Read in English / பிற மொழிகளில் படிக்க:
ஈரான் – இஸ்ரேல் போரால் உலக நாடுகளை ஸ்தம்பிக்க வைக்கும் ஹோர்முஸ் நீரிணை ஆபத்துகள்!
உலக வரைபடத்தில் மிகச் சிறிய நீர்ப்பரப்பாகத் தெரியும் ஒரு பகுதி, ஒட்டுமொத்த உலகப் பொருளாதாரத்தையும் ஆட்டிப் படைக்கிறது என்றால் உங்களால் நம்ப முடிகிறதா?
ஆம், அந்தப் பகுதிதான் ஹோர்முஸ் நீரிணை (Strait of Hormuz). தற்போது ஈரான் – இஸ்ரேல் இடையே நாளுக்கு நாள் அதிகரித்து வரும் போர் பதற்றத்தால், இந்த நீரிணை ஒட்டுமொத்த உலக நாடுகளின் கவனத்தையும் ஈர்த்திருக்கிறது.
உலகளாவிய ஆற்றல் பாதுகாப்பில் மிக முக்கிய பங்கு வகிக்கும் இந்த ஹோர்முஸ் நீரிணை, கப்பல் போக்குவரத்தின் மிக முக்கிய பாதையாக (chokepoint) செயல்படுகிறது. இது மூடப்படும் நிலையில் என்ன நடக்கும் என்ற அச்சம் உலகெங்கும் எழுந்துள்ளது.
உள்ளடக்கம்
ஹோர்முஸ் நீரிணை அமைவிடம்
📢 செய்திகளை உடனுக்குடன் பெற வேண்டுமா?
🟢 Follow Ramalingam Rathinasamy on WhatsAppமுக்கிய செய்திகள், விடியோக்கள், பயனுள்ள அறிவியல், கல்வி, அரசியல், இயற்கை சார்ந்த உடல்நலக் குறிப்புகள் அடங்கிய பதிவுகள் உடனுக்குடன் வாட்ஸ்அப்பில்!
மேலும் பல சுவாரஸ்யமான செய்திகள் மற்றும் அரசியல் தகவல்களுக்கு:
எங்களது யூடியூப் சேனல்களை Subscribe செய்து ஆதரவு தாருங்கள்!
▶️ Arasiyal Akkappore ▶️ rr views and factsஹோர்முஸ் நீரிணை என்று அழைக்கப்படும் Strait of Hormuz வளைகுடா நாடுகளை உலகின் பிற பகுதிகளுடன் இணைக்கும் ஒரு குறுகிய கடல் பாதை. வடக்கே ஈரானுக்கும், தெற்கே ஓமன் மற்றும் ஐக்கிய அரபு அமீரகத்திற்கும் இடையே இது அமைந்திருக்கிறது.
பாரசீக வளைகுடாவை ஓமன் வளைகுடா மற்றும் அரபிக்கடலுடன் இணைக்கும் மிக முக்கியப் பகுதியாக இந்த நீரிணை செயல்படுகிறது. இதன் புவியியல் அமைப்பு சர்வதேச அரசியலில் பெரும் தாக்கத்தை ஏற்படுத்தும அளவில் முக்கியத்துவம் பெற்றது.
இதன் மிகக் குறுகலான பகுதியில், கப்பல் போக்குவரத்துப் பாதை வெறும் 3 கிலோமீட்டர் அகலம் மட்டுமே. இதனால் இருபுறமும் கடற்படை கண்காணிப்பு மிகவும் தீவிரமாக இருப்பது வழக்கம்.
இந்த நீரிணை (Strait of Hormuz) 167 கிலோமீட்டர்கள் அதாவது சுமார் 104 மைல்கள் அல்லது 90 நாட்டிக்கல் மைல்கள் நீளமுடையது.
உலகப் பொருளாதார உயிர்நாடி
இந்த குறுகிய நீரிணை உலகப் பொருளாதார உயிர்நாடி என்று சொல்வதுதான் சரியாக இருக்கும். உலகின் எரிசக்தி தேவையில் பெரும்பகுதியை இந்தப் பாதைதான் பூர்த்தி செய்கிறது.
சவூதி அரேபியா, ஈரான், ஈராக், குவைத் மற்றும் கத்தார் போன்ற வளைகுடா நாடுகளில் இருந்து கச்சா எண்ணெய் இங்கிருந்துதான் ஏற்றுமதி செய்யப்படுகிறது.
திரவமாக்கப்பட்ட இயற்கை எரிவாயு (LNG) ஏற்றுமதிக்கும் இதுவே முக்கிய வழித்தடமாக உள்ளது.
உலகளாவிய எண்ணெய் விநியோகத்தில் சுமார் 20% முதல் 30% வரை இந்த நீரிணை வழியாகவே கையாளப்படுகிறது.
கப்பல் போக்குவரத்து மற்றும் எண்ணெய் விநியோகம்
இந்த நீரிணை வழியாக நாள்தோறும் ஏராளமான சரக்குக் கப்பல்களும், பிரம்மாண்ட எண்ணெய் டேங்கர்களும் கடந்து செல்வது வழக்கம். இது உலகின் மிக பரபரப்பான கடல் வழிகளில் ஒன்றாக இருப்பது இதனால்தான்.
சராசரியாக நாள்தோறும் சுமார் 21 மில்லியன் பீப்பாய்கள் (Barrels) கச்சா எண்ணெய் இந்தக் குறுகிய நீரிணை வழியாகக் கொண்டு செல்லப்படுகிறது. ஒவ்வொரு பெரிய டேங்கர் கப்பலிலும் பல லட்சம் பீப்பாய்கள் எண்ணெய் ஏற்றிச் செல்லப்படுகிறது.
இந்தக் கப்பல்கள் பெரும்பாலும் ஆசிய நாடுகளான சீனா, இந்தியா, ஜப்பான் மற்றும் தென் கொரியா ஆகிய நாடுகளுக்கே அதிக அளவிலான கச்சா எண்ணெயைக் கொண்டு செல்கின்றன.
ஈரானின் கட்டுப்பாட்டால் தடுமாறும் அமெரிக்கா
ஹோர்முஸ் நீரிணையின் வடக்குக் கரை முழுவதையும் ஈரான் முழுமையாகத் தன் கட்டுப்பாட்டில் வைத்துள்ளது. ஈரானின் இஸ்லாமியப் புரட்சிகரக் காவல்படை (IRGC) இந்தப் பகுதியில் தீவிர ரோந்துப் பணிகளில் ஈடுபட்டு வருகின்றன.
சர்வதேச அளவில் தங்களுக்கு நெருக்கடி வரும்போதெல்லாம், ஹோர்முஸ் நீரிணையை மூடிவிடுவோம் என்று ஈரான் அச்சுறுத்துவது வாடிக்கை. அப்போதெல்லாம் இது உலக நாடுகளைப் பதற்றத்தில் ஆழ்த்தும்.
அமெரிக்காவின் 5-வது கடற்படைப் பிரிவு இந்தப் பகுதியில் பாதுகாப்புப் பணியில் ஈடுபட்டாலும் கூட, புவியியல் ரீதியாக ஈரானின் ஆதிக்கத்தை முழுமையாகக் கட்டுப்படுத்துவது அமெரிக்காவுக்கு சாத்தியமில்லாத ஒன்றாக இருக்கிறது.
ஈரான் – இஸ்ரேல் மோதல் – பொருளாதார வீழ்ச்சி
தற்போதைய ஈரான் – இஸ்ரேல் போர் பதற்றம் உலகளாவிய எண்ணெய் சந்தையில் பெரும் பீதியை உருவாக்கியுள்ளது. இரு நாடுகளுக்கும் இடையிலான நேரடி மோதல் ஹோர்முஸ் நீரிணையைப் பெரும் ஆபத்தில் சிக்க வைத்திருக்கிறது.
ஒருவேளை போர் இன்னும் தீவிரமடைந்து, இந்தப் பாதையில் கப்பல் போக்குவரத்து முழுமையாக முடக்கப்பட்டால், சர்வதேச சந்தையில் கச்சா எண்ணெய் விலை நினைத்துப் பார்க்க முடியாத அளவுக்கு உயரும் என்பதே உண்மை.
எண்ணெய் விலை உயர்ந்தால், போக்குவரத்துச் செலவு அதிகரித்து, அத்தியாவசியப் பொருட்களின் விலையும் உயர்ந்து, உலகப் பொருளாதாரம் ஒரு மிகப்பெரிய பின்னடைவைச் சந்திக்கும் அளவுக்கு கொண்டுச் சென்றுவிடும்.
பாதிக்கப்படும் நாடுகள்
இந்த நீரிணை முடக்கப்பட்டால், அதற்கான மாற்றுப் பாதைகள் மிகவும் குறைவு. இதனால் மிகப்பெரிய அளவிலான நஷ்டத்தைச் சந்திக்கப்போவது கச்சா எண்ணெயை இறக்குமதி செய்யும் நாடுகள்தான்.
குறிப்பாக இந்தியா, சீனா போன்ற ஆசிய நாடுகள் தங்களின் எரிசக்தித் தேவைக்காக வளைகுடா நாடுகளையே பெரிதும் நம்பியுள்ளன. இந்தப் பாதை அடைக்கப்பட்டால் இந்தியாவின் பொருளாதாரம் கடுமையாகப் பாதிக்கப்படும்.
அமெரிக்கா மற்றும் ஐரோப்பிய நாடுகளும் விலைவாசி உயர்வால் பெரும் பொருளாதார மந்தநிலையை எதிர்கொள்ள நேரிடும் என்பது பொருளாதார வல்லுநர்களின் எச்சரிக்கை.
இதையும் படியுங்கள்: அலி கொமேனி பலி: உச்சக்கட்ட போர் தொடக்கம்
மாற்று கடல்வழி இல்லை
பாரசீக வளைகுடா (Persian Gulf) என்பது மூன்று பக்கமும் நிலத்தால் சூழப்பட்ட ஒரு முட்டுச்சந்து (Cul-de-sac) போன்றது. ஈராக், குவைத், பஹ்ரைன், கத்தார் மற்றும் சவூதி அரேபியா, அமீரகத்தின் கிழக்குக் கரை ஆகிய பகுதிகளில் இருந்து திறந்த கடலுக்கு வெளியேறவும், உள்ளே நுழையவும் இருக்கும் ஒரே கடல் வாசல் ஹோர்முஸ் நீரிணை மட்டுமேய
சூயஸ் கால்வாய் (Suez Canal) அடைக்கப்பட்டால் ஆப்பிரிக்காவைச் சுற்றி (நன்னம்பிக்கை முனை வழியாக) வருவது போல, ஹோர்முஸ் நீரிணையைச் சுற்றி வர எந்த மாற்று கடல் வழியும் கிடையாது. அனுமதி மறுக்கப்பட்டால் கப்பல்கள் வளைகுடாவுக்குள்ளேயே முடங்கிபோய்விடும்.
ஒரே மாற்று வழி – குழாய் வழித்தடங்கள் (Pipelines):
கப்பல்கள் வளைகுடாவிலிருந்து வெளியே வர முடியாது என்பதால், ஈரானின் நெருக்கடியைச் சமாளிக்கச் சில நாடுகள் நிலப்பரப்பின் வழியாக ‘பைப்லைன்களை’ அமைத்துள்ளன. இது மட்டுமே தற்போது இருக்கும் மாற்று வழிகள்:
சவூதி அரேபியாவின் மாற்று வழி
சவூதி தனது எண்ணெயை ஹோர்முஸ் நீரிணைக்குக் கொண்டு செல்லாமல், 1,200 கி.மீ குழாய் வழியாக நாட்டின் மறுபக்கத்தில் உள்ள செங்கடல் (Red Sea) பகுதியில் உள்ள யான்பு (Yanbu) துறைமுகத்திற்கு அனுப்பி அங்கிருந்து கப்பல் மூலம் ஏற்றுமதி செய்ய முடியும்.
ஐக்கிய அரபு அமீரகத்தின் மாற்று வழி
அபுதாபியில் இருந்து ஓமன் வளைகுடாவில் உள்ள புஜைரா துறைமுகத்திற்கு நிலப்பரப்பு வழியாக குழாய் மூலம் எண்ணெய் கொண்டு செல்லப்படுகிறது. இது நேரடியாக ஹோர்முஸ் நீரிணையைத் தவிர்த்து, திறந்த கடலுக்கு எண்ணெயைக் கொண்டு சேர்க்கிறது.
குழாய் பாதையில் உள்ள மிகப்பெரிய சிக்கல் என்ன?
இந்தக் குழாய் வழித்தடங்கள் மூலம் குறிப்பிட்ட அளவு (தினமும் சுமார் 6 முதல் 7 மில்லியன் பீப்பாய்கள்) எண்ணெயை மட்டுமே ஏற்றுமதி செய்ய முடியும். ஆனால் நீரிணை வழியாகத் தினமும் செல்லும் 21 மில்லியன் பீப்பாய்கள் எண்ணெய் கொண்டு செல்லப்படுகின்றன. இந்த கப்பல் போக்குவரத்துக்கு ஈடாக இந்த குழாய்களால் ஈடு செய்ய முடியாது.
குவைத், ஈராக் போன்ற நாடுகளுக்கு மாற்று வழியே இல்லை. கத்தாரின் திரவமாக்கப்பட்ட இயற்கை எரிவாயுவை (LNG) முழுமையாகக் கப்பல்கள் மூலமாக மட்டுமே அனுப்ப முடியும், குழாய்கள் மூலம் அனுப்ப இயலாது.
எனவே, ஹோர்முஸ் நீரிணை முடக்கப்பட்டால், மாற்றுப் பாதைகள் இல்லாமல் பல நாடுகளின் ஏற்றுமதி ஒரு முட்டுச்சந்தில் சிக்கிக் கொள்ளும் என்பதே அதிர்ச்சியான உண்மை.
காணொளி: Israel Gaza – இஸ்ரேல்-பாலஸ்தீனத்தின் உண்மை பின்னணி என்ன?
மக்கள் அதிகம் தேடும் கேள்விகள் (FAQ)
ஹோர்முஸ் நீரிணை எங்கே அமைந்திருக்கிறது?
இது வடக்கே ஈரானுக்கும், தெற்கே ஓமன் மற்றும் ஐக்கிய அரபு அமீரகத்திற்கும் இடையே அமைந்துள்ளது.
இந்த நீரிணை ஏன் உலகப் பொருளாதாரத்திற்கு முக்கியமானது?
உலகளாவிய எண்ணெய் விநியோகத்தில் சுமார் 20% முதல் 30% கச்சா எண்ணெய் இந்தப் பாதையின் வழியாகத்தான் ஏற்றுமதி செய்யப்படுகிறது.
நீரிணையின் அகலம் எவ்வளவு?
இதன் மிகக் குறுகலான பகுதியில், கப்பல்கள் செல்லும் பிரதான போக்குவரத்துப் பாதை வெறும் 3 கிலோமீட்டர் அகலம் மட்டுமே.
நாள்தோறும் எவ்வளவு எண்ணெய் பீப்பாய்கள் இதன் வழியாக கப்பலில் அனுப்பப்படுகின்றன?
சராசரியாக நாள்தோறும் சுமார் 21 மில்லியன் பீப்பாய்கள் கச்சா எண்ணெய் மற்றும் திரவமாக்கப்பட்ட இயற்கை எரிவாயு இந்த நீரிணையைக் கடந்து செல்கிறது.
இந்த நீரிணையை ஈரான் நிரந்தரமாக மூடுமானால் என்ன நடக்கும்?
இந்த பாதையில் எண்ணெய் கப்பல் போக்குவரத்து முழுவதுமாக முடங்கி, உலக சந்தையில் எண்ணெய் விநியோகம் தடைபடும். இதன் காரணமாக கச்சா எண்ணெய் விலை கடுமையாக உயர்ந்து உலகப் பொருளாதாரத்தை சரிவடையச் செய்யும்.
எந்தெந்த நாடுகள் ஹோர்முஸ் நீரிணை வழியாக எண்ணெய் ஏற்றுமதி செய்கின்றன?
சவூதி அரேபியா, ஈரான், ஈராக், குவைத், கத்தார் மற்றும் ஐக்கிய அரபு அமீரகம் ஆகிய நாடுகள் இந்தப் பாதையைப் பயன்படுத்துகின்றன.
ஹோர்முஸ் நீரிணை முடக்கப்பட்டால் எந்த நாடுகள் அதிகம் பாதிக்கப்படும்?
இந்தியா, சீனா, ஜப்பான், தென் கொரியா போன்ற ஆசிய நாடுகள் இந்த வளைகுடா எண்ணெயை அதிகம் நம்பியுள்ளன. இந்த நாடுகள் அதிகம் பாதிக்கப்படும்.
அமெரிக்கக் கடற்படை ஏன் அங்கு முகாமிட்டுள்ளது?
சர்வதேச கப்பல் போக்குவரத்தின் பாதுகாப்பை உறுதி செய்யவும், ஈரானின் ஆதிக்கத்தைக் கட்டுப்படுத்தவும் அமெரிக்காவின் 5-வது கடற்படை அங்கு ரோந்துப் பணியில் ஈடுபட்டுள்ளது.
ஹோர்முஸ் நீரிணைக்கு மாற்றுப் பாதை உள்ளதா?
சவூதி அரேபியா மற்றும் ஐக்கிய அரபு அமீரகம் சில குழாய் வழித்தடங்களை (Pipelines) வைத்துள்ளன. ஆனால், அவை ஹோர்முஸ் நீரிணைக்கு முழுமையான மாற்றாக செயல்பட முடியாது.
ஈரான் – இஸ்ரேல் போருக்கும் ஹோர்முஸ் நீரிணைக்கும் என்ன தொடர்பு?
இஸ்ரேலுக்கு அமெரிக்கா மற்றும் மேற்கத்திய நாடுகள் ஆதரவளிப்பதால், அவர்களுக்குப் பொருளாதார நெருக்கடியை ஏற்படுத்த ஹோர்முஸ் நீரிணையை ஈரான் ஆயுதமாகப் பயன்படுத்த வாய்ப்புள்ளது.
#StraitOfHormuz #IranIsraelWar #GlobalEconomy #CrudeOilPrices #MiddleEastCrisis #WorldPolitics #MithiranNews
தமிழக அரசியல் மற்றும் சமூகப் பிரச்சினைகளை ஆழமாக அலசுவதில் நிபுணத்துவம் பெற்ற மூத்த பத்திரிகையாளர் ஆர். ராமலிங்கம். 28 ஆண்டுகால கள அனுபவம் கொண்ட இவர், ‘மித்திரன் நியூஸ்’ இணையதளம் மற்றும் ‘Arasiyal Akkappore’, ‘RR Views and Facts’ யூடியூப் சேனல்கள் மூலம் அரசியல், கல்வி, அறிவியல் தகவல்களைத் துல்லியமாக வழங்கி வருகிறார்.
ஆச்சரியமூட்டும் தகவல்கள், அரசியல் பார்வைகள் மற்றும் வீடியோக்களை உடனுக்குடன் காண எங்கள் சமூக ஊடகங்களை பின்தொடருங்கள்:
🔗 எங்களது அனைத்து சமூக ஊடகங்கள்