக் கண்டது. அதைத் தொடர்ந்து மலையாள திரைப்பட உலகம் திரைப்பட ஆர்வலர்களை திரும்பிப் பார்க்க வைத்தது.

அது முதல் இன்று வரை எண்ணற்ற சமூகம், காதல், சோசலிச கருத்துக்கள், நகைச் சுவை கலந்த திரைப்படங்களும், சிறந்த நாவல்களை தழுவிய திரைப்படங்களும் உருவாகத் தொடங்கின.

மலையாள திரைப்பட உலகில் கோலோச்சிய பிரபல திரை நட்சத்திரங்கள் பல மொழிகளிலும் கூட ஆதிக்கம் செலுத்தத் தொடங்கினர்.

சிக்கலில் சிக்கிய மலையாளத் திரைப்படத் துறை

2017-ஆம் ஆண்டு பிரபல நடிகை ஒருவரை காரில் பாலியல் துன்புறுத்தலுக்கு பிரபல நடிகர் ஒருவர் ஆளாக்கியதாக குற்றச்சாட்டு எழுந்தது.

இதில், பிரபல நடிகர்களை நிர்வாகிகளாகக் கொண்ட “அம்மா” என்று சுருக்கமாக அழைக்கப்படும் ASSOCIATION OF MALAYALAM MOVIE ARTIST – பாலியல் குற்றச்சாட்டுக்கு ஆளான நடிகர் திலீப்புக்கு ஆதரவாக செயல்பட்டதாக குற்றச்சாட்டு எழுந்தது.

இதனால் அதிருப்தி அடைந்த மலையாள நடிகைகள் பலர் அம்மா சங்கத்தில் இருந்து வெளியேறி 2017 மே மாதத்தில் மலையாள நடிகைகள், பெண் இயக்குநர்கள், தயாரிப்பாளர்கள், தொழில்நுட்ப கலைஞர்களைக் கொண்ட புதிய சங்கத்தை உருவாக்கினார்கள்.

இந்த சங்கத்துக்கு WOMEN IN CINEMA COLLECTIVE என பெயரிடப்பட்டது. இச்சங்கம் பத்திரிகையாளர்களை சந்தித்து திரைத்துறை பெண்கள் பிரச்னைகளுக்காக அரசு ஒரு ஆணையம் அமைத்து விசாரணை நடத்த வேண்டும் என்று கூறினார்கள்.

அதைத் தொடர்ந்து அந்த சங்கத்தினர், முதல்வர் பினராயி விஜயனை சந்தித்து, திரையுலகில் பணிச்சூழல் குறித்த ஆய்வை நடத்த வேண்டும் என்றும் வலியுறுத்தி ஒரு கோரிக்கை மனுவை அளித்தார்கள்.

ஹேமா கமிட்டி

இதையடுத்து உடனடியாக உயர்நீதிமன்றத்தின் முன்னாள் நீதிபதி கே. ஹெமா தலைமையில் நடிகை டி. சாரதா மற்றும் ஓய்வு பெற்ற முதன்மை செயலர் வல்சலகுமாரி ஆகியோர் அடங்கிய ஒரு குழு அமைக்கப்பட்டது.

இக்குழு திரைத் துறை பணிச்சூழல் குறித்து பல்வேறு திரைப்படத் துறையைச் சேர்ந்த நபர்களிடமும் விசாரணை மேற்கொண்டு தகவல்களை திரட்டியது.

நடிகர், நடிகையர் மட்டுமின்றி, ஒளிப்பதிவாளர்கள், ஒப்பனை கலைஞர்கள், ஆடை வடிவமைப்பாளர்கள் என இந்த கமிட்டி திரைத் துறையின் பல்வேறு பிரிவுகளில் உள்ள பலரையும் சந்தித்து உரையாடியது.

பாலியல் அத்துமீறல் தொடர்பான பல ஆதாரங்கள், விடியோக்கள், வாட்ஸ்அப் குறுந்தகவல்கள், ஆடியோக்கள் வடிவத்தில் திரட்டப்பட்டன.

இறுதியாக, ஹேமா கமிட்டி தன்னுடைய அறிக்கையை 2019-ஆம் ஆண்டு அரசிடம் அறிக்கையை சமர்ப்பித்தது.

இந்த அறிக்கை 290 பக்கங்களை உடையதாக இருந்திருக்கிறது. ஆனால் அதன் விவரங்கள் எதுவும் அரசால் வெளியிடப்படாமல் காலம் தாழ்த்தப்பட்டு வந்தது.

இதற்கு பிரபல நடிகர்கள், இயக்குநர்கள், தயாரிப்பாளர்கள், குறிப்பாக ஆளும் கம்யூனிஸ்ட் கட்சியை சேர்ந்த எம்எல்ஏ உள்ளிட்ட பலர் மீது புகார்கள் இருப்பதால் அரசு இந்த விஷயத்தில் மெத்தனம் காட்டுவதாகவும் குற்றச்சாட்டு எழுந்தது.

இந்த நிலையில், 5 பத்திரிகையாளர்களின் தொடர்ச்சியான சட்டப் போராட்டத்தை எடுத்தனர். இதன் விளைவாக, கடந்த ஆகஸ்ட் 19-ஆம் தேதி இந்த அறிக்கை வெளியிடப்பட்டது.

ஆனால் வெளியிடப்பட்ட அறிக்கை முழுமையானதாக இல்லை. தனிநபர்களின் உரிமை பாதிக்காமல் இருக்கும் வரையில், பாலியல் ரீதியாக தங்களை துன்புறுத்தியதாக சொல்லப்பட்ட அல்லது சீண்டிய நபர்களின் பெயர்களை பாதிக்கப்பட்ட பெண்கள் கூறியிருப்பது தொடர்பான பக்கங்கள் நீக்கப்பட்டு மீதமுள்ள 233 பக்கங்கள் கொண்ட அறிக்கை மட்டுமே வெளியானது.

சங்கேத வார்த்தைகள்

அந்த அறிக்கையின்படி, adjustment அல்லது compromise என்ற வார்த்தைகள் திரைத்துறையில் நுழைந்த அல்லது இருக்கும் பெண்களிடம் திரைத் துறை தொடர்புடைய ஆண்கள் பலரால் பயன்படுத்தப்பட்டிருக்கிறது.

இதன் பொருள் மறைமுகமாக, நாங்கள் அழைக்கும்போது, அதுவும் எப்போது வேண்டுமானாலும் பாலியல் உறவுக்கு நீங்கள் தயாராக இருக்க வேண்டும் என்பதுதான் அதன் பொருள் என்பதை பாதிக்கப்பட்ட பெண்கள் தெரிவித்திருப்பது அறிக்கை மூலம் தெரியவந்தது.

பணியிடத்தில் வரம்பு மீறுவது, பணியையொட்டி தங்குமிடத்தில் இருக்கும்போது வரம்பு மீறுவது, உடன் பயணத்தின்போது ஆபாச வார்த்தைகளை பயன்படுத்தி பேசுவது, வாட்ஸ்அப் குறுந்தகவல் அனுப்புவது, படங்கள் அனுப்புவது, தங்குமிடங்களில் அத்துமீறி நுழைவது போன்ற பல்வேறு பாலியல் சீண்டல்கள் திரைத் துறையில் நுழையும் பெண்கள் தொடர்ந்து சந்திப்பதாகவும் சுட்டிக் காட்டப்பட்டிருக்கிறது.

மாஃபியாக்கள் கையில் திரைத் துறை?

மலையாள திரையுலகம் 15 பேர் கொண்ட மாஃபியாக்களின் கையில் இருக்கிறது. அரைகுறை ஆடையுடன் நடிக்க பெண்கள் கட்டாயப்படுத்தப்படும் நிலை உள்ளது. கிறார்கள். நெருக்கமான, முத்தக் காட்சிகள் பலமுறை காட்சிப்படுத்தப்படுகிறது.

இந்த மாஃபியா கும்பலின் ஆதிக்கம் பாலியல் புகார் விசாரணை குழுக்களிலும் இருக்கும். அது உண்மையை வெளிப்படுத்துவோரை இயங்கவிடாமல் தடை செய்துவிடும்.

அவர்களை விசாரிக்க புகார் குழு அமைப்பது காரணமாக, பெண்களின் துன்பம் அதிகரிக்குமே தவிர அது தீர்வாக அமையாது என்றும் சுட்டிக் காட்டப்பட்டுள்ளது.

திரைத்துறை, ஆண் நடிகர்கள், தயாரிப்பாளர்கள், விநியோகஸ்தர்கள், இயக்குநர்களின் கடடுப்பாட்டில்தான் உள்ளது. இவர்கள் அதிக செல்வத்தையும், புகழையும் பெற்றவர்களாக இருப்பவர்களாக உள்ளனர். அவர்களில் சிலர் இத்தகைய குற்றங்களில் ஈடுபட்டவர்களாகவும் இருக்கிறார்கள் என்றும் அறிக்கை சொல்லியிருக்கிறது.

திரைத் துறையில் முக்கிய இடத்தை வகிக்கும் ஆண்கள், சினிமா வாய்ப்பை கோரி நுழையும் பெண்களிடம், சங்கேத வார்த்தைகள் பயன்படுத்துவதும், அதற்கு அவர்கள் உடன்படாவிட்டால் திரைத்துறை வாய்ப்புகள் கிடைக்காமல் போவதும் சுட்டிக் காட்டப்பட்டிருக்கிறது.

தீவிர மனித உரிமை மீறல்

ஹேமா கமிட்டியின் விசாரணையின்போது, பெண்கள் பலரும், படப்பிடிப்பு தளங்களில் துணி மாற்றுவதற்கு தனி அறை இல்லாமலும், கழிவறை கூட இல்லாமல் அவதிப்படுவதையும் சுட்டிக் காட்டியிருக்கிறார்கள். இதை தீவிரமான மனித உரிமை மீறல் என ஹேமா கமிட்டி சுட்டிக்காட்டியிருக்கிறது.

அறிக்கையில் இடம்பெற்றுள்ள புகார்கள் அனைத்தும் 2008 முதல் 2012-ஆம் ஆண்டு வரை நடந்தவையாக இருக்கின்றன.

இந்த ஹேமா கமிட்டி அறிக்கை வெளியானதும் மலையாள நடிகர் சங்கத் தலைவராக தற்போது இருந்து வந்த மோகன்லால் பதவியை ராஜினாமா செய்தார். அவருடன் பலரும் ராஜினாமா செய்தார்கள்.

பிரபல நடிகர்கள் கருத்து

அதைத் தொடர்ந்து மோகன்லால், நிருபர்களை சந்தித்தபோது, ஹேமா கமிட்டியின் அறிக்கைக்கு ஒட்டுமொத்த திரைத்துறையும் பதில் கூறவேண்டிய நிலை இருக்கிறது. ஆனால் கேரள நடிகர் சங்கமான அம்மா மட்டுமே பொறுப்பேற்க முடியாது என்று குறிப்பிட்டார்.

நீண்டகாலமாக மலையாள சினிமாவில் கோலோச்சி வரும் மம்முட்டியும் ஹேமா கமிட்டி குறித்து கருத்து தெரிவித்தார்.

ஹேமா கமிட்டி அறிக்கையை வரவேற்ற அவர், அதில் குறிப்பிடப்பட்டிருக்கும் பரிந்துரைகளை உடனடியாக அமல்படுத்துவதற்கு தன்னுடைய ஆதரவை தெரிவித்தார்.

அத்துடன் அவர் மலையாள திரைத் துறையில் அதிகாரக் குழு என்று எதுவும் இல்லை என்ற தன்னுடைய கருத்தையும் பதிவிட்டிருக்கிறார்.

நடிகர்கள் மீது வழக்குப் பதிவு

ஹேமா கமிட்டி அறிக்கை வெளியான நிலையில், பலரும் பாலியல் அத்துமீறல் புகார்களை தெரிவிக்கத் தொடங்கியிருக்கிறார்கள்.
அத்துடன் நடிகை ஒருவர் இயக்குநரும், நடிகருமான சித்திக் மீது சிறப்பு புலனாய்வுக் குழுவிடம் பாலியல் புகார் அளித்துள்ளார்.

அதைத் தொடர்ந்து அந்த நடிகர் மீது வழக்குப் பதிவு செய்யப்பட்டுள்ளது. அதேபோல் மேலும் சில நடிகர்கள், அரசியல்வாதிகள் மீது வழக்குப் பதிவு செய்யப்பட்டிருக்கிறது.

தலையிட்ட கேரள உயர்நீதிமன்றம்

ஹேமா கமிட்டியின் முழு அறிக்கை, டிஜிட்டல் ஆதாரங்கள் உள்ளிட்டவற்றை சீலிடப்பட்ட கவரில் சமர்ப்பிக்க அரசுக்கு கேரள உயர்நீதிமன்றம் உத்தரவு பிறப்பித்திருந்தது. அரசு ஹேமா கமிட்டி அறிக்கையை நீதிமன்றத்தில் அரசு சமர்ப்பித்தது.

ஹேமா கமிட்டி அறிக்கை தொடர்பான வழக்குகளை கேரள உயர்நீதிமன்றத்தின் தற்காலிக தலைமை நீதிபதி ஏ. முகமது முஸ்டாக் தலைமையிலான புதிய சிறப்பு அமர்வு நீதிபதிகள் ஏ.கே.ஜெயசங்கரன் நம்பியார், சி.எஸ். சுதா ஆகியோர் அடங்கிய அமர்வு கடந்த செப்டம்பர் 10-ஆம் தேதி விசாரணை நடத்தியது.

குற்றச்சாட்டுகளை விசாரிக்க சிறப்பு புலனாய்வுக் குழுவை அரசு அமைத்திருக்கிறது என்று அட்வகேட் ஜெனரல் நீதிமன்றத்தில் அளித்த அறிக்கையில் தெரிவிக்கப்பட்டிருந்தது.

இதையடுத்து இதன்படி என்ன நடவடிக்கை எடுக்கப்பட்டது என்று நீதிமன்றம் கேள்வி எழுப்பியது.

பல ஆண்டுகளுக்கு முன்பே அறிக்கை சமர்ப்பிக்கப்பட்ட போதும், அரசு ஏன் மவுனம் காக்கிறது என்றும் நீதிபதிகள் கேள்வி எழுப்பினார்கள்.

நான்கு ஆண்டுகளாக நீங்கள் ஹேமா கமிட்டி அறிக்கையின் மீது சும்மா இருப்பதைத் தவிர வேறு எதையும் செய்யவில்லை என்று நீதிமன்றம் குறிப்பிட்டது.

திரையுலகில் மட்டுமின்றி சமூகத்தில் பெண்கள் எதிர்கொள்ளும் பிரச்னைகளுக்கு தீர்வு காண என்ன நடவடிக்கை எடுக்கப்பட்டிருக்கிறது என்றும் அரசுக்கு உயர்நீதிமன்றம் கேள்வி எழுப்பியது.

அறிக்கையின் மீது எடுக்கப்பட்ட நடவடிக்கை குறித்து விசாரணை குழு அறிக்கை சமர்ப்பிக்க வேண்டும். விசாரணையில் அவசரம் காட்டக் கூடாது. முதல் தகவல் அறிக்கை தேவையா என்பதை அறிக்கையை ஆய்வு செய்த பிறகே முடிவு செய்ய முடியும் என்றும் நீதிமன்றம் கூறியது.

பாலியல் குற்றச்சாட்டுகள் தவிர, ஹேமா கமிட்டி அறிக்கையில் தெரிவித்துள்ள ஊதிய சமநிலை, பணியிடத்தில் அடிப்படை வசதிகள் இன்மை போன்ற விஷயங்களையும் விசாரிக்க வேண்டும் என்று சிறப்பு புலனாய்வுக்குழுவை கேட்டுக் கொண்டது.

சிறப்பு புலனாய்வுக் குழு விரிவான பிரமாணப் பத்திரத்தை சீலிடப்பட்ட கவரில் தாக்கல் செய்ய வேண்டும்.

விசாரணையில் அனைவரின் தனியுரிமையை கவனத்தில் கொள்ள வேண்டும். செய்தியாளர் சந்திப்பு எதையும் சிறப்பு புலனாய்வுக்குழு நடத்தக் கூடாது என்று நீதிமன்றம் அறிவுறுத்தியுள்ளது.

உள்ளடக்கம்

சொற்பொழிவாளர் மகாவிஷ்ணு விவகாரம்

அரசியலில் நடிகர் விஜய் எம்ஜிஆரா? சிவாஜியா?

மன்னிப்பு என்றைக்கும் எதிரியால் மறக்க முடியாதது திருக்குறள் கதை

Posted on September 10, 2024 by L. இராஜேந்திரன்

குறளமுதக் கதைகள் வரிசையில் (திருக்குறள் கதை 37) நமக்கு துன்பம் தருபவரையும் மன்னித்து அவர்களை வெட்கப்படச் செய்யும் குணம் சிறந்தது என்பது குறித்த மன்னிப்பு பற்றிய திருக்குறள் கதை, திருக்குறள் விளக்கம் இடம்பெறுகிறது.

உள்ளடக்கம்

பழிவாங்க துடித்த ஆனந்தன்

வழக்கம்போல தாத்தா வாசலில் அமர்ந்திருக்க, ஆனந்தன் மிக வேகமாக தாத்தாவிடம் வந்தான்.

தாத்தா… நான் சைக்கிளில் சென்றபோது, ஒருவன் வேண்டுமென்றே குறுக்கே வந்து என்னை கீழே விழச் செய்துவிட்டான்.

இதனால் எனக்கு காலில் லேசான காயம் ஏற்பட்டு விட்டது. பதிலுக்கு ஒரு நாள் அவன் சாலையில் சைக்கிளை ஓட்டி வரும்போது நான் அவனை கீழே தள்ளி விட்டால்தான் என் ஆத்திரம் அடங்கும் என்று புலம்பினான்.

ஆனந்தா… முதலில் நீ உள்ளே போய் காயம் அடைந்த பகுதியை சுத்தம் செய்து மருந்து தடவு. அதற்கு பிறகு என்னிடம் வா… நான் ஒரு கதை சொல்கிறேன். அந்த கதையை கேட்ட பிறகு உன்னை கீழே தள்ளிவிட்டவனை என்ன செய்யலாம் என்று முடிவு என்றார் தாத்தா.

சரி என்று உள்ளே சென்ற ஆனந்தன், சிறிது நேரம் கழித்து திண்ணையில் வந்து அமர்ந்தான்.

தாத்தா… சொல்லுங்கள். அந்த கதையை என்றான்.

துறவியும் துன்பமும்

துறவி ஒருவர் சரயு நதியைக் கடப்பதற்காக படகு ஏதாவது தென்படுகிறதா என்று கரையோரத்தில் நடந்து சென்றார்.

நீிண்ட தூரம் நடந்த அவர் மாலை நேரம் இருட்டத் தொடங்கியதால், இன்று இரவுக்குள் நாம் சரயு நதியை கடக்கும் வாய்ப்பு இழந்துவிடுமோ என நினைத்தபடியே நடந்தார்.

இறைவா.. இன்று இரவு சரயு நதியைக் கடந்து அயோத்தியில் ராமர் ஜலசமாதி அடைந்த குப்தர் படித்துறையை அடைய வேண்டும் என்று எண்ணுகிறேன். நீதான் அருள் புரிய வேண்டும் என வேண்டினார் துறவி.

என்ன ஆச்சரியம். அவருடைய வேண்டுதல் உடனடியாக நிறைவேறியது. அவரின் கண்ணெதிரே ஒரு படகு கரையோரத்தில் இருந்து புறப்படத் தயாராக இருந்தது.

மாலை நேரம் முடிந்து இருள் சூழத் தொடங்கிவிட்டதால், கடைசி படகு சவாரி அது என்பதால் எண்ணிக்கைக்கு மேல் கூட்டம் நிரம்பி வழிந்தது.

இரு படகோட்டிகள் படகை துடிப்பு போட்டு நகர்த்த தயாராகினர். இதைக் கண்ட துறவி, அவர்களை நோக்கி இருகரம் கூப்பி, என்னையும் இந்த படகில் ஏற்றிக் கொண்டால் நான் எண்ணிய கடமையை நிறைவேற்ற முடியும் என்று அந்த படகோட்டிகளிடம் கூறினார்.

அந்த துறவியின் தீர்க்கமான பார்வையைக் கண்டு பக்தி உணர்வோடு கைக்கூப்பி வாருங்கள்… அழைத்துச் செல்கிறோம் என்று படகை திரும்பவும் கரையோரம் நிறுத்தினார்கள்.

படகில் இருந்தவர்களோ, இப்போதே அதிகப்படியானவர்கள் படகில் இருக்கிறோம். இதில் அந்த துறவியையும் ஏற்றுவது எங்களுக்கு பிடிக்கவில்லை என்று எதிர்ப்பு தெரிவித்தார்கள்.

அதை இரு படகோட்டிகளும் பொருட்படுத்தாமல், துறவியை அமர வைத்துக்கொண்டு படகை எதிர்கரை நோக்கி புறப்பட்டார்கள்.

துறவி மிகக் குறுகிய இடத்தில் அமர்ந்து கை, கால்களை நீட்ட முடியாமல் தவித்தார். இருந்தாலும் படகில் இருந்தவர்கள் அவருக்கு இடம் தரக் கூடாது என்பதில் தீர்க்கமாக இருந்ததால், அந்த குறுகிய இடத்தில் முடங்கியவாறு பயணிக்க வேண்டியிருந்தது.

ஆற்றி நீர் அப்போதே மிகவும் குளிர்ந்து போயிருந்தது. அப்போது படகில் இருந்த சிலர் வேண்டுமென்றே துறவியின் மீது அந்த தண்ணீர் பட வேண்டும் என்ற நோக்கத்தில் கையால் வாரி இறைத்தார்கள்.

தன் மீது குளிர்ந்த நீர் பட்டதால் அவருக்கு எந்த பாதிப்பும் வரவில்லை. காரணம் அதற்கு அவர் பல காலமாக பழகியவர் என்பதால் அதை பொருட்படுத்தாமல் பயணத்தை தொடர்ந்தார்.

படகோட்டிகள் எவ்வளவோ கண்டித்தும் பலனில்லை. ஒரு கட்டத்தில் பலரும் தண்ணீரை வாரி அடித்ததால் படகுக்குள் தண்ணீர் தேங்கத் தொடங்கியது. அதுவரை அசைந்தாடி எந்த ஆபத்தையும் ஏற்படுத்தாமல் சென்ற படகு ஒரு பக்கமாக சாயத் தொடங்கியது.

படகு கவிழ்ந்தால் இந்த துறவியால்தான் கவிழும். அவருடைய அதிக பாரத்தை தாங்காமல்தான் படகு தள்ளாடுகிறது. அவர் சாவதோடு நம்மையும் சாக வைத்துவிடுவார் போலிருக்கு என்று கூக்குரலிட்டார்கள்.

அப்போது, ஒரு அசரீரி வானில் இருந்து கேட்டது. துறவி உங்கள் படகில் வருவதால்தான் அது கவிழாமல் இருக்கிறது. அவர் இந்த படகில் ஏறாமல் இருந்தால் இந்த படகை கவிழ்த்து உங்கள் எல்லோர் உயிரையும் பாசக் கயிற்றால் கட்டி எமலோகம் இழுத்துச் சென்றிருப்பேன். தப்பிவிட்டீர்கள் என்றது அசரரீ.

இதைக் கேட்ட பயணிகள் எல்லோரும் மிரண்டு போய் அமைதியாக அமர்ந்து விட்டார்கள். துறவியோ கண்களை மூடிய தியான நிலையிலேயே பயணித்ததால், அவர் காதுகளில் அசரீரி விழவில்லை.

கரையை நெருங்கியபோது அந்த துறவிக்கு புறவுலக நினைவு வந்தது. அவருக்கு இடம் தராமல் நெருக்கடி கொடுத்தவர்கள் அவரை விட்டு தள்ளி பயபக்தியோடு அவரை பார்த்து கும்பிட்டபடி இருந்தார்கள். துறவிக்கு ஒன்றும் புரியவில்லை.

படகில் இருந்து முதலில் இறங்குவதற்கு எல்லோரும் வழிவிட்டார்கள். அவர் இறங்கி படகோட்டியிடம் நன்றி சொல்லி புறப்பட்டார்.

அதற்குள் படகில் வந்தவர்கள் எல்லோரும் விழுந்தடித்து ஓடி வந்து அவரது காலில் விழுந்து மன்னிப்பு கோரினார்கள்.

அவர் சிரித்தபடியே, நீங்கள் எல்லோரும் என் குழந்தைகள். இறைவன் உங்களை காப்பாற்றுவார். தீர்க்காயுள் பவ. என்று சொல்லி ஆசிர்வதித்து விடைப் பெற்றார் என்று சொல்லி முடித்தார் தாத்தா.

சரி.. இந்த கதையில் இருந்து நீ என்ன தெரிந்துகொண்டாய் என்று தாத்தா இப்போது கேள்வி எழுப்பினார்.

மன்னிப்பு பற்றிய திருக்குறள் கதை சொல்லும் கருத்து

தாத்தா… அடிப்பட்டதால் ஏற்பட்ட காயத்தால் அவனை பழி வாங்குவேன் என்று சொல்லிவிட்டேன். அவன் அறியாமல் செய்த தவறை மன்னிக்க வேண்டும் என்பதை இந்த கதை மூலம் புரிந்துகொண்டேன் என்றான் ஆனந்தன்.

இந்த கதையையொட்டிய ஒரு திருக்குறள் இருக்கிறது அதையும் சொல்லி விடுகிறேன்.

இன்னா செய் தாரை ஒறுத்தல் அவர்நாண

நன்னயஞ் செய்து விடல்

(குறள் 314)

தீமை செய்தவர்களை நாம் பதிலுக்கு தண்டிப்பது தவறு. அவர்களுக்கு தீமைக்கு பதில் நன்மை செய்து, தன் தவறை உணர்ந்து வெட்கமடையச் செய்ய வேண்டும் என்பதுதான் அதன் பொருள்.

திருக்குறள் கதை வழியில், உன்னை கீழே தள்ளிவிட்டவனுக்கு நன்மை செய்து அவனை வெட்கபடச் செய்ய வேண்டும் என்றார் தாத்தா.

நிச்சயமாக தாத்தா.. உங்களுடைய திருக்குறள் கதை என் மனதில் ஆழமாக பதிந்துவிட்டது என்றான் ஆனந்தன்.

எமலோகத்தில் அரசியல்வாதி ஆத்மா

நல்லோர் திருக்குறள் – கதையும் விளக்கமும்

பிற உயிர்களிடத்தில் அன்பு திருக்குறள் கதை 36

Posted on September 9, 2024 by L. இராஜேந்திரன்

குறளமுதக் கதைகள் வரிசையில் (திருக்குறள் கதை 36) பிற உயிர்களை துன்புறுத்துவது சரியா? என்பதை விளக்கும் கதையும், திருக்குறள் விளக்கமும் இடம்பெற்றிருக்கிறது.

உள்ளடக்கம்

தாத்தாவும் ஆனந்தனும்

ஆனந்தன் மாலையில் வீட்டுக்குள் நுழைந்தபோது, வாசலில் சாய்வு நாற்காலியில் அமர்ந்திருந்த தாத்தா ஏதோ ஒரு பாடலைப் பாடிக் கொண்டிருந்தார்.

ஆனந்தனுக்கு அந்த பாடல் வரிகள் காதில் விழவில்லை. அதனால் தாத்தா… என்ன பாட்டு பாடுறீங்க என்று கேட்டான்.

இதைக் கேட்ட தாத்தா, நீயும் கேளு இந்த பாட்டை… என்று சொல்லிவிட்டு உரக்க பாடத் தொடங்கினார்.

“உயிர்களிடத்து அன்பு வேணும் தெய்வம் உண்மையென்று தானறிதல் வேணும்” என அவர் பாடத் தொடங்கிய அவர். இடையில் நிறுத்திவிட்டு, இது யார் பாடிய பாட்டு சொல்லு என்று கேள்வியை எழுப்பினார்.

தாத்தா! இது மகா கவி பாரதியின் பாடல் வரிகள். சரியா.. என்றான் ஆனந்தன்.

ஆமாம்.. பாரதி பாடிய பாடல் வரிகள்தான் இவை. ஆனால் இன்றைய சிறுவர்கள் இதனுடைய பொருள் உணராது பிற உயிர்களுக்கு துன்பம் தருகிறார்கள்.

சற்று முன்பு சாலையில் இரு சிறுவர்கள் ஒன்றும் அறியாத ஓணானைப் பிடித்து அதன் வாலில் நூலை கட்டி சாலையில் இழுத்துக் கொண்டு போனார்கள்.

இதைப் பார்த்துவிட்டு… என்னப்பா.. இப்படி செய்யலாமா என்று கேட்டேன். ஆனால் அந்த சிறுவர்கள் எதையும் காதில் வாங்கிக் கொள்ளாமல் அந்த ஓணானை இம்சைப்படுத்திக்கொண்டே சென்றது என்னை பாதித்தது.

அதனால்தான் இந்த பாட்டை நான் இப்ப பாடினேன் என்று விளக்கம் கொடுத்தார் தாத்தா.

சிறுவர்களை தேடிச் சென்ற ஆனந்தன்

இதைக் கேட்ட ஆனந்தன், தாத்தா உடனே அவர்களை சந்தித்து இதை புரிய வைக்கிறேன் என்று சொல்லிவிட்டு தாத்தாவின் பதிலுக்கு காத்திருக்காமல் அந்த சிறுவர்கள் சென்ற வழியில் ஓடிப்போனான்.

அந்த தெருவை தாண்டியதும் அருகில் ஒரு வயல் பகுதி இருந்தது. அந்த இடத்தில் தாத்தா சொன்ன அந்த சிறுவர்கள் நிற்பதைப் பார்த்தான்.

ஆனந்தன் எல்லோரிடமும் சகஜமாக பேசும் பழக்கமுடையவன். இதனால் அவனை கண்டதும், அந்த சிறுவர்கள், என்ன அண்ணா… இந்தப் பக்கம் வந்திருக்கிறீர்கள் என்றார்கள்.

நீங்கள் இருவரும் ஓணானை இம்சை செய்வதை அறிந்துதான் ஓடி வந்தேன். அப்படி செய்வது பாவம் என்பதை சொல்லத்தான் ஓடி வந்தேன். அதை ஒன்றும் செய்யாதீர்கள், என்றான் ஆனந்தன்.

ஆனந்தா! உனக்குத் தெரியாது, “ஓணான் எங்களைப் பார்த்து ஏளனமாக தலையாட்டி சிரித்தது என்றார்கள் இருவரும்.

ஓணானின் இயல்பே இருபுறமும் தலையை அசைத்து வாயை திறந்து மூடுவதுதான். இதை நீங்கள் தவறாக நினைத்துக்கொண்டு அதை கஷ்டப்படுத்துகிறீர்கள். அதை விட்டு விடுங்கள் என்றான் ஆனந்தன்.

வாங்க… இரண்டு பேரும். தாத்தா நமக்கு அருமையான கதை சொல்ல காத்திருக்கிறார் என்று சொல்லி ஓணானை விடுவிடுத்து தாத்தாவிடம் அழைத்து வந்தான் ஆனந்தன்.

தாத்தாவிடம் வந்து நின்ற சிறுவர்கள்

இருவரையும் பார்த்த தாத்தா… ஓணானை விடுவித்து விட்டீர்களா என்று கேட்டார். தாத்தா… தெரியாமல் தவறு செய்துவிட்டோம். ஆனந்தன் ஓடி வந்து சொன்னதும், அதை விடுவித்து விட்டோம்.

தாத்தா எங்களுக்கு கதை ஒன்று சொல்லுங்களேன் என்றார்கள் சிறுவர்கள்.

கதை சொல்வதற்கு முன்பு அறங்களுள் ஒன்று கொல்லாமை. அது பற்றிய திருக்குறள் சொல்கிறேன் கேளுங்கள் என்றார் தாத்தா.

கொல்லாமை என்றால் என்ன தாத்தா என்று அவர்கள் கேட்ட கேள்விக்கு இப்போது தாத்தா பதில் சொல்லத் தொடங்கினார்.

பிற உயிர்களிடத்தில் அன்பு

ஓரறிவு முதல் ஐந்தறிவு வரையிலான உயிர்களை மறந்தும் கொல்லுதல் பாவம் அதுதான் கொல்லாமை. அது மட்டுமின்றி அவைகளை துன்புறுத்துவதும் தவறு. அறங்களுள் சிறந்தது கொல்லாமைதான்.

இதைத்தான் திருக்குறள்,

நல்லாறு எனப்படுவது யாதெனின் யாதொன்றும்

கொல்லாமை சூழும் நெறி.

(குறள் – 324)

என்னும் பாடல் மூலம் நமக்கு அறிவுரை வழங்குகிறது.

அதாவது, நல்ல நெறி என்று அறவோரால் சொல்லப்படுவது என்னவெனில், எந்த உயிரையும் கொல்லாமல் இருப்பதே சிறந்த நெறி என்பதுதான் இதன் பொருள்.

முனிவரும் பாம்பும்

ஒரு காட்டில் முனிவர் ஒருவர் தவம் செய்துகொண்டிருந்தார். ஏதோ தன்னருகே ஒரு சத்தம் கேட்டதை உணர்ந்த அவர், லேசாக கண் திறந்து பார்த்தார்.

தன் எதிரே உடல் முழுவதும் காயங்களோடு ஒரு பாம்பு அவர் அருகே நெளிந்தபடி இருந்தது.

அந்த பாம்பு அவருக்கு ஏற்கெனவே பழக்கப்பட்டது. அதனால் அதனிடம் முனிவர் பேசத் தொடங்கினார்.

உன் உடம்பெல்லாம் காயமாக இருக்கிறதே. என்ன நடந்தது என்று கேட்டார்.

உங்களிடம் ஒரு நாள் வந்து உபதேசம் கேட்டேன். அப்போது நீங்கள் நீ யாருக்கும் தீங்கு செய்யாதே என்று அறிவுறுத்தினீர்கள்.

அதை கேட்டு நானும் இனி யாரையும் தீண்டி காயப்படுத்துவதில்லை என்று முடிவு செய்தேன்.

ஒரு நாள் உணவுத் தேடி புற்றில் இருந்து புறப்பட்டு சென்றேன். அப்போது என்னை கண்ட என்னை கல்லால் அடிக்கத் தொடங்கினார்கள். உயிர் பிழைக்க ஆசைப்பட்டு உங்களிடம் ஓடி வந்திருக்கிறேன் என்றது பாம்பு.

உன்னுடைய விஷம் மற்றவர்களை கொல்லக் கூடியது. அதனால் நீ யாருக்கும் தீங்கு செய்யாதே என்று உபதேசம் செய்தேன். ஆனால் உன்னுடைய அச்சுறுத்தும் சுபாவமான சீறும் குணத்தை விட்டுவிடச் சொல்லவில்லை. அதை நீ உன் தற்காப்புக்கு பயன்படுத்துவது ஒன்றும் தவறில்லை.

இனி யாராவது உன்னை துன்புறுத்த வந்தால், சீறி அவர்களை அச்சுறுத்து. ஆனால் அவர்களை கடித்துவிடாதே. உன் துன்பங்கள் நீங்கும். உன் காயங்கள் விரைவில் ஆறும் என்று ஆறுதல் சொல்லி அனுப்பினார் அந்த முனிவர்.

மீண்டும் ஒரு நாள் பாம்பு இரை தேட புறப்பட்டுச் சென்றபோது, அதே சிறுவர்கள் அதை பார்த்துவிட்டார்கள்.

உடனே அவர்கள் கற்களை வீச முயற்சித்தபோது, அவர்களை நோக்கி சீறி பாய்ந்தது அந்த பாம்பு. உயிர் பிழைத்தோம் என அந்த சிறுவர்கள் தப்பியோடி தலைமறைவானார்கள்.

பாம்பும் பிறருக்கு தீங்கு செய்யாமல் தன்னுடைய ஆயுளை நல்ல முறையில் கழித்தது என்று கதை சொல்லி முடித்தார் தாத்தா.

சிறுவர்கள் இப்போது தங்கள் தவறுக்கு தாத்தாவிடம் மன்னிப்பு கேட்டதோடு, இனி எந்த உயிருக்கும் நாங்கள் தீங்கு செய்ய மாட்டோம் என்று உறுதி சொல்லி விடை பெற்றார்கள்.

பிற உயிர்களிடத்தில் அன்பு திருக்குறள் சொல்வதென்ன?

பிறரை தீண்டினால் இறந்துவிடுவார்கள் என்ற அளவுக்கு விஷமுடைய பாம்பு கூட இனி யாருக்கும் தீங்கு செய்யக் கூடாது என்று தீர்க்கமாக முடிவு எடுக்க முடிந்திருக்கிறது.

ஆனால் சிந்திக்க திறன் பெற்ற ஆறறிவு மனிதர்கள் நாம் பிற உயிர்களுக்கு தீங்கு செய்வது தவறு. அவையும் இந்த பூவுலகில் வாழ இறைவனால் படைக்கப்பட்டவை. பிற உயிரினங்களை துன்புறுத்துவது நெறி அல்ல என்பதை உணர்த்துகிறது.

தெய்வம் எப்போது துணை நிற்கும்-திருக்குறள் கதை 35

தமிழகத்தில் எத்தனை பேசுவோர் இருக்காங்க தெரியுமா?

மகாவிஷ்ணு விவகாரத்தின் பின்னணி என்ன?

Posted on September 8, 2024 by RR

சென்னை: பள்ளிக் கல்வித் துறை “மகாவிஷ்ணு விவகாரம்” “விநாயகர் சதுர்த்தி உறுதிமொழி” சர்ச்சைகளால் இப்போது சிக்கித் தவிக்கிறது.

சமீபகாலமாக பள்ளிக் கல்வித் துறையில் நடைபெறும் நிகழ்வுகளை பார்க்கும்போது அத்துறை ஒரு அமைச்சரின் கட்டுப்பாட்டில்தான் இருக்கிறதா?

அந்த அமைச்சருக்கு தெரியாமல் இதுபோன்ற சம்பவங்கள் நடைபெறுவதற்கு என்ன காரணம்?

இதுபோன்ற சந்தேகத்தை பொதுவெளியில் மக்கள் பேசும் அளவுக்கு இன்றைய “திராவிட மாடல்” அரசு மாறியிருக்கிறது.

உள்ளடக்கம்

விநாயகரை வம்புக்கிழுத்த சுற்றறிக்கை

அண்மையில் பெரம்பலூர் மாவட்ட முதன்மைக் கல்வி அலுவலர் சார்பில் பள்ளிகளுக்கு ஒரு சுற்றறிக்கை அனுப்பப்பட்டிருக்கிறது.

அதில் விநாயகர் சதுர்த்தியின்போது செய்ய வேண்டியவை, செய்யக் கூடாதவை என உறுதிமொழி எடுக்க வேண்டும் எனக் குறிப்பிடப்பட்டிருந்தது.

இதேபோல் திருச்சி,புதுக்கோட்டை மாவட்ட முதன்மை கல்வி அலுவலர்களும் சுற்றறிக்கை அனுப்பியதாக சொல்லப்பட்டது.

தமிழ்நாடு மாசுக் கட்டுப்பாடு வாரியத்தின் அறிவுறுத்தல் காரணமாக, விநாயகர் சதுர்த்தி விழாவை சுற்றுச்சூழலுக்கு பாதுகாப்பான முறையில் கொண்டாடுவது தொடர்பாக, மாணவர்களிடையே விழிப்புணர்வு ஏற்படுத்த 10 உறுதிமொழிகளை எடுக்க வேண்டும் என்று ஒரு சுற்றறிக்கை அனுப்பப்பட்டதாம்.

ஆனால், இது மறைமுகமாக, அரசுப் பள்ளிகளில் விநாயகர் சதுர்த்தி விழாவை கொண்டாட வேண்டும் என்பதை சுட்டிக்காட்டுவதாக பலரும் கருத்துக் கூறி களத்தில் இறங்கினார்கள்.

இதனால் இது சமூக ஊடகங்களிலும், தொலைக்காட்சிகளிலும் விவாதப் பொருளாக மாறிப்போனது.

இதையடுத்து தமிழக அரசு விழித்துக் கொண்டு, விநாயகர் சதுர்த்தி தொடர்பான உறுதிமொழி ஏற்கும் சுற்றறிக்கையை ரத்து செய்வதாக அறிவித்தது.

அத்துடன் அரசுத் தரப்பில் ஒரு விளக்கமும் கொடுக்கப்பட்டது. இது அரசின் ஆணைகளுக்கு முற்றிலும் முரணானது என்பதால் சில மாவட்டங்களில் மட்டும் வெளியிடப்பட்ட இந்த அறிவுறுத்தல்கள் முற்றிலும் ரத்து செய்யப்படுகிறது.

இவ்வாறு தவறான சுற்றறிக்கை அனுப்பியதற்கு பொறுப்பான அலுவலர்கள் மீது துறை ரீதியான நடவடிக்கை எடுக்கப்படும் என விளக்கம் அளித்து இந்த பிரச்னைக்கு முற்றுப் புள்ளி வைக்க முயற்சித்தது.

மகாவிஷ்ணு விவகாரம்

கொழுந்து விட்டு எரிந்த விநாயகர் சதுர்த்தி பிரச்னை கொஞ்சம் தணிந்தது. ஆனால், ஆன்மிக சொற்பொழிவாளர் மகாவிஷ்ணு பிரச்னையால் மீண்டும் சிக்கியது பள்ளிக் கல்வித் துறை.

கடந்த மாதம் 28-ஆம் தேதி சென்னை அசோக் நகரில் உள்ள பெண்கள் மேல்நிலைப் பள்ளியில் மாணவர்களுக்கு தன்னம்பிக்கையூட்டும் நிகழ்ச்சி நடத்தப்பட்டது. அதில் மகாவிஷ்ணு என்பவர் உரையாற்றியிருக்கிறார்.

அதேபோல் சைதாப்பேட்டையில் உள்ள அரசு மாதிரிப் பள்ளி ஒன்றிலும் மகாவிஷ்ணு பேச அழைக்கப்பட்டிருக்கிறார். அவரது சர்ச்சைக்குரிய கருத்துக்கள் பொதுவெளியில் விமர்சனத்துக்கு ஆளானது.

என்ன பேசினார்? ஏன் எதிர்ப்பு?

இந்த இரு பள்ளிகளிலும் மகாவிஷ்ணு பேசிய பேச்சு விடியோக்களாக சமூக ஊடகங்களில் பரவியது. ஒரு கட்டத்தில் வைரலாக பரவிய இந்த விடியோவை பகிர்ந்து, அரசுப் பள்ளிகளில் இத்தகைய நிகழ்ச்சிகளை அனுமதித்தது யார்? என்ற கேள்வியை பலரும் எழுப்பினார்கள்.

சைதாப்பேட்டை அரசு மாதிரிப் பள்ளியில் அவர் பேசும்போது, மனிதர்கள் முந்தைய பிறவிகளில் செய்த பாவ, புண்ணியங்களால் இப்பிறவியில் பலன்களை அனுபவிக்கிறார்கள் என்று குறிப்பிட்டிருக்கிறார்.

அவரது பேச்சுக்கு அதே பள்ளியைச் சேர்ந்த தமிழ் ஆசிரியரும், பார்வை சவால் உடைய மாற்றுத் திறனாளி கே. ஷங்கர் உடனடியாக எதிர்ப்பு தெரிவித்திருக்கிறார்.

அப்படி கேள்வி எழுப்பிய அந்த ஆசிரியரைப் பார்த்து, “உங்களுடைய பெயர் என்ன? அரசுப் பள்ளியில் ஆன்மிகம் பேசக் கூடாது என்று எந்த சட்டம் சொல்கிறது? உங்களுடைய முதன்மை கல்வி அலுவலரை விட நீங்கள் பெரிய அறிவு பெற்றவரா?” என கேள்வி எழுப்பியிருக்கிறார்.

பாவ புண்ணியங்களைப் பற்றி பேசாமல் ஒருவனுக்கு எப்படி வாழ்வியலை போதிக்க முடியும். நீங்கள் (ஆசிரியர்கள்) சொல்லித் தந்தீர்களா? பாவம், புண்ணியத்தைப் பற்றி புருஷன் சொல்லிக் கொடுக்க முடியுமா? பொண்ணாட்டி சொல்லிக் கொடுக்க முடியுமா? யார் சொல்லிக் கொடுக்க முடியும்?

ஆசிரியர்கள் என்றால் என்ன வேண்டுமானாலும் பேசலாமா? என்னை அழைத்துவிட்டு உங்களுக்கு இந்த பேச்சு பிடிக்கவில்லை என்றால் என்னை ஏன் அழைத்தீர்கள்?. இவ்வளவு நாள் உங்களால் போதிக்க முடியாத கல்வியை போதிப்பதற்கு நீங்கள் எனக்கு நன்றி சொல்ல வேண்டும்” என்றெல்லாம் மாணவர்கள் மத்தியில் அந்த ஆசிரியரோடு வாக்குவாதத்தில் ஈடுபட்டிருக்கிறார்.

அமைச்சரின் சமாதானம்

சமூக ஊடகங்களில் எழுப்பப்பட்ட கேள்விகளுக்கு அரசுத் தரப்பில் இருந்து உடனடியாக எந்த பதிலும் வரவில்லை. பள்ளிக் கல்வித் துறை அமைச்சர் அன்பில் மகேஷ் பொய்யாமொழி எதுவும் வாய்த் திறக்கவில்லை.

இந்த நிலையில், வெள்ளிக்கிழமை அசோக் நகர் பள்ளியில் பள்ளிக்கல்வித் துறை அமைச்சர் பங்கேற்கும் நிகழ்ச்சி நடந்தது.

அவரிடம் இதுபற்றி கேள்வி எழுப்ப, பல்வேறு ஊடகங்களுக்கும் காத்திருந்தன. அப்போது மாணவர் அமைப்பினர் பள்ளி முன்பு போராட்டத்தில் ஈடுபடத் தொடங்கினர்.

நிகழ்ச்சிக்கு வந்த அமைச்சர், நடந்த சம்பவம் குறித்து விசாரணை நடத்தி 2, 3 நாள்களுக்குள் நடவடிக்கை எடுக்கப்படும் என்று போராட்டக்காரர்களுக்கு உறுதி உறுதி அளித்து சமாதானம் செய்தார்.

தலைமை ஆசிரியர்கள் மீது நடவடிக்கை

அதைத் தொடர்ந்து அந்தப் பள்ளி தலைமை ஆசிரியர் இரா. தமிழரசி வேறு இடத்துக்கு பணிமாற்றம் செய்யப்பட்டார்.

சைதாப்பேட்டை அரசு மாதிரி மேல்நிலைப் பள்ளி தலைமை ஆசிரியர் கே. சண்முகசுந்தரமும் இடமாற்றம் செய்யப்பட்டார்.

இதனால், மகாவிஷ்ணுவை அரசுப் பள்ளிக்கு சிறப்பு அழைப்பாளராக அழைத்து பேச வைக்கும் முடிவை பள்ளி தலைமை ஆசிரியர்கள் தன்னிச்சையாக எடுத்துவிட முடியுமா? என்ற கேள்வி சமூக ஊடகங்களில் எழும்பியது.

புரியாத புதிர்!

அரசுப் பள்ளிகளைப் பொறுத்தவரை, முதன்மைக் கல்வி அலுவலரின் உத்தரவின்றி எதையும் ஆசிரியர்கள் செய்ய முடியாது.

ஒருவேளை, மாணவர்களிடையே ஒருவர் பேசுவதற்கு தகுதியானவர் என சில நேரங்களில் பள்ளி தலைமை ஆசிரியரே முடிவு செய்தால், அதற்கான முழு பொறுப்பை தலைமை ஆசிரியர்தான் ஏற்க வேண்டும்.

அந்த வகையில்தான் இந்த தலைமை ஆசிரியர்கள் இடமாற்றம் செய்யப்பட்டார்களா? என்று தெரியவில்லை.

ஆனால், மகாவிஷ்ணு பார்வை குறைபாடுடைய ஆசிரியரிடம் குரலை உயர்த்திப் பேசும்போது, “என்னை பேச அனுமதித்த மாவட்ட கல்வி அதிகாரியை விட நீங்கள் பெரியவரா?” என்று வெளிப்படையாக சொன்னதற்கு விடை இன்னமும் புரியாத புதிராகவே இருக்கிறது.

ஒருவேளை இது அந்த மகாவிஷ்ணுவுக்கு மட்டுமே தெரிந்த ரகசியமாக இருக்குமோ என்னமோ!

கைது செய்யப்பட்ட மகா

மகாவிஷ்ணுவின் பேச்சுக்கு எதிர்ப்பு தெரிவித்து மாற்றுத் திறனாளிகள் சங்கத்தினர் ஆர்ப்பாட்டத்தில் ஈடுபட்டதோடு, சைதாப்பேட்டை, அசோக் நகர் காவல் நிலையங்களில் புகாரும் தெரிவித்தனர்.

தமிழ்நாடு அனைத்து வகை மாற்றுத் திறனாளிகள் சங்கத் தலைவர் வில்சன் தன்னுடைய புகார் மனுவில், மகாவிஷ்ணு மீது வன்கொடுமை சட்டம் மற்றும் ஊனமுற்றோர் உரிமைகள் சட்டப் பிரிவு 72 (அ) படியின் நடவடிக்கை எடுக்க வேண்டும் என வலியுறுத்தியிருக்கிறார்.

போலீஸார் விசாரணை மேற்கொண்ட நிலையில், மகாவிஷ்ணு ஆஸ்திரேலியா சென்றிருப்பது தெரியவந்தது. அவர் சென்னை திரும்பியதும் விமான நிலையத்தில் போலீஸார் கைது செய்திருக்கிறார்கள். அவர் மீது 5 பிரிவுகளின் கீழ் வழக்குப் பதிவு செய்யப்பட்டு நீதிமன்ற காவலுக்கு அனுப்பப்பட்டிருக்கிறார்.

யார் இந்த மகாவிஷ்ணு

மதுரை மாவட்டத்தைச் சேர்ந்த மகாவிஷ்ணு, மாணவப் பருவத்திலேயே மேடைப் பேச்சில் ஆர்வம் கொண்டிருந்திருக்கிறார்.

தனியார் தொலைக்காட்சி நிகழ்ச்சிகள் மூலம் பிரபலமடைந்த அவர் சினிமாத் துறையிலும் அடியெடுத்து வைத்திருக்கிறார்.

அதில் அவரது முயற்சி தோல்வி அடைந்ததை அடுத்து, திருப்பூர் மாவட்டம், அவிநாசியில் பரம்பொருள் ஃபவுண்டேஷன் என்ற அமைப்பை ஏற்படுத்தி அதன் மூலம் யோகா, சொற்பொழிவுகளை நடத்தி வருகிறார்.

மக்களிடம் விழிப்புணர்வு இருக்கு… ஆனால்…

அரசுப் பள்ளியில் சொற்பொழிவு ஆற்றுபவர்கள், மாணவர்களுக்கு தன்னம்பிக்கை அளிக்கக் கூடிய கருத்துக்களைத்தான் போதிக்க வேண்டுமே தவிர, மூட நம்பிக்கைகளை ஏற்படுத்தும் வகையில் இருக்கக் கூடாது.

இந்த நிலையில், இப்படிப்பட்டவர்களை கண்டிப்பதும், தண்டிப்பதும் அவசியமானதுதான்.

மாணவர்களிடம் எதை பேச வேண்டும், எப்படி பேச வேண்டும் என்ற அடிப்படை அறிவு இல்லாதவர்களை பேச அழைத்தவர்கள் அதைவிட அதிக தண்டனைக்குரியவர்கள்.

திராவிட மாடல் அரசு என்று பொது மேடைகளில் பேசி கைத் தட்டு பெற்றால் மட்டும் போதாது. மக்கள் எவ்வளவு விழிப்போடு இருக்கிறார்களோ, அதைவிட அதிக விழிப்போடு ஒரு அரசு செயல்பட வேண்டும் என்பதில் தான் திராவிட மாடல் அரசின் வெற்றி் அடங்கியிருக்கிறது.

அரசுப் பள்ளிகளில் மதரீதியான சொற்பொழிவு நடத்தலாமா?

இதற்கு இந்திய அரசியலமைப்புச் சட்டம் 28-ஆவது பிரிவு – கல்வி நிறுவனங்களில் மத பிரசாரம் தொடர்பான சில வரையறைகளை வகுத்திருக்கிறது.
முழுமையாக அரசு நிதியால் பராமரிக்கப்படும் எந்த கல்வி நிறுவனத்திலும் மத போதனைகளை வழங்க முடியாது. அதனால் அரசுப் பள்ளிகளில் மதரீதியான ஆன்மிக சொற்பொழிவு, மத பிரசாரம் செய்ய முடியாது.

தனியார் பள்ளிகள் சிலவற்றில் மதரீதியான சொற்பொழிவு நடத்துகிறார்களே அது எப்படி?

இந்திய அரசியலமைப்பு சட்டத்தின் 28-ஆவது பிரிவின்படி, முழுவதும் அரசு நிதியால் பராமரிக்கப்படாத தனியார் அல்லது அரசு உதவி பெறும் மதநிறுவனம் சார்ந்த கல்விக் கூடங்களில், மாணவ, மாணவியரின் பெற்றோர் அல்லது பாதுகாவலர்களின் ஒப்புதல் பெற்ற பிறகே நடத்த முடியும்.
ஒருவேளை பெற்றோர், பாதுகாவலர் சம்மதம் இன்றி நடத்தப்பட்டால் அந்த நிறுவனத்துக்கு சட்டரீதியான பிரச்னைகள் எழலாம்.

ஒருங்கிணைந்த ஓய்வூதியத் திட்டம்:தமிழக ஆசிரியர்கள் நிலைப்பாடு என்ன?

ஹேமா கமிட்டி அறிக்கையால் சிக்கித் தவிக்கும் கேரள திரையுலகம்

ஆன்மீகம் அறிவோம் | மூன்று சரீரங்கள் | 3 அனுபவ நிலைகள்!

Posted on September 6, 2024 by வெ நாராயணமூர்த்தி

வெ நாராயணமூர்த்தி

மூன்று சரீரங்கள் 3 அனுபவ நிலைகள் குறித்த ஒரு சுவாரஸ்மான தகவல் அடங்கிய ஆன்மீகம் அறிவோம் கட்டுரை இதில் இடம்பெற்றிருக்கிறது.

உள்ளடக்கம்

நண்பரிடம் கேட்ட கேள்வியும், அவரது பதிலும்

உங்களுக்கு எத்தனை உடல் இருக்கிறது? என்று ஒரு நண்பரைக் கேட்டேன். ஏன்
இப்படி கேட்கிறீர்கள்? என்று ஆச்சர்யத்துடன் பார்த்து, ‘ஒன்றுதான்’ என்றார்
உறுதியாக.

‘அய்யா ஒன்றல்ல மூன்று’ என்றதும் நண்பர் என்னை ஒரு மாதிரியாக அவநம்பிக்கையோடு பார்த்தார்.

சிறிது நேர யோசனைக்குப் பிறகு ‘கொஞ்சம் விளக்கமாகத்தான்
சொல்லுங்களேன்’ என்றார் அவர்.

ஆன்மீகம் அறிவோம்

கேளுங்கள். நாம் பார்க்கும், உணரும், வெளியே தெரியும் இந்த உடல் ஸ்தூல சரீரம்.
அதன் உள்ளே இன்னும் இரண்டு சரீரங்கள் மறைந்திருக்கின்றன.

அவை சூட்சும சரீரம், காரண சரீரம். இவை மூன்றும் சேர்ந்த கலவையே மனிதன் என்று
எடுத்துரைக்கின்றன நம் வேதங்கள். உலகின் மிகப் பெரிய அதிசயம் இது.

நாம் உணரும் இந்த ஸ்தூல சரீரம் என்பது பஞ்சபூதங்களால் (பூமி, நீர், காற்று,
நெருப்பு, ஆகாயம்) ஆனது.

ஸ்ரீ சங்கரர் தன்னுடைய ‘தத்வ போத’ என்ற நூலில், முற்பிறவிகளில் செய்த நல்ல கர்மங்களின் பலனாகவே மனித உடல் நமக்கு பரிசாகக் கிடைத்தது என்று இதை வர்ணிக்கிறார்.

உபநிஷத்துக்கள் சொல்வது என்ன?

சுக துக்கங்களை அனுபவிப்பதற்கும், அவைகளிலிருந்து தப்பித்துக் கொள்ளவும்,
முடிந்தால் நிரந்தரமாக அவைகளிலிருந்து விடுதலை பெறுவதற்கும், அதையும் கடந்து,
நம் தெய்வீகத் தன்மையை புரிந்து கொள்ளவும்தான் இந்த மனித உடல் அளிக்கப்பட்டுள்ளது என்று உபநிஷத்துகள் ஆணித்தரமாக எடுத்துக் கூறுகின்றன.

ஸ்தூல சரீரத்தின் இயல்பானப் பண்பே அது அழியும் வரை மாற்றங்களைச்
சந்திப்பதே.

இந்தச் சரீரம் அதன் வாழ்நாளில் ஆறு வகையான தொடர் மாற்றங்களைச்
சந்திக்கிறது.

அவை, கருவில் இருக்கும் நிலை (அஸ்தி), பிறத்தல் (ஜாயதே), வளர்தல்
(வர்ததே), பருவமடைதல் (விபரீணமதே), வயது முதிர்வு (அபக்க்ஷேயதே), இறப்பு
(விநாஷ்யதி).

இந்த உலகத்தோடு தொடர்பு கொள்ள, அனுபவங்கள் பெற ஸ்தூல சரீரத்தில் ஐந்து
புலன்கள் (கண், காது, மூக்கு, நாக்கு, சருமம்) உள்ளன.

இது நான்கு பாகங்கள் (தலை, கழுத்திலிருந்து இடுப்பு வரை உள்ள முண்டம், கைகள், கால்கள்) கொண்டது. வெளியே தெரியும் இந்த சரீரத்தை பார்க்கமுடியும், உணரமுடியும், பிறராலேயும் பார்க்க முடியும்.

ஸ்தூல சரீரம்

ஸ்தூல சரீரத்தை அனுபவிக்கும் நமக்கு தற்காலிகமாக வாழும் வீடுதான். எந்த
நேரத்திலும் இந்த வீட்டை காலி செய்ய வேண்டியிருக்கும். சில நேரங்களில் எந்த முன் எச்சரிக்கை இல்லாமலேயும், கால அவகாசம் வழங்காமலும் கூட.

இந்தச் சரீரம் நாம் உண்ணும் உணவால் பராமரிக்கபடுகிறது. பிராண சக்திகள் இது இயங்குவதற்கான ஆற்றலைத் தருகின்றன.

இயற்கையால் உருவானதால், இயற்கையின் மாற்றங்கள் அனைத்தும் சரீரங்களையும்
பாதிக்கின்றன. இந்த சரீரத்தின் முக்ய காரணமே, அது ஆரோக்யமாக வாழும் வரை,
அதை நல்ல வழியில் பயன்படுத்திக் கொள்ளவதே.

அதனுடைய இயக்கங்களுக்கு மரியாதை தந்து பராமரிக்க வேண்டும். ஆனால் கேளிக்கை அனுபவங்களுக்காக அதனுடனேயே ஒன்றிப் போய்விடக் கூடாது என்பதே வேதங்கள் நமக்கு விடுக்கும் எச்சரிக்கை.

சூட்சும சரீரம்

நாம் பார்க்க முடியாத, ஆனால் உணரக்கூடிய இன்னொரு சரீரமும் நமக்குள் மறைந்து
இருக்கிறது. இதை சூட்சும சரீரம் அல்லது லிங்க சரீரம் என்று நம் முன்னோர்கள்
அடையாளம் கண்டனர்.

இதுவும் பஞ்சபூதங்களால் ஆனது, ஆனால் ஸ்தூல சரீரத்தைப் போல வளர்வதுமில்லை, மடிவதுமில்லை, மாற்றங்களையும் சந்திப்பதும் இல்லை. இதுவும் முன்பிறவியில் செய்த நல்ல கர்மங்களின் பயனாக கிடைத்ததுதான் என்ற அடிப்படை ஆன்மீகம் அறிவோம்.

சூட்சும சரீரத்தின் தன்மை

ஸ்தூல சரீரத்தின் புலன்கள் வழியாக கிடைக்கும் அனைத்து தகவல்களும் இங்கேதான்
அனுபவங்களாகப் பகுத்தறியப் படுகின்றன.

இந்த சரீரத்தில் பத்து இந்த்ரீயங்கள் (எந்த்ரங்கள்) உள்ளன. அவை ஐந்து ஞானேந்த்ரீயங்கள், ஐந்து கர்மேந்த்ரீயங்கள். இவைகளைத் தவிர, ஐந்து தன்மாத்ரங்கள் உள்ளன.

ஸ்தூல சரீரத்தின் புலன்களிலிருந்து கிடைக்கும் அனுபவங்களான பார்த்தல், ருசித்தல்,
கேட்பது, வாசனை நுகர்தல், தொடு உணர்வு போன்றவைகளை நிர்வகிப்பது
ஞானேந்த்ரீயங்கள். ஞானேந்த்ரீயங்களுக்கு பக்க பலமாக பின்னின்று இயக்குபவை
ஐந்து கர்மேந்த்ரீயங்கள்.

ஸ்தூல சரீரத்தின் செயல்பாடுகளான பேசுவது, கைகளை இயக்கி பொருள்களைப் பிடிப்பது, கால்களை இயக்கி நடப்பது, கழிவுகளை வெளியேற்றுதல், இனப்பெருக்கம் செய்தல் ஆகிய செயல்பாடுகளை நிர்வாகம் செய்கின்றன.

புரியாத புதிர்!

இந்த இரண்டு வகையான இந்த்ரீயங்களின் பணிகளை கூர்ந்து கவனிக்க வேண்டும்.
பார்த்தல், ருசித்தல், கேட்டல், தொடு உணர்வு போன்ற அனுபவங்களை ஸ்தூல சரீரம்
உள்வாங்கிக் கொள்கிறது.

இந்த அனுபவங்களை அவைகளால் திருப்பி வெளியே அனுப்ப முடியாது. இந்த அனுபவங்களுக்கு பதிலாக பேச்சு ஒன்றைத்தான் ஸ்தூல சரீரம் உலகிற்கு வெளியனுப்புகிறது.

பேச்சு எப்படி உருவாகிறது? எங்கிருந்து எண்ணங்களும், சப்தங்களும் ஒன்று கூடி நாக்கை இயக்குகின்றன? இது புரியாத புதிர். உண்மையில் இதுவே தெய்வீகம். இதுதான் ஆன்மீகம் அறிவோம் என்பதன் தொடக்கம்.

உள் வாயில், வெளி வாயில்

அதைப் போலவே கை கால்களைப் பயன்படுத்திக் காரியங்களைச் செய்தல்,
கழிவுகளை வெளியேற்றுதல், இனப்பெருக்கம் செய்தல் போன்ற வெளி
செயல்பாடுகளை ஸ்தூல சரீரத்தின் வழியாக நிறைவேற்றப்படுகின்றன.

ஆக, ஞானேந்த்ரீயங்கள் ஸ்தூல சரீரத்துக்கு அனுபவங்களை உள்ளே அனுப்பும்
நுழைவாயில்கள்.

கர்மேந்த்ரியங்கள் ஸ்தூல சரீரத்தின் செயல்பாடுகளை வெளிக்கொணரும் வெளிவாயில்கள்.

இந்த்ரியங்களின் ஒரு குழு உலக அனுபவங்களை உள் அனுப்புகிறது, இன்னொரு குழு அதற்கான பதில் செயல்பாடுகளைத் திருப்பித் தருகிறது. என்ன ஆச்சர்யம் பாருங்கள்!

இதில் இன்னொரு ஆச்சர்யம், இந்த இந்த்ரீயங்களின் செயல்பாடுகள் நமக்குள் நம்
கட்டுப்பாடின்றி தொடர்ந்து நடைபெறுவதுதான்.

5 தன்மாத்ரங்கள்

அடுத்தது ஐந்து தன்மாத்ரங்கள். இவைகளை அதிசூட்சும சக்திகள் அல்லது இயக்கிகள்
என்று சாஸ்த்ரங்கள் அடையாளம் காட்டுகின்றன.

ஒரு வாஹனத்துக்கு சக்கரங்கள் மற்றும் ஏனைய கருவிகள் இருந்தால் மட்டும் போதாது. இயக்க சக்தியும் ஆற்றலும் வேண்டுமல்லவா?

அதற்காக சூட்சும சரீரத்தில் ஐந்து இயக்க சக்திகளாக ப்ராண, அபான, ஸமான, உதான, வியான ஆகிய சூட்சும இயக்கிகள் சரீரங்களுக்குத் தேவையான சக்தியையும் ஆற்றலையும் தருகின்றன.

நம் உடலை ஒரு வாஹனமாகப் பாருங்கள். அதன் பாகங்களை சரிவர நிர்வகித்தால்
அல்லவா அது சரியாக இயங்கமுடியும்? அந்தப் பணியைத்தான் தன்மாத்ரங்கள் செய்கின்றன. அதுவும் நமக்குத் தெரியாமலேயே, நம் கட்டுப்பாடின்றி.

என்னென்ன பணிகள்

ப்ராண (மூச்சு-தலை, இதயப் பகுதியை நிர்வகிக்க), அபான (இடுப்புப் பகுதி- கழிவுகளை வெளியேற்றுதல்), ஸமான (தொப்புள் பகுதி-ஜீரணம்), உதான (கழுத்துப்பகுதி-வளர்ச்சி,பேச்சு, பாவனைகளை வெளிப்படுத்துதல், இதைத் தவிர சில மேல்நோக்கிக் கிளம்பும் கழிவுகளான வாந்தி, தும்மல் ஆகியவைகளை வெளியேற்றுதல், இறப்பு நேரத்தில் சூட்சும சரீரம் இதன் சக்தியைப் பயன்படுத்தியே வெளியேறுகிறது),

வியான( ரத்தம், உணவுச் சத்து,ஆற்றல் ஆகியவைகளை அனைத்து பகுதிகளுக்கும்
கொண்டு சேர்ப்பது) ஆகிய ஐந்து வகையான இயக்கங்களை தன்னிச்சையாகவே
நிர்வகிக்கின்றன.

இந்த ஐந்து தன்மாத்ரங்களும் ஸ்தூல சரீரத்துக்கு மட்டுமல்லாது, பத்து
இந்த்ரீயங்களுக்கும் பலவகைகளில் உதவுபவை. இந்தப் இந்த்ரீயங்களோடு மனஸ்,
புத்தி ஆகியவை சேர்த்து மொத்தம் பதினேழு அம்ஸங்களும் சேர்ந்தததுதான் சூட்சும
சரீரம்.

ஸ்தூல சரீரமும், சூட்சும சரீரமும்

இந்தச் சரீரம் இல்லாவிட்டால் ஸ்தூல சரீரம் தன்னிச்சையாக இயங்க முடியாது.
ஸ்தூல சரீரம் உருவாகக் காரணமாக இருந்த பஞ்ச பூதங்களே அதிசூட்சும வடிவில்
சூட்சும சரீரத்த்தை உருவாக்குகின்றன. இயக்குகின்றன.

இரண்டு சரீரங்களும் ஒரே விதமான ஆதி பொருள்களால் உருவானவை. ஆனால் வெவ்வேறு கலவையில், வெவ்வேறு அளவில், வெவ்வேறு காரணகளுக்காக உருவாக்கப்பட்டவை.

ஸ்தூல சரீரம் அழிந்தாலும் சூட்சும சரீரம் அழியாமல், தொடர்ந்து இன்னொரு உடலில் வாழத் தொடங்குகிறது.

ஸ்ரீசங்கரர் தரும் விளக்கம்

சூட்சும சரீரத்தில் உள்ள மனதை, உணர்வுகளைப் பிரதிபலிக்கும் மனஸ், நினைவுகள்
கொண்ட ‘சித்த’, மற்றும் சரீரங்களுக்கு எஜமான எண்ணத்தை உருவாக்கும்
‘அஹங்காரம்’ என மூன்று பகுதிகளாகப் பிரித்து, அதனுடன் புத்தியையும் சேர்த்து
மொத்தம் பத்தொன்பது பொருள்கள் அடங்கியது சூட்சும சரீரம் என்று ஸ்ரீ சங்கரர்
என்று இன்னொரு விளக்கம் தந்தார்.

உலகத்துடன் தொடர்புகொள்ளும் கருவி

உலகத்தோடு நாம் தொடர்பு கொள்ள பயன்படும் ஒரு முக்கிய கருவியாக
பின்னனியில் சூட்சும சரீரம் பயன்படுகிறது.

இன்னும் சொல்லப்போனால் ஸ்தூல சரீரத்தை அனுபவிப்பவர் சூட்சும சரீரத்தின் வழியாகவேதான் உலக அனுபவங்களை உணரமுடியும்.

கண்கள் வழியாக ஒரு பொருளைப் பார்க்கிறோம் என்று வைத்துக் கொள்ளுங்கள். கண்களுக்கு ஒளியைத்தவிர வேறொன்றும் அடையாளம் தெரியாது. உருவங்களிலிருந்து பெறப்படும் ஒளியை சூட்சும உடலில் உள்ள இந்த்ரீயங்களால் மட்டுமே பகுத்து அவைகள் உருவங்களாகவும் பொருள்களாகவும்
உணர முடியும்.

அதுபோலவே மற்ற புலன்களிலிருந்து பெறப்படும் அனைத்துத் தகவல்களையும் இந்த்ரீயங்களால் மட்டுமே பகுத்து அனுபவங்களாக உணர வைக்கமுடியும்.

ஸ்தூல சூட்சும சரீர வியோக மரணம்

‘ஸ்தூல சூட்சும சரீர வியோக மரணம்’ என்று இறப்பை வேத சாஸ்திரங்கள் வெகு
அழகாக விளக்குகிறது.

அதாவது, ஸ்தூல சரீரத்திலிருந்து சூட்சும சரீரம் விலகிச் செல்வதே மரணம். ‘ஸ்தூல சூட்சும சரீர சம்யோக புனர்ஜன்மம்’.

அதாவது சூட்சும சரீரம் இன்னொரு உடலோடு சேர்வதையே பிறப்பு என்கிறது இந்த ஸ்லோகம்.

இதில் கவனிக்க வேண்டிய விஷயம் என்னவென்றால், ஸ்தூல சரீரம் செய்யும்
அனைத்து செயல்பாடுகளின் விளைவுகள் அனைத்தும், நல்ல விஷயங்களை
புண்யமாகவும், தீய செயல்களை பாவமாவும் சூட்சும சரீரத்தில் மென்பொருள் போல
சதா பதிவேற்றுகிறது.

இன்னொரு உடலோடு ஐக்கியம் ஆகும்போது இந்த பாவ புண்யங்கள் பதிவுகள் புதிய உடலை கட்டுப்படுத்துகிறது.

அவித்யா

இதை ஸ்ரீசங்கரர் ‘அவித்யா’ என்று வருணிக்கிறார். சாதாரணமாக அவித்யா என்பது
அறியாமை. ஆனால் இங்கே வேதங்கள் சொல்லும் இன்னொரு உண்மையைச்
சொல்கிறார் ஸ்ரீ சங்கரர்.

அவித்யா என்பதை ‘உண்மை வெளிவராத நிலை’ என்று இங்கே விளக்குகிறார். என்ன உண்மை?

சூட்சும சரீரமும், ஸ்தூல சரீரமும் இணைவதற்ககுத் தேவையான அடிப்படை தகவல்களை, ஆதி உண்மைகளை, ரஹஸ்ய சங்கேதங்களை (ஒரு வீடு கட்ட தேவைப்படும் வரைபடம் போல) இந்தக் காரண சரீரம் தன்னுள் விதையாகத் தாங்கியுள்ளது.

காரண சரீரம்

இந்த இரண்டு சரீரங்களோடு இன்னொரு சரீரமும் மறைந்துள்ளது. இதுவே காரண
சரீரம். இதையும் பார்க்கவோ, உணராவோ முடியாது.

மற்ற இரண்டு சரீரங்களைப் போலவே இந்த சரீரமும் அதே பொருள்களால் உருவாக்கபட்டது.

ஆனால் இவைகளை விட இன்னும் வீரியமான அதிசூட்சும வடிவில், அளவில்,
செயல்பாடுகளில் மாறுபடுகிறது.

உதாரணமாக, ஒரு மரம் உருவாவதற்கான அத்துணை அடிப்படைத் தகவல்களையும்,
உயிர் சக்திகளையும் அதன் விதை தாங்கியுள்ளது அல்லவா? அது கருவாகி
உயிர்ப்பிக்கும்போதே மரம் உருவாகிறது.

மரம் மீண்டும் விதையை உருவாக்குகிறது. அதுபோல சரீரங்கள் உருவாகத் தேவையான அனைத்து அடிப்படைத் தகவகளையும் இந்த காரண சரீரம் தாங்கியுள்ளது.

சரீரங்கள் உருவானபின் மீண்டும் விதையாக சூட்சும சரீரத்தோடு சூட்சுமாக இயங்குகிறது.

காரண சரீரமே பிரதானம்

காரண சரீரம் இல்லாவிட்டால் மற்ற இரண்டு சரீரங்களும் உருவாகவே முடியாது.
ஆகவே சரீரங்களுக்கு அடிப்படைக் காரணமாக, அஸ்திவாரமாக இருப்பதால் இது
காரண சரீரம்.

இந்த மூன்று சரீரங்களையும் தனித்தனியே பிரிக்க முடியாது. அவைகளின் செயல்பாடுகளைத் தனித்தனியாகவும் உணர முடியாது.

அவை தனித்தனியாகவோ தன்னிச்சையாகவோ இயங்கமுடியாது. அவை கூட்டாக மட்டுமே இயங்க முடியும். இது தெய்வீக விந்தை.

தொடரும் அனுபவங்கள்

இந்த மூன்று சரீரங்கள் வழியாகவே நமக்கு தினமும் மூன்று நிலைகளில் அனுபவங்கள்
தொடர்ந்து கிடைக்கின்றன. இங்கேதான் பல ரகசியங்கள் மறைந்து கிடக்கின்றன.

முதல் நிலை நாம் விழித்திருக்கும் நிலை. அடுத்தது உறக்கநிலை. கடைசியில் ஆழ்ந்த
உறக்க நிலை. இந்த மூன்று நிலைகளையும் நாம் ஆன்றாட வாழ்க்கையில் தொடர்ந்து
உணர்ந்து வருகிறோம்.

ஆனாலும் இதைப் பற்றி பெரும்பாலும் நாம் யோசிக்கவோ அல்லது புரிந்துகொள்ளவோ முயற்சிப்பது இல்லை.

நிரந்தர, தற்காலிக பதிவுகள்

விழித்திருக்கும் போது நம் புலன்கள் வழியாக இந்த உலகோடு தொடர்பு
கொள்கிறோம். இரண்டு நிகழ்வுகள் அப்போது நடைபெறுகிறது.

நமக்கு இந்த உலக அனுபவம் கிடைக்கிறது. இரண்டாவது, அனைத்து அனுபவங்களையும் (ரூபங்கள், சப்தங்கள், ருசிகள், வாசனைகள், தொடுஉணர்வுகள்) மனம் விடாமல் பதிவு செய்துக் கொள்கிறது.

நாள் கணக்கில், மாதக் கணக்கில், வருடக் கணக்கில், தொடர்ந்து பிறந்தது முதல் இறக்கும் வரை பதிவு தொடர்கிறது.

சில பதிவுகள் மறக்காத நினைவுகளாகின்றன. சில பதிவுகள் தற்காலிகமான பதிவுகளாகின்றன.

அடுத்து வரும் பிறப்புகளுக்கும் இது தொடர்கிறது. இந்த பதிவுகளை எப்படி, எங்கே சேர்த்து வைத்துக் கொள்கிறது? எப்படி வெளிப்படுகிறது? தெரியாது.
இது தேவ ரகசியம்!

அதிசய உலகம்

நாம் தூங்கும்போது, உறக்க நிலையில் இன்னொரு உலகத்துக்கு செல்கிறோம். இது
நம் மனம் ஸ்ருஷ்டி செய்யும் அதிசய உலகம்.

அங்கே வெளி உலகம் மறைந்து விடுகிறது. ஸ்தூல சரீரம் உள்கொணரும் உணர்வுகள் அனைத்தும் மறைந்து விடுகின்றன. ஸ்தூல சரீரத்தின் வெளி புலன்களின் செயல்பாடு இல்லை. அடங்கிவிடுகின்றன.

இந்நிலையில், ஸ்தூல சரீரம் இருப்பதை மற்றவர்கள் காண முடியும். ஆனால் உறங்குபவர் அதைக் காணவோ உணராவோ முடியாது.

இந்த நிலையில் சூட்சு சரீரத்தின் முக்கிய அங்கமான மனம் மட்டுமே தொடர்ந்து
செயல்படுகிறது.

ஏற்கனவே பதிவு செய்யப்பட்ட நினைவுகளின் அடிப்படையில் (சில நேரங்களில் சென்ற பிறவிகளின் அனுபவங்களும் சேர்த்து) மனத்திரையில் செயற்கையாகப் பிரதிபலிக்கும். அந்த உள் உலகத்தில், விழித்திருக்கும் நிலையில் உணர்ந்தது போலவே அனைத்தையும் உணர முடிகிறது.

ஆனால் இந்த உணர்வுகள் அனைத்தும் விழித்தவுடன் மறைந்து போகின்றன. சொல்லப்போனால், பெரும்பாலான நேரங்களில் விழித்திருக்கும் நிலையிலேயும் நாம் கற்பனை உலகில் அல்லவா சஞ்சரிக்கிறோம்?

இதுவும் மனம் ஸ்ருஷ்டிக்கும் ஒருவகையான கனவுலகம்தான். இதுவும் நிலையானது அல்ல!

உறக்க நிலையில் கனவுகள் மறைந்தவுடன் சில நேரங்களில் ஆழ்ந்த உறக்க
நிலைக்கும் செல்ல முடிகிறது.

மனம் அடங்கினால்

அங்கே மற்ற இரண்டு சரீரங்களின் வெளிப் புலன்களும், உள்புலன்களும் தங்கள் செயல்பாடுகளை நிறுத்திக்கொள்கின்றன. மனம் அடங்கிவிடுவதால் எந்த நினைவும் பிரதிபலிக்கப் படுவதில்லை.

அப்போது ஸ்வாசித்தல், ரத்த ஓட்டம், ஜீரணம் போன்ற சில அத்யாவஸ்ய தேவைகள் மட்டும் ஸ்தூல சரீரத்தில் நடைபெறுகிறது.

இந்த நேரத்தில் இரண்டு சரீரங்களும் முழுதும் ஆழ்ந்து ஓய்வெடுத்துக் கொள்கின்றன. இந்த நிலையிலிருந்து விழித்தெழும்போதுதான் இரண்டு சரீரங்களும் மிகவும் புத்துணர்வுடன் வெளிப்படுகின்றன.

‘நான் ஒரு மரக்கட்டையைப் போல தூங்கினேன்’ என்று பலர் இந்த அனுபவத்தை
வெளிப்படுத்துவதை நாம் பார்த்திருக்கிறோம். நாமும் உணர்ந்திருக்கிறோம்.

காரண சரீரத்தில் உருவாகும் விதை

இந்த ஆழ்ந்த உறக்க நிலையில் இன்னொரு விசேஷமும் நடக்கிறது. இங்கேதான்
காரண சரீரம் தன் பணியை செய்கிறது.

இந்த நிலையில் அத்துணை இந்த்ரீயங்களும் செயல்பாடுகளும், எண்ணங்களும், நினைவுகளும், அஹங்காரம் அனைத்தும் காரண சரீரத்ததுள் விதையாக தற்காலிகமாகக் கரைந்து விடுகின்றன.

அப்போது மற்ற இரண்டு சரீரங்கள் இருந்தாலும் உணர இயலாத ஒரு நிலை. ஆனால்
விழித்தெழும்போது, அனைத்தும், விதையிலிருந்து முளைத்து மீண்டும் பழைய
நிலைக்கு உயிர்த்தெழுகின்றன. என்ன ஒரு விந்தை பாருங்கள்!

விழித்திருக்கும் நிலையிலும், உறக்க நிலையிலும் நம் அனுபவங்கள் அனைத்தும்
நம்மால் மட்டுமே உணரப்படுபவை.

அவை அனைத்தும் நம் அனுபவங்களின் அடிப்படையில் உருவாகுபவை. அவை அனைத்தும் நம் அனுபவங்களில் புலப்படும் தோற்றங்கள். தோன்றி மறையும் தன்மை கொண்டவை. நிலையானவை அல்ல.

இதில் நாம் (அனுபவிப்பவர்) மட்டுமே உண்மை, மற்றவை அனைத்தும் அனுபவங்களுக்குள் வந்து போகும் தோற்றங்கள்!

நாம் யார்?

இங்கே, இதில் கவனிக்க வேண்டியது ஒரு விஷயம். ‘நாம்’ என்று குறிப்பிட்டது
ஸ்தூல, சூட்சும காரண சரீரங்களையோ அல்லது அவைகளின் கலவையையோ
அல்ல.

இந்த மூன்று சரீர அனுபவங்களை உணர்த்தும், ஸ்வயமாக, கோடி சூர்யப்
பிரகாசமாக சதா ஒளிர்ந்துக்கொண்டிருக்கும் ஆத்மஜோதி. நம் உண்மை ஸ்வரூபம்.
இந்த ஜோதிக்குள் தொடர்ந்து பிரதிபலிக்கும் அனுபவக் குவியலே இந்த மூன்று
சரீரங்களும்.

கடஉபநிஷதம் இன்னும் ஒரு படி மேலே சென்று, வானத்தில் தெரியும் இந்த உலகிற்கு
ஒளி தரும், சூர்யனை அடையாளம் காட்டுவதே நம் ஆத்மஜோதி சூர்யனே என்று
போதனை செய்கிறது.

மூன்று சரீரங்களையும், மூன்று அனுபவ நிலைகளையும் நாம் பகுத்தறியும்போது, நம் ஆத்ம ஜோதியை உணரமுடிகிறது. இதுவே தெய்வீகம்.

இதுவே நம் உண்மையான இயல்பு. இதுவே வேதங்கள் கூறும் மோட்சம், முக்தி,
வாழும்போதே விடுதலை.

இனியும் விடை தேடலாமா?

இந்த உடல், மனம், எண்ணம் சேர்த்த கலவையே நாம் என்று நம்மை சிறுமைப்
படுத்திக்கொண்டு வெளியே தெரியும் உடலோடு சேர்ந்துகொண்டு ‘யாவத் ஜீவேத்,
சுகம் ஜீவேத்’ (வாழ்க்கையை சுகத்தில் அனுபவிப்பதே லட்சியம்) என்று தொடர்ந்து
பல தவறுகளை செய்கிறோம்.

நிலையில்லாத ஒரு தோற்றத்தை உண்மை என்று நம்பி, வாழ்க்கையை வீணடிக்கிறோம், அதனால் அதிக சோகத்தையும், துயரத்தையும் சந்திக்கிறோம், நிலை தடுமாறி நிற்கிறோம். விடை தேடி அலைகிறோம்.

நம்மைப் பற்றிய, நம் உண்மையான இயல்பைப் பற்றிய, நம் தெய்வீகத் தன்மையைப் பற்றிய தெளிவு ஏற்பட்டால் நாம் செய்து வரும் தவறுகள் புரியும். தெய்வீகத்தால் உருவாக்கப் பட்ட தெய்வீகப் பிறவிகள் நாம்.

ஆனால் மனித உருவில் இருந்துகொண்டு தெய்வீகத்தை தேடி அலையும் சாதாரணப் பிறவிகள் என்று வாழ்கிறோம்!

இந்த மூன்று நிலைகளிலும் விழித்திருக்கும் நிலையிலேயே கண் முன் தெரியும்
உலகத்தோடு நல்ல முறையில் உறவாட வாய்ப்பு கிட்டுகிறது.

வேதங்கள் இந்த நல்லமுறையில் உறவாடும் விதத்தை சனாதன தர்ம வழி என்று வர்ணிக்கிறது. இது இரண்டு விஷயங்களைப் பற்றி பேசுகிறது.

ஒன்று ‘பிரவர்த்தி’ அதாவது, நம் வெளி உலக வாழ்க்கையை எப்படி நல்ல முறையில் வாழ்வது? இரண்டாவது ‘நிவர்த்தி’ நம்மை, நமக்குள் இருக்கும் உள்உலகத்தை எப்படி உணர்ந்து எப்படி விடுதலை பெறுவது என்பது.

முதலில் வெளியுலக வாழ்க்கையை சமாளிக்க நம்மை தயார் படுத்திக்
கொள்ள வேண்டும். நல்ல விஷயங்களைக் கேட்டுத் தெரிந்து கொள்ள வேண்டும்.

மற்றவர்களுக்கு உதவுதல், தான தர்மம் செய்தல், பக்தி, கனிவு, தன்னலமற்ற சேவை
போன்ற நற்பண்புகளை வளர்த்துக் கொள்ளுதல், அவைகளுக்குள் மறைந்திருக்கும்
உண்மைகளை உணரவேண்டும். இது வேதங்கள் சொல்லித்தரும் எளிய வழி.

தெளிவு தரும் தான, தர்மம்

தெளிவு ஏற்பட்டால் அது நல்ல சிந்தனைகளை உருவாக்கும். நல்ல சிந்தனைகளை
செயல்படுத்தும் தைரியமும் நம்பிக்கையும் கிடைக்கும். இது மேலும் நல்லக்
காரியங்களைச் செய்யத் தூண்டும்.

தான, தர்மங்களில் ஈடுபடுவது, அனைவரிடமும் ஹிதமாக நடந்துகொள்வது போன்றவை அனைத்தும் நமக்கு புண்யங்களைச் சேர்ப்பவை.

அவை அனைத்தும் ஸ்தூல சரீரம் இறக்கும்போது, சூட்சும, காரண சரீரங்களில்
பதிவாகி, அடுத்த உடலுக்கு செல்கின்றன.

இது நாம் அடுத்த வேறு உடலுக்கு செய்யும் நேரடி தானம். ஒரு வேளை மீண்டும் நம்முடனேயே இந்த இரண்டு சரீரங்களும் சேரும் பட்சத்தில் புண்யங்களோடு புதிய வாழ்வு கிடைக்கிறது.

இல்லாவிட்டாலும் நம்மால் நிச்சயமாக நல்ல சிந்தனையுள்ள இன்னொரு தலைமுறையை உருவாக்க முடியும் அல்லவா?

குறைந்த பட்சம், மூன்று சரீரங்களும், மூன்று அனுபவ நிலைகளும் பற்றிய ஒரு
தெளிவு இருந்தால், ஸ்தூல சரீர சுகத்தைத் தேடும் உந்துதல்கள் குறையும் அல்லவா?

தர்ம சிந்தனைகளோடு, தார்மீக வாழ்க்கை முறைகளை ஏற்றுக்கொள்ளும் ஒரு
பக்குவம் கிடைக்குமல்லவா?

மீதமுள்ள வாழ்வு வளம்பெற வாய்ப்பு உருவாகுமல்லவா? இந்தப் பக்குவம் சாதாரணமாக கிடைப்பது இல்லை. இதற்கு கடுமையான பயிற்சி, முனைப்பு ஆகியவை தேவை.

இவை அனைத்தும் முற்றும் உணர்ந்த பிரம்மகுரு ஒருவரின் ஆசியுடன், வழிகாட்டுதலுடனும், படைத்தவனின் அருளாசியும் இருந்தால் மட்டுமே சாத்தியம்.

Spiritual thoughts

‘அடேயப்பா, இவ்வளவு அதிசயங்கள் நமக்குள்ளும், நம்மைச் சுற்றியும்
நடந்துகொண்டிருக்கிறதா? ஒரே மலைப்பாக இருக்கிறது’ என்று அங்கலாய்த்தார்
நண்பர்.

‘என் வாழ்நாளில் பெரும்பகுதி கழிந்த பின்னர், இவ்வளவு நல்ல விஷயங்களை ஆன்மீகம் அறிவோம் என்று நீங்கள் எனக்கு போதித்ததன் மூலம் இப்போதாவது தெரிந்துகொள்ள முடிந்தது. மீதி நாளிலாவது இந்த
உலகத்தோடு நல்ல முறையில் உறவாட முயல்கிறேன் என்று மிக அழுத்தமாகச் சொன்னார்.

முதலில் என் குடும்பத்தாற்கும் நண்பர்களுக்கும் இந்தத் தகவல்களைச் சொல்லி அவர்களையும் கரைசேர்க்கப் பார்க்கிறேன்’ என்று நன்றி சொல்லி புறப்பட்டார் அந்த நண்பர்.

ஒலிம்பிக் பின்னாள் மறைந்திருக்கும் அதிசயங்கள்

கண்ணால் காண்பதும் பொய் – நேரடி அனுபவம்

தெய்வம் எப்போது துணை நிற்கும்? – திருக்குறள் கதை 35

Posted on September 5, 2024 by L. இராஜேந்திரன்

குறளமுதக் கதைகள் வரிசையில் ஒருவருக்கு தெய்வம் எப்போது துணை நிற்கும்? என்ற கேள்விக்கு விடைத் தரும் சிறு கதையும், திருக்குறள் விளக்கமும் இடம்பெற்றிருக்கிறது.

உள்ளடக்கம்

திருக்குறள் கதைகள் 35

காலை நேரம். அன்றைய நாளிதழ்களை படித்துவிட்டு, வீட்டு வாசலில் அமர்ந்து சாலையில் போவோரையும், தூரத்தில் மரத்தில் அமர்ந்து தனது இனிய குரலை எழுப்பிக் கொண்டிருந்த குயிலின் குரலையும் ரசித்தபடியே அமர்ந்திருந்த தர்ம நாதரைத் தேடி விமலை வந்தார்.

தர்ம நாதர் விமலையைக் கண்டதும், வாம்மா… எப்படி இருக்கிறாய். பார்த்து வெகு நாளாகிவிட்டதே? எங்கே என் நண்பர் வரவில்லையா? என்று கேட்டார்.

காலை நேரத்திலேயே வெயில் சுட்டெரிக்கத் தொடங்கிவிட்டது. அவர் திரும்ப வீட்டுக்கு வெயிலில் போக முடியாது என்பதால் வரவில்லை என்றாள் விமலை.

அண்ணா… ஒரு சந்தேகம். நமக்கு தெய்வம் உதவி செய்யுமா? என்று கேட்டார்.

இதைக் கேட்டதும், தர்ம நாதர் வாய்விட்டு சிரித்தார். நல்ல கேள்வி கேட்டாயம்மா… இதற்கு ஒரு கதையுடன்தான் உனக்கு பதில் சொல்லியாக வேண்டும்.

திண்ணையில் உட்கார்… அந்த கதையை கேட்டுவிட்டு போ என்றார் தர்ம நாதர்.

ஏழ்மையில் ஆடு மேய்ப்பவன்

வறுமையில் வாடிய ஒருவனுக்கு தெய்வம் துணை நின்ற கதைதான் இது. அவனுடைய பெயர் கோவிந்தன். சிம்மபுரம் என்ற ஊரில் வசித்து வந்தான்.

ஒரு நாள் அவன் ஆடு, மாடுகளை மேய்ப்பதற்காகச் சென்றான். அப்போது அவன் சமாதி குப்தர் என்ற முனிவரைக் கண்டான்.

அவரை கண்ட அவனுக்கு அவரிடம் பேச வேண்டும் என்று தோன்றியது. அதனால் அவர் அருகே சென்று வணங்கினான்.

முனிவரிடம் ஆசிர்வாதம்

முனிவரே… பிறந்தது முதல் ஏழ்மையில் நான் வாடுகிறேன். என்னுடைய ஏழ்மையை போக்க ஏதேனும் ஒரு வழி சொல்லுங்கள் என்று கேட்டான்.

அவனுடைய கேள்வியை கேட்ட அவர் மௌனமாக புன்னகைத்தார். அதைத் தொடர்ந்து உனக்கு தர்மலாபம் உண்டாகட்டும். செல்வமும், சொல் வலிமையும், தோள் வலிமையும் உண்டாகட்டும்.

அவற்றால் கொடை உள்ளம் கொண்டு நீ அனைவரையும் காப்பாறுக.

நீ தர்மம் செய்வதை பழகிக் கொள். தர்மம் செய்வதை எக்காரணம் கொண்டும் நிறுத்திக் கொள்ளாதே என்று ஆசிர்வதித்தார்.

நீ சமண ஆகம நூல்களில் ஒன்றாக விளங்கும் பக்தா மர சுலோகங்கள் 31, 32 ஆகியவற்றை தொடர்ந்து படித்து வருக. அதனால் உனக்கு புண்ணிய பலன் கிட்டும் என்று சொல்லி அனுப்பினார்.

அன்னையின் அருள்

முனிவரின் வாக்கை பின்பற்றத் தொடங்கினான் கோபாலன். அவன் தொடர்ந்து ரிஷபநாத பகவானை பூஜித்து வந்தான்.

அவனுடைய விடா முயற்சியையும், சிரத்தையையும் கண்ட சக்ரேஸ்வரி அம்மன், அவன் முன்னே தோன்றினாள்.

கோபாலனே… உன் பக்தியை மெச்சினோம். நீ விரைவில் இந்நாட்டின் அரசனாவாய். தர்ம காரியங்களை செய்து மென்மேலும் நற்பதவிகளை அடைவாய் என்று ஆசிர்வதித்து மறைந்தாள்.

கோபாலன் தன்னுடைய நித்திய கடமைகளை தவறாமல் செய்து வந்தான்.

மாலை சூட்டிய பட்டத்து யானை

ஒரு நாள் அந்த நாட்டின் அரசன் திடீரென இறந்து போனான். அவனுக்கு வாரிசுகள் யாரும் இல்லாத நிலை ஏற்பட்டது.

இதை அறிந்து அண்டை நாட்டு மன்னன் போர் புரிய படைகளோடு புறப்பட்டான். இக்கட்டான நிலையில் அமைச்சர்கள் ஒன்று கூடி விவாதித்தனர்.

தெய்வத்தின் முன் திருவுளச் சீட்டு குலுக்கி போட்டனர். பட்டத்து யானை மூலம் ஒரு தகுதியானவனை நாட்டு அரசனாக தேர்வு செய்யுமாறு தெய்வக் கட்டளை வந்தது.

அதன்படி, பட்டத்து யானையிடம் மலர் மாலையை கொடுத்து நகரை வலம் வரச் செய்தார்கள்.

அந்த நேரத்தில் கோபாலன் எந்த சிந்தனையும் அற்று ரிஷபர் படிமைக்கு பூஜை செய்துக்கொண்டிருந்தான்.

இதைக் கண்ட பட்டத்து யானை அவனுடைய கழுத்தில் மாலையை போட்டது. அதையடுத்து அமைச்சர்களும், மக்களும் அவனை வரவேற்று அரியாசனத்தில் அமர வைத்தார்கள்.

பக்தி சொற்பொழில் ஒரு தகவல்

படை திரண்டு வந்த அண்டை நாட்டு அரசனை தன்னுடைய விவேகத்தால் சாதுர்யமாக படைகளை நடத்தி வெற்றி கண்டான் கோபாலன்.

எல்லாம் ஏதோ ஒரு மாயாஜாலம் போல் நடந்தது. இது கோபாலனுக்கு மட்டும் நடக்கும் மாயாஜாலம் அல்ல.

இந்த பூமியில் எவன் ஒருவன் பலன்களை எதிர்பாராது, தர்ம காரியங்களில் ஈடுபடுகிறானோ, அவனையே தெய்வம் ராஜ பதவியில் அமர வைக்கும்.

திருக்குறளும், அதன் விளக்கமும்

குடி செய்வல் என்னும் ஒருவற்குத் தெய்வம்

மடிதற்றுத் தான்முந் துறும்

(குறள்- 1023)

தன்னைச் சேர்ந்த குடிமக்களை உயர்வடையச் செய்யும் ஒருவனின் செயலுக்கு தெய்வம் தன் ஆடையை இறுக உடுத்திக்கொண்டு (சொல் வழக்கில் – கச்சைக் கொண்டு) உதவ முன்வந்து நிற்கும் என்பதுதான் இதன் பொருள் என்றார் தர்மநாதர்.

அண்ணா, இன்றைக்கு ஒரு நல்ல சிந்தனையைத் தூண்டும் கதையையும், குறளையும் கேட்கும் வாய்ப்பு உங்களை சந்தித்ததால் கிடைத்தது. மகிழ்ச்சி.

நானும் இறைவனின் துணை நாடி நம்பிக்கையோடு காத்திருக்கிறேன் என்று சொல்லி விடை பெற்றாள் விமலை.

திருக்குறள் கதைகள் 34 – எது வலிமை?

பக்தி சொற்பொழிவில் இடம்பெற்ற தகவல் பலகை (நகைச்சுவை)

கேள்வியும் பதிலும்

திருக்குறள் ஆசிரியரின் சிறப்பு பெயர்கள் எவை?

குந்தக் குந்தர், தேவர், நாயனார், தெய்வப் புலவர், செந்நாப்போதகர், பெருநாவலர், பொய்யில் புலவர், பொய்யாமொழிப் புலவர், மாதானுபங்கி

திருக்குறள் எத்தனை அதிகாரங்களை உடையது

133 அதிகாரங்களைக் கொண்டது திருக்குறள்

ஒரு அதிகாரத்தில் எத்தனை பாடல்கள் இடம் பெற்றுள்ளன?

ஒவ்வொரு அதிகாரமும் 10 குறட்பாக்களைக் கொண்டிருக்கிறது.

எத்தனை குறட்பாக்களைக் கொண்டது?

1330 குறட்பாக்களைக் கொண்டது திருக்குறள்.

எத்தனை மொழிகளில் மொழியாக்கம் செய்யப்பட்டிருக்கிறது?

120-க்கும் மேற்பட்ட மொழிகளில் மொழியாக்கம் செய்யப்பட்டிருக்கிறது.

திருக்குறளை முதலில் அச்சில் பதிப்பித்தவர் யார்?

கி.பி.1812-ஆம் ஆண்டில் தஞ்சை ஞானப்பிரகாசர் என்பவர், மரத்தால் ஆன அச்சு எழுத்துக்களைக் கொண்டு திருக்குறளையும், நாலடியாரையும் அச்சு நூலாக வெளியிட்டார்.

எது வலிமை? – திருக்குறள் கதை 34 சொல்வதென்ன?

Posted on September 4, 2024 by L. இராஜேந்திரன்

குறளமுதக் கதைகள் வரிசையில் (திருக்குறள் கதை 34) எது வலிமை என்ற பொருளை தரும் குறளையும், அது தொடர்பான விளக்க சிறுகதையையும் உள்ளடக்கியதாக அமைந்திருக்கிறது.

உள்ளடக்கம்

அரசனும், கிளிகளும்

ஒரு நாட்டை ஆண்ட அரசன் காட்டுக்கு குதிரையில் பயணமானார். அவரை மரம் ஒன்றில் அமர்ந்திருந்த கிளி ஒன்று பார்த்தது.

உடனே அது அடி, உதை, பிடி, கொள்ளையடி என்று கத்தியது. இது அரசனுக்கு மிகுந்த ஆச்சரியத்தைக் கொடுத்தது.

அவர் அந்த ஆச்சரியம் அடங்குவதற்குள் மற்றொரு மரத்தில் இருந்த கிளி வாங்க… வாங்க.. என்று அழைத்தது.

அரசனுக்கு அவனுடைய கண்களை நம்ப முடியவில்லை. இரு கிளிகளையும் யாரோ பேசுவதற்கு பழக்கப்படுத்தியிருக்கிறார்கள் என்பது மட்டும் புரிந்தது.

அரண்மனைக்கு திரும்பி வந்த அரசன், தன்னுடைய அமைச்சரை அழைத்து இந்த அதிசயத்தைச் சொன்னார்.

அமைச்சரின் விளக்கம்

இதைக் கேட்ட அமைச்சர் சொன்னார். ஒரு கிளியை வளர்த்தவர்கள் தீயவர்கள். அதுவும் கொள்ளையர்கள். அவர்கள் என்ன பேசுகினார்களோ… அதையே அது பின்பற்றி பேசியது.

மற்றொரு கிளியோ, நல்லவர்களின் வளர்ப்பாக இருந்திருந்திருக்கிறது. அந்த கிளியை வளர்த்தவர்கள் உபசரிப்பு எண்ணம் கொண்டவர்களாக இருந்திருக்கிறார்கள்.

அதனால் இரு கிளிகளும் வெவ்வேறு வார்த்தைகளை பேசியதில் ஒன்றும் ஆச்சர்யம் இல்லை.

இது கிளிகளுக்கு மட்டுமல்ல, மனிதர்களுக்கும் பொருந்தும். ஒருவன் நல்லவர்களோடு சேர்ந்து பழகினால்,அவனுக்கு நல்ல எண்ணங்களும், நல்ல வார்த்தைகளுமே வெளிப்படும்.

ஒருவன் தீயவர்களோடு பழகினால், தீய குணங்கள் தொற்றிக் கொள்வதோடு, மற்றவர்களை மிரட்டும் வார்த்தைகளையும், காயப்படுத்தும் வார்த்தைகளையுமே பேசும் குணம் ஏற்பட்டுவிடும்.

தம்மிற் பெரியார் தமரா ஒழுகுதல்

வன்மையு ளெல்லாந் தலை .

(குறள்- 444)

எது வலிமை?

தம்மினும் அறிவில் சிறந்த பெரியவர்களை தனது சுற்றமாகச் சேர்த்துக் கொண்டு அவர் வழி நடத்தலே ஒருவரின் வலிமைகளில் எல்லோவற்றிலும் சிறந்த வலிமை என்கிறார் குந்த குந்தர் என்றார் அமைச்சர்.

திருக்குறள் கதைகள் 33 – உள்ளத்தால் உயர்வு

கடலுக்கு அடியில் ஆக்சிஜன் உற்பத்தி எப்படி

பூண்டு பயன்கள்: உடல் நலன் சார்ந்த அரியத் தகவல்கள்

Posted on August 31, 2024 by RR

மனித வாழ்வுக்கு பூண்டு பயன்கள் எண்ணற்றவையாக அமைந்திருக்கிறது.. அதனால் நாம் அடிக்கடி உணவில் இதை சேர்த்துக் கொள்வது நல்லது.

பண்டைய காலத்திலேயே பூண்டின் மகத்துவம் அறிந்து அதை முக்கிய பயிராக பயிரிட்டு வந்திருக்கிறார்கள்.

உள்ளடக்கம்

பூண்டு உற்பத்தியில் சீனா முதலிடம்

பூண்டில் 450 வகைகள் உள்ளன. பூண்டின் மருத்துவ குணத்தை பண்டைய மக்கள் அறிந்து அதை பயன்படுத்தி வந்திருக்கிறார்கள்.

பூண்டு ஆசிய கண்டத்தில் தோன்றியதாக இருந்தாலும், அதனுடைய பெயர் ஆங்கிலோ-சாக்சன் பேச்சு மொழியில் இருந்து பெறப்பட்டிருக்கிறது.

தற்போது உலகில் அதிக அளவில் உற்பத்தி செய்யும் நாடுகளில் சீனா முதலிடம் பெற்றிருக்கிறது.

மருத்துவத்தில் பூண்டு பயன்கள்

மனித உடலில் அளவுக்கு அதிகமான கெட்ட கொழுப்பை கரைக்கும் ஆற்றலை பூண்டு பெற்றிருக்கிறது. அத்துடன் தோல் பிரச்னைகளையும் அது நீக்கக் கூடியது.

அதேபோல் இதய நோயை எதிர்த்து போராடுவதில் பூண்டில் உள்ள சில அமிலங்கள் முக்கியத்துவம் புெற்றிருக்கின்றன.

குறைந்த கலோரிகள் ஆனால் ஊட்டச்சத்து மிகுந்தது பூண்டு.

தமிழகத்தில் பூண்டு எங்கு விளைகிறது?

தமிழகத்தில் திண்டுக்கல் மாவட்டத்தில் உள்ள கொடைக்கானல் சுற்றுவட்டாரப் பகுதிகள், நீலகிரி மாவட்டம், ஊட்டி சுற்றுவட்டாரப் பகுதிகளில் அதிக அளவில் பூண்டு விளைவிக்கப்படுகிறது.

பூண்டு செடி எவ்வளவு உயரம் வளரும்?

பூண்டு செடி பச்சை நிறத்துடன் கூடிய தண்டு, இலை வேர், கிழங்கு என்ற அமைப்பைக் கொண்டது. இது சுமார் ஒரு மீட்டருக்கும் குறைவான உயரம் வளரக் கூடியது.

பூண்டு செடியின் ஆயுள் காலம் எவ்வளவு?

பூண்டு செடிகளில் பல வகைகள் உண்டு. ஓராண்டு தாவரம், ஈராண்டு தாவரம், பல்லாண்டுகள் நீடித்து வாழும் தாவர வகைகள் உண்டு.

பூண்டை எங்கு சாகுபடி செய்யலாம்?

இது ஒரு பருவகால பயிர். கடல் மட்டத்தில் இருந்து 1200 முதல் 2000 மீட்டர் உயரமுள்ள இடங்களில் நிலவும் சீதோஷ்ண நிலையில் நன்கு வளரக் கூடியது.
பூண்டின் வளர்ச்சிக்கு குளிர்ச்சியான ஈரப்பதமுடைய வெப்பநிலை உதவுகிறது.

குழந்தைகள் அதிகம் தொலைக்காட்சி பார்ப்பதால் வரும் பாதிப்பு என்ன?

உடல் நலத்தில் பூண்டு பயன்கள் பற்றி அறிந்துகொள்ள இந்த வெப்-ஸ்டோரீஸ் காணுங்கள்.

Garlic Health Benefits: பூண்டின் மருத்துவ குணங்கள்

Exit mobile version