தேர்தலில் தொடரும் வெறுப்புணர்வு பேச்சுக்கள்

தேர்தலில் தொடரும் வெறுப்புணர்வு பேச்சுக்கள்

சென்னை: மக்களவைத் தேர்தல் பிரசாரங்கள் தொடர்ந்து வரும் நிலையில், ஆளும் பாஜகவின் மத ரீதியான வெறுப்புணர்வு பிரசாரம் அதிகமாக தலைதூக்கியுள்ளது. ஆனால் தேர்தல் ஆணையம் இந்த பிரசாரங்களை கண்டுகொள்ளாமல் போயுள்ளது எதிர்க்கட்சிகளிடையே தேர்தல் ஆணையத்தின் மீதான நம்பிக்கையை குறைத்திருக்கிறது.

பல்வேறு அரசியல் விமர்சகர்களும் தேர்தல் ஆணைய அதிகாரிகள் தலையாட்டி பொம்மைகளாக ஆளும்கட்சிக்கு சாதகமாக நடந்துகொள்வதாகவும், தேர்தல் முடிந்து வாக்குகள் எண்ணப்படும்போது அது நடுநிலையாக இருப்பதற்கான வாய்ப்புகள் குறைந்திருப்பதாகவும் கருத்துத் தெரிவிக்கத் தொடங்கியிருக்கிறார்கள்.

தேர்தல் ஆணையத்துக்கு அவப்பெயர்

இதுவரை எந்த தேர்தல் ஆணைய தலைமைக்கும் கிடைக்காத அவப்பெயர் தற்போதைய தலைமை தேர்தல் ஆணையர் ராஜீவ் குமார், துணைத் தேர்தல் ஆணையர்கள் சுக்நீர் சிங் சந்த், ஞானேஷ் குமார் ஆகியோருக்கு ஏற்பட்டிருக்கிறது.

ஏற்கெனவே மதரீதியான பிரதமர் மோடியின் விமர்சனத்துக்கு பெயர் அளவில் பிரதமர் சார்ந்த கட்சிக்கு நோட்டீஸ் அனுப்பியசும் கூட தேர்தல் ஆணையத்தின் மீது கடும் விமர்சனம் முன்வைக்கப்பட்டிருக்கிறது.

இந்த நிலையில், மீண்டும் இஸ்லாமிய வெறுப்பு பிரசார நோக்கத்தில், பாஜகவின் அதிகாரப்பூர்வ சமூக வலைதள பக்கங்களில் கேலிச்சித்திர காணொளி ஒன்று காணப்படுகிறது.

“ஜாக்கிரதை” என்ற தலைப்பிட்டிருக்கும் அந்த காணொளியில், ராகுல்காந்தி, சித்தராமையாவுடன் இணைந்து ஓபிசி, எஸ்சி, எஸ்டி இடஒதுக்கீடுகளுடன் இஸ்லாமியர்களுக்கான இடஒதுக்கீட்டை சேர்ப்பதாகவும், இஸ்லாமியர்களுக்கு மட்டுமே அதிக அளவில் நிதி ஒதுக்குவதால் அவர்கள் வளர்ச்சி அடைந்து மற்றவர்களின் இடஒதுக்கீட்டை பறிப்பது போன்றும் இந்த காணொளியில் சித்தரிக்கப்பட்டுள்ளது.


இது தொடர்பாக இதுவரை தேர்தல் ஆணையம் எந்த நடவடிக்கையும் எடுக்காதது பற்றி பல்வேறு தரப்பிலும் தேர்தல் ஆணையத்தை விமர்சிக்கத் தொடங்கியிருக்கிறார்கள். இது தேர்தல் ஆணையத்தின் மீதான நம்பிக்கை இழக்கச் செய்துவிட்டதாக பொதுவெளியிலும், சமூக வலைதளங்களிலும் மக்கள் விமர்சனம் செய்வது அதிகரித்து வருகிறது.

கீழ்க்கண்ட விடியோவில் மேலும் விரிவான விவரங்களை கேட்கலாம்.

நன்றி – RR Facts